МИНЬ ЭЗИДИЗЬ СТУВТО, МАРКОВНА! Истямо лем путозель Серафима Марковна Люлякинань 90 иень топодеманть тешкстамонь вастомантень. Истя жо лемдязель книгань лавсясь, конань паро мельсэ пурнынек минь, Игнатбуень ловномань кудонь важодицятне.
Ловнома кудонтень састь-пурнавсть Люлякинань вечкицятне, конатнень мельс тукшность сонзэ валморонзо (стихотворениянзо), налксеманзо, ёвксонзо, моронзо – весе сонзэ шкинемазо (творчествазо).
Велесэнек теевсь паро коекс тешкстамс сказительницанть ледстямонь чинзэ ды юбилеензэ.
Бути ловомс, те вастомась 25! Эсь койсэнзэ вишка юбилей. Мекс истямо покш мелень путома те эрзянь ломанентень Игнатбуень эрицятнень пельде? Аволь ансяк мазый моронзо кис. Васняяк, эрзянь мазый оймензэ, чевте седеензэ кис. Марковна сакшнось инжекс велезэнек. Те вастомадонть нейгак паро мельсэ ледстнекшнить сеть, кинень прась пазонь чансть неемс ды марямс Люлякинань.
Аватнень эрзянь мазый оршамотнеде перть пельксэськак мазылгадсь! Лисинек весе пурнавозтне библиотекань ушов ды сниминек вейсэнь фотос.
Панжизе вастоманть ловномань кудонь прявтось Болькина А.И.
Минек паро ялганок, С.А.Ламбинань лездамонзо кувалт, тенек понгсь уникальной видеофильма Серафима Марковнадо. Сон снимазель 1989 иестэ Кочкуровань Вирь Тавла велесэ. Ванынек сонзэ, ды, теке мерят, эрьвась юткстонк вастовсь те чевте седей, превей ды ёроков аванть марто. Паряк сонзэ оймезэяк ливтякшнось минек юткс, кунсолось кортнеманок, морась мартонок морот ды кецнесь сень кувалт: эзизь стувто сонзэ эрзятне.
«Сказительница» валось рузонь. Истя лемдить ломаненть, кона сонсь ладси ды морси морот, ёвкст, валморот (стихотвореният), кона лиссь раськень ломантнень ютксто. Сонзэ творчествась пек малавикс раськенсенть (народноенть) марто. Валось пек мазый, секс сон совась эрзянь кортамоскак, лиясто истя мерькшнесь эсь прядонзо Серафима Марковнаяк. Икелень шкань моронь ды ёвксонь ладсицятне а маштыльть ловномо-сёрмадомо. Эсест ладсевкстнэсэ сынь ёвтнильть. Серафима Марковна прядсь школасо вете класст. Сон эсензэ шкинеманть сёрмадыль конёв лангс. Паряк секс сон парсте ванстовсь ды пачкодсь тенек.
Жегалина Р. Д. – ёвтнесь сказительницанть марто ялгаксчидензэ, ловнось зярыя сёрмат, конатнень кочкинзе 30 ламо сёрматнень ютксто. Сон истя жо ёвтнесь Серафима Марковнань тейтерензэ Тамара Максимовна Щербаковань марто ялгаксчиденть, ловнызе сонзэ аванстэнь алтазь валморонзо. Истя жо ловнызе «Мекс, седейнем, ризнат?» валморонть.
Оймень токиця ды талновтыця валсо ёвтнесь Серафима Марковнань марто вастомадонзо ды сёрмань сёрмалемадонть Пьянзина Мария Константиновна. Сонзэ ёвтнемась ламонь мик авардстевтинзе.
Люлякинань «Тиринь мастор» валморонть ловныя мон.
Ламбина Светлана Александровнань ёвтнемадонзо икеле Кондратьева В.М., Кондратьева Л.Н. ды Полякина Т.Я.
морызь эрзякс «Беспокойная и земная» моронзо, конась ловови те пек ёроков поэтэнть ды композиторонть, артыцянть ды медицинань наукань кандидатонть визитной карточкакс.
