On-line: гостей 0. Всего: 0 [подробнее..]
Эрязо Эрзянь Масторось! Пингеде пингес эрязо! Эрзянь мель, эрзянь кель, Эрзянь Мастор!Erzänj mel, erzänj kel, Erzänj Mastor! Ersän mieli, ersän kieli, ersän Maa! | Эрзя, муить ундоксот! Erzia, muit\' undoksot!

АвторСообщение
moderator


Пост N: 113
Зарегистрирован: 13.12.10
Рейтинг: 0
ссылка на сообщение  Отправлено: 19.02.12 11:59. Заголовок: Чачома чи марто Татьяна Тимофеевна!


Течи эсь чачома чинзэ тешксты Татьяна Тимофеевна Чекушова - эрзянь содавикс авась.
Сондензэ - те сёрмадовкссонть:


Тамара Баргова

Эрзявань покш ойме

Баславизе Ромашкин
Казаньсэ культурань институтов кинть 33 колмо иеть теде икеле невтизе тензэ Владимир Ромашкин, – сон сестэ Татариянь прявтошсонть тонавтнесь, вейсэ тондавсь ардомс тенст поездсэ. Шкань ютазь, зярдо уш кавонест эрясть ды топавтсть тевест Саранскойсэ, содавикс «Торамань» прявтось а весть мизолдозь мерекшнесь Татьянанень: «Вана невтевлия кинть теть лияв, прядовлить кодамояк финансовой техникум эли ветеринарной институт – кияк а содавольгак, кодамо ломань ёмавтсь национальной библиотекась».
Володя маштсь мизолдомо, валсо лиянь эзь томбсе, маштсь чевтестэ кортамо. Ды, паряк, видечись ульнеськак неть сонзэ валтнэсэ. Алкукс, паро баславицякс кармась Татьяна Тимофеевна Чекушованень те кенярксонь каземе покш маштыцясь – институтонтькак сон пек парсте прядызе ды пеле пинге, ловт, таркань апак полавтне, важодсь минек республикань сехте покш – А.С.Пушкин лемсэ национальной библиотекасонть. Ушодокшнось отделэнь прявтокс, кассь директоронь полавтыцякс. Эсь тевенть парсте содамось, обуцясонть седеймарямось курок теизь полавксонь а содыцякс эрьва кодат покш ды вишка тевсэ. Нучк-пачк сон ардтнизе весе республиканть, секе тев яксесь шабрань регионтнэваяк – тонавтнесь паронть, лезэвенть, бажась тень совавтомс минек республикань библиотекатнень важодемань лувскак, сонськак ламо мезе паро пачтякшнось эрьва кодат вастовоматнесэ тевень коряс эсь ялгатненень. Сон содасынзе республикань келес библиотекартнень, кие мейсэ эри, кода важоди. Течияк, од таркасонзо, – Татьяна Тимофеевна вана уш кото иеть кода важоди Рав чирень финнэнь-угрань раськетнень методической центрань отделэнь прявтокс, - те лезды тензэ.
Се, мезенть минь пурнатано-сайтяно, максстано-велявттано ломантненень, свал эрси паро нежекс эрямонь перть.

