Отправлено: 05.05.09 17:27. Заголовок: Эрюш Вежай. Ёвтнемат, валморот.

 Отправлено: 01.04.15 23:26. Заголовок: КУЛАГА (неень шкань ..

КУЛАГА
(неень шкань эрзянь ёвкс)
Эрьва раськенть улить эсензэ ярсамканзо, конат лововить раськентень эсенсекс. Улить сынь Эрзя раськентькак. Кие эзизе стувто эсь Эрзя раськензэ, эзизе мие эрзянь тиринь келензэ, се ломанесь сынст, неть ярсамкатнень, содасынзе, путы тенст покш питне ды пани-пиди эйсэст эрзянь покшчитнестэ. Теньсэ те ломанесь вансты Эрзя раськенть, сонзэ эрямонь культуранзо, эрямо коензэ ды иланзо. Ансяк эрзянь келесь, эрзянь оршамотне ды эрзянь койтне-илатне явтыть Эрзя раськенть лия раськетнень эйстэ, невтить Эрзя раськенть сеть эрямо ёнксонзо, конань лангс ванозь лия раськень ломантнеяк, сынсь эрзятнеяк, сеск чарькодить, икелест – Эрзя, эрзянь ломань.
Течинь ёвкскесь – эрзянь тантейде тантей ярсамкадо, конань лемезэ кезэрень, эрзянь. Те ярсамопеленть лемезэ – КУЛАГА.
Эрзянь раськень ярсамопельтнень ютксто эрзятне парсте содасызь КУЛАГАНТЬ. Кие а содасы эрзянь келенть, эрзянь койтнень, се а содасынзе а КУЛАГА валонть смустензэ-зэмензэ, а КУЛАГАНТЬ танстензэ, а содытькак пидема лувксонзояк. Секскак эрзятненень, васняяк эрзянь аватненень, ванстомка КУЛАГА валонтькак, кулаганть пидемалувксонтькак.
Кезэрень шкасто саезь, зярдо эрзятне а содыльть сахордо, ялатеке вечксть ды тейнильть ламбамо ярсамкаткак. Неть ярсамкатне пидевильть-паневильть эрзянь покшчитнес. Неть покшчитнень ютксо васень таркасо ульнесть читне, конатнесэ эрзятне кундыльть Тоначив туезь малавикс ломанест, покштяст-сэрдяст лемест. Тоначив туезь ломантнень лемест кундамо чинтень эрзянь аватне пидильть КУЛАГАТ. Те валось теевсь КУЛО валонть эйстэ: КУЛА+га.
Кулагань пидемкась – тевесь аволь куроконь, саи кавто чить. Вейке чистэнть ушодови, анок карми ансяк омбоце чистэнть. Паневи ансяк эрзянь каштомсо, кона уштови паро, коське пенгсэ, псистэ. Кулагань пидемкась вечки пси каштомо.
Вана кода ёли кулаганть пидемадонзо вейке превей эрзянь ава Оренбург ёнкссто:
«Валске почтонть лангс каямка лаки ведь, аламодо кельмевтезь. Ды човорямка, ансяк, аволь дюрьмат улест, седе вецана. Учомс, кода кельми, ансяк аволь пес кельмемас. Мейле каямс лембе ведь, вецакавтомс чапаксось. Путомка те чапаксось лембе таркас ды човорямка чоп, зняроксть кенерят. Эйзэнзэ каямс чевгельмарьть (калинат), чеймарьть (клюкват), чапаськадоволь чапаксось. А чапаськады ва чапаксось, сестэ эзэнзэ каямка розень кши сускомо. Ва а чапаськады, сестэ те аволь кулага карми. Кадомка чапаксонть якамо валскес. Чапаксось улезэ вецана, теке велькс. Валске путомка пиеме каштомс. Сон карме лакамо, чадомо ды теке пие. Мейле каямка сахор, ки кода вечки.»
