Мелькужо Эрзянь Мастор - Форум Страна Эрзян, Форум Эрзя народа

[big]Содавикс мастер, чувтосто керсиця, эрзянь ойме...

Кочкурбуень Вирь Тавла велесь содавикс аволь ансяк минек республикасо, сонзэ томбалеяк. Те эрзянь велесэнть чачсть зярыя содавикс ломанть. Вана уш 30 иеде ламо тосо важоди чувтосто керсемань эйкакшонь художественной школась. Чувтосто керсезь Тавлань налкшкетне ды лия теевкстнэ вастневить малав эрьва выставкасо. Кода сынтемест? Истямо седейстокиця мазычи, а зяро ойме эйзэст путозь! Ули мелем евтнемс тенк чувтосто вейке керсицядо, народной мастердэнть – Петр Владимирович Рябовдо. Неть читнестэ сонзэ ульнесь юбилеезэ – 50 иеть. Тень коряс минь вастневинек мартонзо. Паро мельсэ кортынек эрямодонзо, творчествадонзо, вечкевикс тевдензэ.

Чачсь Петр Рябов Кочкурбуень Вирь ало Тавласо, эрзянь покш семиясо, косо чачсть-кассть кото эйкакшт. Аванзо пельде сон сайсь пек ламо. Ульяна Тихоновна авась превей, фольклоронь содыця, моронь вечкиця. Зярдо Петр тонавтнесь котоце классо, школазост сась чувтосто содавикс керсицясь Н.И.Мастин, кармась ветямо рисованиянь ды трудонь урокт. Сон пурнынзе перьканзо эйкакштнень, варштась, кие машты керсеме, изняви-арась чувтось. Николай Иванович теевсь тенст пек вадря тонавтыцякс. Истя Петр Рябов кармась якамо чувтосто керсицянь кружокс. Покш класттнэнь прядынзе Пакся Тавлань школасо. Истя лиссь, школань прядомадо мейле сон сась важодеме тиринь велев. Тосо панжовсь чувтосто керсемань эйкакшонь школась. Петя Бочкин ялганзо марто ульнесть васенце тонавтыцякс, кармасть тонавтомо керсеме вишкинетнень.

Седе тов Петр Владимирович служась армиясо, Белоруссиянь Могилев ошсонть. П.Рябов паро мельсэ ледстни се шкадонть:
– Служинь мон паро таркасо. Пельиень ютазь, пек скушнавинь чувтонть мельга, истя уш мезеяк теиксэлинь, валт арасть! Маринь, те ошсонть эри содавикс чувтосто керсиця. Взводонь командирэнть кедьстэ энялдынь ветямс монь сонензэ. Саинь мартон фотот, косо снимазельть чувтосто керсевксэнь. Чувтосто керсицясь ульнесь Роман Яковлевич Иванченко. Дивавтымим мастерскоезэ, кудозо. Кудонзо перька ламо теевксэнзэ. Зярс командирэсь кортась сонзэ марто, мон эзинь кирдеве, кевкстинь, саинь узерне ды карминь чувтосто керсеме. Сеске лаксинь атине. Иванченко мерсь: «Те церантень эряви тонавтнемс седе тов керсеме».

Взводонь командирэсь Трегубов ломанесь превей, чарькодиця. Сон седе тов лездась П.В.Рябовнэнь якамс тонавтнеме. Те вастовомадонть мейле П.Рябов аволь весть сакшнось чувтосто керсицянтень. Сон алкукс эйсэнзэ тонавтсть. Р.Я.Иванченко паро ломанель, панжадо ойме, ков а молиль, эрьва косо содылизь, мизолдыльть каршонзо. Ламо мезе сайсь П.Рябов сонзэ пельде. Мейле усксизе Тавлавгак. Весе ялганзо сакшность мартонзо теевеме содавиксэкс. Петр Владимирович мейле церанзояк лемдизе Иванченконь лемсэ Романокс.
Армиясо служамсто П.Рябов теинзе Ленинэнь ды Дзержинскоень скульптураст. Истя жо тейнесь ламо лия сувенирт. Эрсиль истяяк, миилинзе, рамиль паро резецт, конатнень кучнилинзе эсензэ школас.

Армиядо мейле Петр Владимирович таго сась важодеме тиринь школас. Тосо сынь арсесть тонавтомо башка методикань коряс. Велень эрьва ульцясо, ве кудынесэ вастневсть тонавтыця ды тонавтницятне. Тевтне тусть. Весе лездасть, кияк эзь моле каршо. Малав 30 эйкакшт сакшныльть свал, вишкат ды седе покшкеть. Эрьва куросонть 10-15 ломанть. Важодсть мартост валске марто чокшнес. Сынь пек бажасть: илязт ема те эрзянь велесэнть национальной енкстнэ, эйкакштне содавлизь ды вечкевлизь эсь историяст, содавлизь ды чарькодевлизь эрзянь керсема юронть.