Чольдердиця горнипов
Сон а морыцятнестэ, ансяк вана неть валтнэ – «чольдердиця горнипов» - маряви яла тень, ёвтазь сондензэ. – Истя мелезэнь тукшны, кода сон пейдси-раки, натой теньсэ зярдо-зярдо маряви тень горниповось. Азе, витемак, содыця! Марсик-эзик тонсь те горниповонть чольдердеманзо? А вана мон марян сонзэ те аванть вайгельсэ пейдемастонзо. Ды истя сон монень вечкеви!
Ды эдь аволь ансяк горниповось эйсэнзэ тень маряви – тундонь чудикерькскенть гульнемазо-бульнемазо… Менельга ливтиця карготнень кайсетиця клотномаст… Паро валонть кургсо кенеремазо-кеверемазо… Те, нать, секс: чуросто савкшны тень некшнемс Татьяна Тимофеевнань нусманякс, пек мелявтыцянь ды ризныцянь чачосо. Арась, а мерят, сонзэ овсе ютыть неть ризкстнэ-мелявкстнэ, минек тупонь-тапонь эрямосонть весенень сынь сатнить. Ансяк вана монь ялганть истямо келей ды мазый обуцязо – а пек невти сон весененень эсензэ стакачинзэ-ризксэнзэ. А уш обуцянь те ёнксось питнейде ашти. Минь тонадынек секе тев понгавтнеме лиянь ланга мелявксонок-томбавксонок, сень стувтнезь – эрьвань те сюпавчись эсензэяк сатни. Татьяна Тимофеевна вансты лиянь пилетнень-ойметнень эсензэденть, сон анок капшамс кисэть мелявтомо, ризнэме, аштеме. Те анокчись улемс эрьванень нежекс чадозь чады эйсэнзэ, тень а редямс пек стака. Истямо вана обуця. Ды вана чольдерди, клотны, мазыйстэ гульки-пульки раксемазо.
Косто истят обуцятне?
Ды кода, нать, эрьваськак: касы-кенери васняяк кудосо-чисэ, эсеть семиясо, малавикс ломантнень пельде.

Поводелень элесэ
Чачсь-кассь Татьяна Тимофеевна Чекушова (Бурнаева) эрзянь покш велесэ, конань содасызь республикань томбальгаяк. Поводелесь кастась-кенерстсь ламо превей ды виев ломанть, тестэ лиссть трудонь геройть, генералт, художникть, алкуксонь важодицят, эсь тевень паро содыцят ды вечкицят. Поводелень авань фольклорной ансамблясь 1970-1980-це иетнестэ ардтнесь уш Финляндиява-Венгриява кезэрень эрзянь моротнень марто, сестэ натой пластинкаяк лиснесь неть моротнень марто «Мелодия» фирмасонть.
Истямо веленть элесэ касомс-кенеремс – уцяска. Седеяк покш уцяска чачомс превей, мелявтыця тетянь-авань эйкакшокс. Самай истят тетят-ават сатотсть Татьяна Тимофеевнанень: Тимофей Андреевич ды Ульяна Михайловна пингест эризь мазыйстэ, эрямованть паро челькень кадозь. Ней уш сонсь Татьяна Тимофеевна превс путы тейтерензэ ды эсь племянниктнень сеть койтненень, конатнень саинзе эсест кудосто-семиясто: свал улемс анококс весенень паронь тееме. Паронть теик – ды стувтык, иля ледстне теде ломаннень. Паронь кис пандомка зярдояк иля учно. Аволь валсо тонавты, превс путы – тевсэ.