(Панемалувксось: Зуева Юлиянь, Оренбург ёнкс.)
Монсь васенцеде варчтыя кулаганть танстензэ веете-кото иестэ. Ульнесь кизэ. Кулось Алопесэ Силя Онтон. Атясь сыре ульнесь, сэрей, кеме, теке пингень тумо. Прячерензэ, сакалонзо кувакальть, шержевть. Тельняяк, кизнаяк пильгсэнзэ тонгозельть покшт, ашот кендекемть, конатнень сон а кайсилинзе мик пси кизэнь читнесэяк. Кем пильгтнесэ ульнесть викшнезь якстере суресэ эрзянь буетешксэнзэ, пеильмань кондямот, трокске марто. Онта атясь сеедьстэ аштиль озадо эчкеде эчке тумонь мукорь лангсо, кедьсэнзэ нежедиль селеень кеме нежемондас, конань кундамкась куватень эрямонзо перть пек валакадсь ды цитнесь чинть каршо. Ульнесь Онта атянтень кавксонькеменьде ламо иеть. Якиль стакасто, кода мерить, карязонзо ульнесть новолезь, кромождыль керш пильгензэ лангс. Секскак велень цёрынетне шкань-шкань сельме удалга истяня Онта атядо «морсильть»: - Эх тон, тон! Кичкере пильге Онтон!- Онта атя теньде содась ды эзь кирде озор цёрынетнень лангс кодамояк кеж. Ансяк муст-муст пейдезевиль ды чуросто ахолдавиль нежемондасонзо кодамояк назой цёрыненть лангс, седе сеедьстэ – Лашукинь Серьгунь лангс, кона прянзо а пелицякс невтемга пек малас эцниль Онта атянть ваксс. Сестэ цёрынетне теке карвот ливтязь ливтильть седее васов «кежей» атянть вакссто…
Кулось атясь вейке чис, апак сэреде. Велень цёратне тейсть тензэ покш кандолаз ды сэрей, эчке тумосто – крёст. Неть тюжа лаксевкстнэнь чинест нейгак марявить судоварясом….
Чувсть калмо. Новольстизь кандолазонть калмос. Вализь тюжт мери сёвонсэнть, вельтизь луганарсо. Стявтызь ванькс тюжт-ожола крёстонть. Аватне лайшизь Онта атянть, вешсть Инешкипазонть саемензэ чевте оймензэ Тоначив…
Калмазырьсэ велявтсть Онта атянть кудос, лемензэ кундамга. Ойсесть таргазь стувор экшс. Стуворось пурназь калонь курниксэ, аштить поза марто кукшинт. Эрзятне ярсыть сэтьместэ, ламонь апак корта. Весе мельсэст кирдить кулозенть лемензэ…
Ярсамонь прядомас лемень кундамо сазьтнень каванить кулагасо.
Теке марто, кулагась пидевиль аволь ансяк кулозень калмамо читнес. Сон истяко пидевиль сеть читненень, зярдо кудораськесь кундыль умок Тоначив туезтненьгак. Ярсыльть кулаганть чувтонь домка ярсамо вакансто ды ансяк чувтонь пенчсэ. Сехте пек вечкевиль кулагась эрзянь эйкакштнэнень.
Неень шкасто кулаганть пидсить истяконь покштитнененьгак. Теньсэ берянь арась. Кулагась теевсь эрзянь покшчинь тантей ярсамкакс.
(Ёвксонть ёвлизе Пичай ды Бажат нуцьканстэнзэ Эрюш Вежай. 2015 ие.)