Седе тов П.Рябов заочна тонавтнесь Н.П.Огарев лемсэ МГУ-нь филологиянь факультетсэ. Теке жо шкастонть важодсь прявтокс Тавласо чувтосто теемань национальной налкшкень цехсэ. Се шкане ульнесть ламо заказт, тейнесть ламо партият. Ульнесть вешемат омбо масторстояк. Мейле панжозель «Тавлинский сувенир» кооперативесь. Эйдень кужотнес ды кудотнес тейнесть национальной ужинеть (уголокт), музыкальной кальдердемкат, эйдетне вишка шкасто марявлизь минек кезэрень гайттнень. Панжнесть башка выставкат.

Петр Владимировичень валонзо коряс, 1990-це иетне сехте стакальть. Кооперативесь важодсь 1996-це иес ды пекставсь. Чувтосто керсицясь таго мольсь важодеме школас тонавтыцякс. 1999-це иестэ сон пурнынзе Тавлань чувтосто керсицятнень «Эрьмезь» вейсэндявксос. Эсь теевксэст кармасть невтнеме эрьва кодамо выстаквкасо. Ней тосо 30 мастерт.

Кона шкане Петр Рябов тейни чувтосто керсезь мазычинть – сонсь соды. Ломанесь свал сельме икеле, эрзянь вастовоматнесэ, покшчитнесэ, малав весе выставкатнесэ. Перьканзо свал ломанть, кевстнить, кортыть. А кодат сяткинеть эйкакштнень сельмесэст, зярдо сынь ванныть авторонть налкшкензэ, зярдо сон максы сынст варчамс эли ютавты тенст чувтосто керсемань мастер-класст. Лангс ваномс – сэтьме, тунь а покшкавтниця, теке марто – оймамонь а содыця. Уш бути ушоды – тевенть топавтсы вадрясто ды педе пес. Сонзэ эйсэ эрзянь алкусонь ойме, панжадо, кеме.

А зяро выставкасо ульнесь – а лововияк. 1977-це иестэ саезь те шкас эсь теевксэнзэ невтезельть республикань, весероссиянь, раськеютконь выставкатнесэ Россиянь ды омбо масторонь оштнэсэ. Теде башка, сонсь ульнесь пурныцякс-панжицякс чувтосто керсицянь зярыя семинаронь, выставкань. Саемга: «Традиции предков в резьбе по дереву в современную жизнь», «Вейсэнь ундокст» финнэнь-угрань раськень чувтосто керсицятнень раськеютконь васенце семинар. 2006-це иестэ панжозель «Шкань суринеть» персональной васенце выставказо. Петр Владимирович – Россиянь Художникень союзонь член (2003). Мастерэнть творчествадонть содыть финнэнь-угрань мастортнэсэ. Меельце кавто иетнень перть примась участия Салехардсо, кавксть Удмуртиясо, Ульяновской областьсэ садово-парковой скульптурань фестивальтнесэ. Сонзэ героензэ седе сеедьстэ — ломанть, саемга, превей сыре атинеть, конат сакал марто, покш карьсэть эли кепеть ды свал эрзянь панарсо. Чамасост бажи невтемс обуцянь енкстнэнь.

2006-це иестэ Петр Рябовонь мелензэ коряс Вирь Тавласо панжозель «В.Ромашкин лемсэ музей Этно-кудось». Нама, тень топавтомс лездасть ламо паро ломанть. Йовлань Оло марто вейкест-вейкест сынь содыльть, ульнесть паро ялгакс. Музеентень тедеде топодсть вете иеть. Те шканть перть тов сакшность малав кемень тёжа ломанть, эрьва кодамо енкссто, омбо масторстояк. Этно-кудось теевсь паро таркакс эрзянь вастовоматнень ютавтомга. Тосо кавксть ютась «Кулдор-Калдор» пейдемань фестивалесь, колмоксть – «Торамась терди» эрзянь кезэрень моронь фестивалесь. Арсян, тосо седе товгак кармить ютамо вадря кенярксчить. П.Рябов Этно-кудосонть важоди Р.В.Водясова марто.

Петр Владимирович эри ды важоди Вирь ало Тавласо, тосо вечкевикс семиязо. Мария Петровна нинзэ марто трить кавто эйкашт: Романонь ды Ольгань. Сонзэ церазояк машты чувтосто керсеме, теевксэнзэ ульнесть ламо выставкасо. Прядызе МГУ-нь ИНК-нть. Ольга жо — Кооперативной институтонь студентка.
Эрзянь-мокшонь раськень культурань музейсэ Петр Рябовонь панжовсь выставказо. Сонзэ лемезэ – «Панжадо ойме», алтави С.Эрьзянь чачома чистэнзэ саезь 135 иетненень. Выставкантень пурнавкшность малавиксэнзэ, содавиксэнзэ, ялганзо. Весе евтасть ламо лембе валт. Миньгак эсенек пельде арсетяно Петр Владимировичнень кеме шумбрачи, творчествасонзо од изнявкст, паро уцяска, икелев молема ки, свал улемс истямо панжадо ойме валдо ломанекс!
Т.Маторкина