Тетят-ават
Вете класстнэнь Тимофей Бурнаев прядынзе войнадо икеле ды уш 14 иесэ важодсь Дубенкань райисполкомсо счетоводокс. Мейле ульнесь войнасо, - семиястост колмонест понгонесть те гувныця толонть потс, тетязо Андрей Петрович ды сон Илья ялаксонзо марто. Колмонест живстэ велявтсть – те а ёвтавияк кодамо уцяска. Харьковсо прядсь финансистэнь курсат, Саранскойсэ мейле важодсь ревизорокс. Содыцяль ломанесь, свал тердтнесть эйсэнзэ эрьва ков ревизиянь тееме. Идесь чумовтомотнень, лангс ливтсь кедь лангс аванькстнэнь. Весть пасибань ёвтамга веть Отяжелестэ пансть тензэ кудов скал, икелень азорозо истя снартнесь пандомс паронть тейтерензэ пекстамодо идемань кис. Ульяна Михайловна эзь кенере кецнезевемеяк (эйкакштнеде кудо потмо, эрясть вачонь-пешксень), кода мирдесь недлячистэ кудов самстонзо кармавтызе азоронзо мекев саемс скалонть. Эзь тонале сон тевензэ кисэ истямо питнень саеме, содась: ломанень сельведь лангсо, нужасо уцяскат ды паро эрямо а тейнить. Эрясь ды важодсь ванькс оймесэ – тевень содазь. Якиль эрьва кува кшнисэ стазь-вельтязь чувтонь горобиине марто – те шкас сон ванстовсь кудочисэст. Стакине, а шождаль горобиинесь. Цёранзо-тейтерензэ касозь яла дивсильть: кода истя тетяст кандтнесь те сталмонть мартонзо?
Вана истя кандтнеськак! Весе республиканть мартонзо ардтнизе-ютызе. Аволь машинасо – лишмесэ. Седе сеедьстэ – овсе ялго. Васень шкасто велев самсто совиль тердицятнень туртов удомо. Мейле лоткась, кармась кадновомо венть лангс правлениясо эли вельсоветсэ, таркакс тензэ ульнесть тосонь стольтне, прялксокс –кшнисэ чавозь секе горобиинезэ. Лоткась ломаньс совсемеде вейке тевде мейле. Весть сась истя, ваны: мирдесь ды нись мезде-бути кувать тошксить. Абунгадсь, эзь сода мезе арсемскак. Весементь чарькодизе, зярдо озавтызь стол экшс: икелензэ путсть вейке ал, - те алдонть башка, нать, мезесткак арасель Саранскоень ломаненть каванямс.
Тимофей Андреевич велявтсь войнасто 1947-це иестэ. Эйкакштне чачильть, Ульяна Михайловна кода маштсь майсесь мартост Поводелесэ, сеинест ульнесь – вачодо ней уш эзть кулсе.
Мирдесь эрясь Саранскойсэ ды яла яксесь республикаванть ривизия марто. Пачкодиль семиязонзо ансяк кой-зярдо недлячитнестэ, кудонь тевень теемеяк а кенериль. Пек а шождаль ламо эйкакш марто вейкине авантень, раздевиль эрьва ёнов. Эйкакштнеде весемезэ ульнесть кавксо, вейкесь – сехте покшось – кулось войнань шкасто. Войнадо мейлеяк вишкинетненень сатотсь. А весть савкшнось тень марсемс войнань шкава эйкакшонь триця аватнень те стака укставксонть: «Эх уш… Миньгак, меремс, тринек-кастынек эйкакшт…». Мезе неть валтнэнь экшсэ – чарькодеви ансяк сенень, кие ютась сень трокс. Яла капшасть трудоднятнень тееме, яла пельсть тунеядствасо чумондомадо… Поводелесэ вейке ава весть эзь лисе паксяв – пек ормалгадокшнось эйкакшозо: кемень иес пекстызь… Кодамо трямодо-мелявтомадо эрявсь арсемс, бути эрьвань велькссэ стака торокс новолезь аштесь те пелемась: илизь чумондо! Вана Ульяна Михайловнаяк кашлангс сюлмсилизе поти эйкакшонть – ды паксяв – суронь кастомо! Келя, сюпавсто максыль модась суродонть! Мейле сексень перть бука лангсо ускильть суронть Отяжелев. Мекев а кенерить велявтомо – удыть киньгак кедьсэ: сынськак вачодот, эйкакштнеяк кудосо ськамост вачот. Вана истя арсестькак: кинень а куломс – се а кулы…
Кашлангс сюлмсезь цёрынькаст якамо кармась ансяк ниле иесэ. Мезе теят…
Весть войнасто мирденть пельде сась почта вельде тапаркс: Тимофей Андреевич кучсь гимнастёрка ды штанат. Нетнень низэ кандынзе васоло базаров, ялго якасть натой Лукояновав ды кисэст тензэ макссть ниле ведрат модамарь. те ульнесь а ёвтавикс кенярксокс. Ды таго ведь ниле ведратнень каряз лангсо, ялго ицкавтынзе! Кенярдсь – модамарь юткс понгсть ниле якстерькайть – нетнень порнинзе ки ланга. Кодамо прянь ванстомадо кие арсесь!..