С. А. Ламбина ёвтнесь, кода сынь Марковна марто вейсэ ардтнесть концертной бригада марто Мордовиянь районтнэва, морсесть эсест моротнень ды ёвтнесть валморотнень. Ульнесть вейсэ мик Зубово Полянасояк. Мейле Серафима Марковна сёрмады те веледенть стихотворения, конань рузонь кельс ютавтсазо Александр Терентьев. Римма Дмитриевна ловнызе те валморонть эрзякс, а Светлана Александровна рузокс. Ламбина тейсь музыка те стихотворениянть лангс. Лиссь пек мазый гайтев моро. Моры эйсэнзэ Александр Лутов – пек вадря морыцясь. Минь сонзэ кунсолынек музыкальной центранть пачк.
Протасовань «Эрзянь авинеть» ансамблясь гайтевстэ ды оймень путозь морызь «Вай, луга, луга», «Бояравине- тейтерне», «Вай верьга, верьга» ды лия раськень моротнень. Аватне тусть весень мельс аволь ансяк морамонь кис. Сынь васенцеде невтизь тенек эрзянь од оршамопелест. Истят мазыйть! Аватне весе одкстомсть ды теевсть седеяк мазыйкс неть оршамотнесэ.
Весенень вечкевсь, кода Эйкакшонь шкинемань Кудосо «Масторава» кужинень ветицясь Любовь Козлова морызе Серафима Марковнань «Лисян келей паксяв» моронть.
Седеень солавтыця «Сырнень покольнем» стихотворениянть ловнызе Анастасия Бочкарёва – эрзянь оршамонь стыцясь. Сонзэ лангсо ульнесть эсь кедьсэ стазь мазый оршамот.
Весе вейсэ морынек «Верьга-менельга» («Од шкам ютась») моронть.
Ветеранонь «Пизёлнэ» ансамблясь седейшкава морынзе С.М.Люлякинань «Эрзянь кель», «Россия – те весе тон»,
«Нуи Ваня комбайнасо», «Петра иредьстэ моли» ды «Мазый леесь – Кинелесь» моротнень.
Те вастомадонть ледстямга весенень явшезель «Сырнень покольнем» валморось. Меельцекс весе весэ сонзэ морынек.
Вастоманок ютась пек лембестэ.
Вана мезде тень коряс кортасть минек инжетне ды вастомань ютавтыцятне.
Пьянзина Мария Константиновна (Покш Игнатвеле):
Истямо вастомас мон зярдояк эзинь понгонекшне. Теке мерят алкукс вастовкшнынь Серафима Марковна марто. Покш пасиба вастомань теицятненень монь тердеман кис. Уледе шумбрат!
Ермушова Любовь Васильевна (Протасова):
Пек тусь монь мельс ды минек «Эрзянь авинеть» ансамблянь автнененьгак С.М.Люлякинанень алтазь вастомась. Сёрматнестэ, конатнень тенек ловнызь ды ледстнематнестэ минь неинек-маринек Марковнань оймензэ, ризксэнзэ-мелявксонзо. Седеяк пек тусть мелезэнек Люлякинань моронзо. Алтатано: миньгак совавтсынек сынст ансамблянь репертуарозонок. Сюкпря Римма Дмитриевнанень Люлякинадо дискенть кис.
Темаева Анна Фёдоровна:
Миненекак прась уцяска понгомс эрзянь сказительницанть С. М. Люлякинань лецтнемань вастомантень.. Мон ламо мезе саинь монстень те мероприятиястонть.Пек мелезэнь тусть Ламбина Светланань артовкстнэ, конатнень лангсо ули С. М. Люлякинаяк. Весе лецтнемань вастомась ульнесь пек лембе, теке мерят, сонсь Серафима Марковна мартонок ульнесь ды кутморясь эйсэнек сонсензэ лембе кедьсэнзэ, кода маштыль тееме ансяк сон, те ине эрзянь авась.
Минь, школань тонавтыцятне, ёвтатано паронь арсемань валт те пек валдо вастовоманть кис. Сон вельть пек тусь минек мельс. Сюкпря.