 Отправлено: 04.04.15 03:01. Заголовок: Сэдь. Эрямстот ютнят..

Сэдь.
Эрямстот ютнят пандт ды ведьть,
Кить пирсить латкот, келей лейть…
Кода печтямост, а содат,
Ансяк эсь виезэть кемат…
Паро, зярдо икелеть – сэдь!!!
Теизь сонзэ ломанень кедьть,
Се сэдьганть ютамсто тонгак
Теицянстэнзэ сюконяк….

Эрюш Вежай, 2015 ие.

 Отправлено: 04.04.15 21:59. Заголовок: Мень цёмара теть эря..

Мень цёмара теть эряви?
(неень шкань эрзянь ёвкс)
Мезе те, ЦЁМАРАСЬ? Косто саевсь те эрзянь валось? Неень эрзятнестэ чурот содасызь сонзэ. Секскак течинь ёвкскесь – цёмарадо!
Эрзянь Масторсо, эрзянь велесэ, эрзянь кудосо сеедьстэ марсевить истят меревкст: - Цёмара теть! – Мень цёмара теть эряви?
Истя мерекшныльть, зярдо ломанентень алтасть «бабань пештенть», эли а содыльть мик, мейсэ мик те кольневксэнть мелензэ савтомс…
Лисни, цёмарась чачонзо ды питнензэ коряс моли «бабань пештенть ёнов? Виде-паро, те истя. Атюрь ды Вечкан эрзянь велетнесэ ульнесь вал – ЦЁМАКА. Цёмакась – те мезеньгак вишка покольне, пелькске, коната ЦЁМАВИ-поцьсеви. А вана сонсь ЦЁМАРАСЬ Вечкан ды Баева велетнесэ – орга чапакссто панезь тувонь сывель марто прякине.
Лия эрзянь велесэ ЦЁМАРАТ – те сывель марто ды товзюронь почтонь чапакс покольне марто тусто ям.
Пидемкаст цёмаратнень аволь стака, эрявкстнэ: тувонь, эли скалонь левш сывель, эли саразонь сывель, модамарьть, ванькс ведь ды паро эрзянь каштомо. Нама, сехте эрявиксэсь, паро-маштый эрзянь кудоазоравась, эсь ваньксчинзэ ды танстензэ марто.
Ваканс каямодо мейле цёмаратнень петильть чапамо велькссэ. Цёмаратне – эрзянь ярсамкась пек тантей ды пекень пештиця. Пидильть эйсэст седе сюпав кудотнесэ, кинь ульнесь сывелесткак, вельксэсткак сатышка. Витьстэ меремс, цёмаратне ульнесть сюпав ломанень ярсамкакс. Ярснильть эйстэдест чуросто. Оймсема читнестэ. Седикеле цёмарадо ярсыльть чувтонь вакансто ды покш чувтонь пенчсэ.
Минек велесэяк цёмаратне ульнесть пек тусто ямонь кондямот. Эрьва эрзянь кудосонть цёмаратнень пидильть эсесть танстьсэ ды койсэ, кинь – пек тустот, кинь – седе вецанат.
Украинасо ули ярсамка, коната эрзянь цёмаратнень ёнов моли. Украинецтнэ те ярсамкантень мерить «галушки».
Тейтернетнень, конатнень лемест ульнесть Тамара, лангсост згилямсто-пейдькшнемстэ минек велесэ эйкакштнэ раксезь лемдильть Цёмаракс: - Тамара, Тамара, пекеть эрзянь ЦЁМАРА!....
Ней содатадо, эрзят, «- Мень ЦЁМАРА тенк эряви»? «-Цёмарат тенк!»
(Ёвксонть ёвлизе Пичай ды Бажат нуцьканстэнзэ Эрюш Вежай покштяст, 2015 ие.)

 Отправлено: 18.05.15 20:51. Заголовок: Васень пиземе… Панжи..

Васень пиземе…
Панжиковонь сырне пры менельстэ,
Лембе, валдо, цитни ведьбайге,
Чамат шлясы сиянь ведьпрамосо,
Кедть аравтнек! Кундсек пиземе!
Норовавась валны сэнь веднесэ
Пижес навазь пиреть. Пургинесь
Зэрнемасо сыргозти перть пельксэнть:
- Куля, эрзят! Курок сы кизэ!
Нишкепазонь сырнесь пры менельстэ,
Тундонь кеняркс , васень пиземе!