Сехте вишинька
Тимофей Андреевич велявтсь войнасто 1947-це иестэ. Татьяна – кавксоце диринест – чачсь 15 иень ютазь, 1962-це иень февралень 19-це чистэ. Тетянтень ульнесть 45, аванстэнь 44 иеть. Эрзятне меельце эйкакштонть кортыть: очконь коцькерявкс. Пекиямсто Ульяна Михайловна арсесь эйкакшонть каямодо. Парыязо оймавтызе-ладсизе: «Чачтак – кулы. Ойминезэ а сайсак, Пазось сайсы». Истя вана чачтызеяк.
Сыль сыре патяст –Ульяна Михайловнань аванзо патя (сынь ульнесть Кендянь) – адя икелензэ мирдть-нить тейтерест шнамо: «Неят, кодамо дока!». Тонась каршост: «Вадрясь вадря, ды уш саты тыненк! Максынк вишкиненть монень, монсь тряса-кепедьса!».
Жаль марявсь – эзизь максо.
Эрьвантень эйстэнек менельтнесэ тешкставить китне. Кольневтезь кепедизь-кастызь вишкине сазоркинест лелятне-патятне, тетянзо-аванзо туртовгак сон меельце чизэст кадновсь валдо кенярксокс. вана кодамо уцяска тешкстазель тензэ.
А уш седе тов – седеяк келей кить панжовсть уцяскантень – эрямось масторонть лангсояк, велесэяк аламонь-аламонь вадрялгалесь. Ды кадык, кода икеле ладсояк, лиясто а мезель ярсамс модарькадо башка – кукурузань пель кшинть мельгаяк лавкасо сеть иетнестэ савкшнось аштекшнемс, ялатеке кемевсь вандынь паротнес.
Вишкинесь, нама, эзь маря весе неть стакачитнень – сатнильть седе тантей покольнетне-кувинетне. Алкукс, кассь вечкемасо, кольневтемасо. Ды кассь цецькинекс. Покштнэ ойме путсть тензэ. Коля, Витя, Надя, Тоня, Ваня, Юра, Таня – течимень чис сюлмазь кеме пинкссэ. Кадык уш кой-конатне ней тусть эрямостонть, те кеме пинкссэнть мартост тапардазь эйкакшосткак, нуцькасткак.
Валдо ледстнемакс кадовсь, зяро ойме ды лембе тензэ путсть покш лелязо – Николай Тимофеевич ды низэ – Мария Алексеевна. Сынь васня важодсть Енгалычевань школасо, Николай Тимофеевич ульнесь тосо директорокс. Мейле састь Поводелев, тонавтсть тесэнь эйкакштнень. МарияАлексеевна ульнесь Татьяна Тимофеевнань классонь руководителекс, салавинька манявиль мереме тензэ уряж, вечкилизе кавто покш вечкемасо – кода малавиксэнть ды тонавтыцянть. Лелязо ды уряжозо путызь превс молемс тонавтнеме Казаневгак.
Татьяна Тимофеевна сеедьстэ ледстни, кода Надя покш патязо, сон жо крёснавазо, Казанев ильтямстонзо максызе тензэ меельценть, мезезэ ульнесь питней – сырнень часонзо: кадык Таня тосо эйстэст теи эстензэ пилекст, илязо сявадо сельмезэ ялгатнень лангс. Пингензэ перть Надя трудясь больницясо, пек ламонень лездась. Сонзэ колмо эйкакшонзо.
Таня патязо эсь шкасто ульнесь содавикс спортсменэкс, прядсь физвуз, трудясь эйкакшонь садикень прявтокс. Мейле садикенть велесэ пекстызь.
Витя, Ваня ды Юра браттнэ ульнесть сонзэ ванстыцякс эрьва косо ды эрьва мейсэ. Ней уш кавтотне эйстэст арасть.
1983-це иестэ Татьяна Тимофеевна пек парсте, якстере диплом марто, прядызе Казаньсэ культурань институтонь библиотекань отделениянть ды уш августонь 1-це чистэ сась важодеме Пушкин лемсэ республикань библиотекав. Васня ульнесь старшей методистэкс, главной библиотекарекс, научно-методической отделэнь прявтокс, 1995-це иестэ саезь – директоронь полавтыцякс. Ульнесь сон истя жо теке шкастонть научно-редакционной советэнь прявтокс, мартонзо ушодовсь «Библиотекань краеведениясь» пусмонь нолдамось. Сон ламо тейсь сень коряс, штобу 1990-це стака иетнестэ Россиясо лисиця книгатне пачкодевельть Мордовиянь библиотекатнес. Мартонзо теезель книгань фондтнэнь ванстомань программа.
2006-це иестэ саезь Т.Т.Чекушова труди Рав чирень финнэнь-угрань раськетнень методической центрань отделэнь прявтокс. Ды тагояк оймензэ путы тевентень. Зяро покш тевть ютавтозь сонзэ ушодксонзо коряс, сонзэ марто! Ледстяса ансяк вейкенть: «Раськень-семиянь вейсэндявкстнэ» конференциянть, кона мольсь ды анокставсь 2011 иень перть. Татьяна Тимофеевна кепедизе аволь ансяк минек республиканть, томбале эриця эрзятнень-мокшотнень, конат, сыренек-однэк, ушодсть сёрмадомо, вешнеме, тонавтнеме эсест раськенть историянзо, муизь ды ледстизь покштяст-бабаст, васоло сырькаест. Сень коряс, мезе пурназь, можна теемс покш ды пек лезэв – весенень лезэв книга!
Ды эряви меремс, весементь, мезенть теи Татьяна Тимофеевна, зярдояк а ловсак невтемань кис тевекс. Тень коряс пек парсте кортась авадонзо тейтерезэ, Юля, кона мелят прядызе якстере диплом марто национальной культурань институтонть ды сень, мезе макссть тензэ авазо-тетязо, тонавтнемась, анок максомс лиятненень. «Авань обуцясонть васень таркасо – седейлембесь ды анокчись весенень лездамс. Сон машты куш кодамо стакачисэ зярдояк а нолдтнемс кедтнень, моньгак тенень тонавтсь ды тонавты».