Абросимова Наталья Михайловна (Эстония):
Эстониясо минек ули эрзянь-мокшонь «Сятко» вейсэндявксонок. Минь тосо ютавтнетяно эрьва кодат вастомат. Ансяк С.М.Люлякинадо Эстониянь эрзятне аволь ламо содыть. Монь мельс пек тусь Игнатовасо ютавтозь вастомась.Сюкпря Римма Дмитриевнанень Люлякинадо дискенть кис, конань сон казизе миненек. Ней миньгак карматано седе ламо содамо те ине эрзянь аванть эйстэ.
Ламбина Светлана Александровна (Саранск):
Спасибо организаторам встречи за предоставленную мне возможность рассказать про удивительную женщину, очень близкую мне по духу – Серафиму Марковну Люлякину, прочитать стихи, посвящённые ей. Я в восторге от этой встречи. Спасибо.
Кечемайкина Валентина Григорьевна:
Вастомась ютась пек шождасто, лембестэ. Монень пек вечкеви Люлякинань творчествазо. Кодамо сон сюпав! Мельспаросо кудосояк ловнан сонзэ книгатнень. Те вастомась панжизе тенек Марковнань оймензэ. Минь кунсолынек сонзэ сёрматнень, ванынек сондензэ видеофильма. Монь мелем пек вановсь. Покш пасиба ютавтыцятненень.
Калякова Нина Ефимовна (Од Чамза):
Икеле истямо эрзянь мероприятияс мон зярдояк эзинь понгокшно. Пек тень вечкевсь весемесь, мезде ёвтнесть, мезде кортнесть, мазый моротне. Мон, теке одс чачинь, те вастомасонть.
Микаева Антонина Васильевна:
Пасиба Валентина ды Галина сазорон пельде те вастомань теицятненень. Монь мельскак сон пек тусь.
Сонаева Татьяна Григорьевна:
Вастомась лиссь пек паро. Пек вечкевсь весеменень видеофильмась. Сёрматнень кунсолозь, мик сельведетькак туить. Серафима Марковнань эрямозо ды творчествазо невтевсь тенек апак учо ёндо. Пек вановсь монь мелем. Покш пасиба.
Сураева Зинаида Степановна (Ташто Чамза):
Мон пек вечкса Серафима Люлякинань творчестванть. Марковнань ледстямонь чистэнзэ свал панькшнян пачалксеть ды поминан эйсэнзэ.Те ломаненть ули мезень кис вечкемс. Пасиба Пазонтень, што мон понгинь те мероприятиянтень. Пасиба ютавтыцятненень.
Кондратьева Валентина Михайловна:
Ветеранской организациясонок ютавтынек ламо эрзянь мероприятият. А весть тейнинек Люлякинанень алтазь ледстямонь концерткак. Арсян, течинь вастомась сехте удалась. Те аволь ансяк монь мелесь, истя арсить ламот «Пизёлнэ» ансамблянь аватне.Парсте гайгсть моронок, ладякшность валонок.
Болькина Антонина Ивановна:
Минек библиотекасонть ютакшныть пек ламо эрзянь мероприятият. Ансяк те вастомась лиятнень лангс а молиця. Сонзэ эйс путозель пек ламо оймень вий. Секскак сон лиссь пек паро. Паряк Марковнань оймезэяк те шкастонть ульнесь ютксонок.
Жегалина Римма Дмитриевна:
Ламоксть ютавтнинь эрзянь мероприятият, конат алтазельть С.М.Люлякинанень. Ансяк те вастомась лиссь сехте вадрякс. Паряк секс, ламо ломанть путсь покш ойме вий сонзэ теемстэ.Алкинестэ сюконян весенень, кить лездасть ды сакшность те вастомантень. Зярдо-бути Марковна пеняцясь: а морсить сонзэ моротнень, куш 360 экземплярт «Тонеть, Мордовиям, моран» книгатнень сон явшинзе ды казинзе. Ней жо вейкеяк эрзянь концерт а ютакшны, косо бу аволизь мора Люлякинань мазыйдеяк мазыйть моронзо. Ды улезэ истя свал.
Лариса Пизелёва – библиотекарь.
- участник сейчас на форуме
- участник вне форума