Эрюш Вежай, 2015 ие.

 Отправлено: 02.06.15 23:34. Заголовок: Пиземе (неень шкань ..

Пиземе
(неень шкань эрзянь ёвкске)
Кизэсь сась… Учовсь! Аштемков….Эрзятне шождасто таргизь оймест. Видевкстнэ видевсть. Ракшатне якить лугава. Эрзянь велес сась нурькине шкась, зярыя таргот тикшень ледема шканть видьс, зярдо паро эрзятне аламошка оймсить кардаз ютконь тевтнеде. Ильтизь тундонть, вастызь кизэнть. Секскак «июнь» ковось эрзякс лемдязьгак АШТЕМКОВОКС (аштема+ков).
Ней улест лембе пиземеть ды сэтьме лембе чить, сестэ весе видезесь венстясы модасто лисезь принензэ Чи паентень, сонзэ лембе валдозонзо, кона максы эрьва касовксентень вий ды касома. Курок сюротне кармить каямо пряст, пирень эмежтне панжтыть ды кармить каямо марьть. Кизэсь весеменень максы ЭРЯМО… Эрямось – Инешкипазонь казнекс ашти весеменень.
Пиземе… Кизэнь пиземе… Кинень а вечкеви сон? Лембе… Ванькс… Кивчк мери ёндолнэ марто, пургинень стака зэрнема марто… Нама, эрзятне пельсть Пургинепаздонть. Ялатеке кизэнь пизементь вечкильть. Сыретне тонавтыльть эйкакштнэнь: - Ва, иля чийне штапо прясо пургине пиземень шкасто! Пургинесь чавданзат! Марят, кода зэрни?! -, ды сырявась кузиль каштом лангс каштомонь синдерьксэнть пекстамонзо, илязо ва ёндолось понго каштомонь турбаванть кудос. Лисни, эрзятне парсте содыльть оскань кондямо ёндолдо….
Арази эйкакштнэ кирдевить?! Ансяк юты пиземень чопода сэнь пелесь, а кенерить лоткамо меельце ведьбайгетне прамодо, эйкакштнэ сеск, понкс пильгень илиштнезь, теке сараз левкст чошкадевить кудыкелькстнэстэ, ды адя(!) чиеме кепе тов, косто сисем тюссо пиземечирькесь «сими» ведьте лейстэнть!
Истят, эрзянь эйкакштнэ, вечкить кизэнь пиземетнень!
ПИЗЕМЕ… Косто саевсь те тантей-мазый эрзянь кезэрень валось? Кие ней соды… Ансяк, марявить эйсэнзэ кавто валт… ПИ+СЭМЕ. Мекс? Ули эрзянь вал – СЭМЕ. Эйстэнзэ теевсь СЭМЕДЕМС валось. Неень шкатнестэ неть валтнэ чуросто марсевить… СЭМЕ валонть марто эрзянь кельсэнть улить зярыя валт: СУРСЕМЕ (сур+сэме)… Улема, истя? Паряк, улить-кармить тень коряс лияткак арсемат…
Ансяк пиземесь пизезэ!
Пизек, пизек, пиземе,
Нишкепазонь сурсеме!
Сиянь сурбунат кодак,
Ведеть весемнень явтак!

Эрюш Вежай, 2015 ие.

 Отправлено: 02.06.15 23:35. Заголовок: Пиземе валсь…. Пизе..

Пиземе валсь….

Пиземесь валсь,
Толнэтне палсть,
Васолдо пургине зэрнесь,
Пиземень шалт,
Тошкамонь валт,
Кедеть кедень лембесэнть эжсь…
Сельведень пачк,
Уцяскась чачк,
Коцт панксокс цяторсо сезевсь,
Пиземе валсь,
Толнэтне палсть.
Оймесэм эри се кизэсь…
Пиземесь валсь,
Толнэтне палсть,
Пиземень шалт,
Тошкамонь валт,
Сельведень пачк,
Уцяскась чачк…

Эрюш Вежай, 2015 ие.