Фотосонть Т.Т.Чекушова Ульяновской областень Инзенской р-нь Оськина велесэ. 2011-це иень кизна.

Спасибо: 0 
ПрофильЦитата Ответить
Ответов - 1 [только новые]


администратор




Пост N: 4889
Зарегистрирован: 17.11.06
Рейтинг: 6
ссылка на сообщение  Отправлено: 19.02.12 13:45. Заголовок: Matorchik))) пишет: ..


Matorchik))) пишет:

 цитата:
Татьяна Тимофеевна Чекушова - эрзянь содавикс авась.



Шумбрачи, валдо мельть ды паро тевть тензэ!

Эрязо Эрзянь Масторось!
Эрзят, илядо пеле эрямо эрзянь мельсэ.
Эрзянь мель, эрзянь кель, Эрзянь Мастор!
Спасибо: 0 
ПрофильЦитата Ответить
Ответ:
1 2 3 4 5 6 7 8 9
видео с youtube.com картинка из интернета картинка с компьютера ссылка файл с компьютера русская клавиатура транслитератор  цитата  кавычки оффтопик свернутый текст

показывать это сообщение только модераторам
не делать ссылки активными
Имя, пароль:      зарегистрироваться    
Тему читают:
- участник сейчас на форуме
- участник вне форума
Все даты в формате GMT  3 час. Хитов сегодня: 21
Права: смайлы да, картинки да, шрифты нет, голосования нет
аватары да, автозамена ссылок вкл, премодерация откл, правка нет