 Отправлено: 16.06.15 18:36. Заголовок: Эрзянь валтнэде арсе..

Эрзянь валтнэде арсемат…
(неень шкань эрзянь ёвкске)
Эрзянь келесь арсемалувонзо (логика) коряс теезь пек вадрясто ды домкасто. Минек покштятнень превест пштиль, содамочист домкаль. Кельсэнек эрьва мелесь ёвтави шождасто ды мазыйстэ. Секскак неень шкань эрзянь кельсэнть валтнэ пек парсте ёвтавить, эрьва валось канды домка-сэрей смусть, валонть кувалма арсемась невтьсы, кода-косто теевсь эрзянь валось.
Невтемакс сайсынек вейке парсте содавикс эрзянь валонть.
ЧАРЬКОДЕМС валонть минь сеедьстэ нолдатано тевс, меремс, сон пачк кельпрясонок. Секе тев сонзэ певерьдтяно: - Чарькодить? - Чарькодят? - Чарькодеви. - Чарькодинь. - Чарькодть.
Косто саевсь, кода теевсь те пек эрявикс валось? Улема, улить келеньсодыень мельть арсемат сонзэ тееманзо кувалма. Мон ёвтаса эсь мелем, кона, нама, аволь кельсодыень мель. Ды ялатеке, улема, киненьгак превс ды саеви-маштови.
Койсэм, тевесь аштесь истя. Ульнесть ЧАРТЬ валось, ульнесь КОДАМС, КОДСЕМС валтнэ. Сынь кортамсто вейсэндясть: ЧАРТЬ+КОДСЕМС. «–ТЬ» ды «С» гайтькетне «нилевсть» кортамсто, ды неть валтнэ кармасть ёвтавомо вейсэ истя: - ЧАРЬ+КОДЕМС. Истя теевсь ЧАРЬКОДЕМС эрзянь валось.
Нама, те ансяк монь, ламос а содыця ломанень, мелем. Паро мельсэ ловноса тень коряс лия эрзятнень мелест. Инеськеть, сёрмадодо эсь меленк эрзянь валонь теевтемадо, ялгат.
Эрюш Вежай, 2015 ие.

 Отправлено: 21.08.15 21:45. Заголовок: Он (Оймеёвкс.) ..

Он
(Оймеёвкс.)

Ярсылинек. Мон, кода пачк, озадолинь покш эземсэ пазаватнень ало. Сехте вишкинелинь. Вакссом вишка патям. Стуворонть томбале кавто покш патян. Сырявам, кода пачк, каштом икельде каванясь эйсэнек. Ярсынек капста ямдо. Монень – калаця сускомо. Цёратненень паневи. Сазортнэнень товзюронь ашо кши печть. Чувтонь пенчтне ваканкатнень велькска эвтезь эвтсть…. Тантей капстаямонок!
Почаня кши сускомось качады истя тантейстэ, секень вант, келетькак нильсак….

Кият покштям , апак сода мекс, озадо ве ёно. А ярсы. Ваны лангозонок превей, сэтьме валдо сельмсэнзэ. Сыре. Лавшо. Лавтовонзо новольсть.
Апак учо кармась ловномо валморо. Кувака. Эрзянь покштядонок. Валморосонть ине мель – эрямстонк, эйкакшт, пачк кирдеде покштятнень мельспутомаст…
Автевсь кургом: - Покштяй…. Те тонсь валморонть арсик?
Покштясь: - Нама. Монсь.
- Истямо кувака… Тон, эдь, сёрмадомояк а маштат….
- Покштясь: - Превсэм арсия….
- Вай! Кодамо превей валморось….

Кирнявтынь стуворонть экшстэ! Эряви нейке путомс покштянь валморонзо конёвс… Сеск валдо икельць кудов! Тосо ванькс конёвом…. Сёрмалькам…. (Ручка….)….
Каподинь. Сеск удалць кудов! Совинь. Покштям арась…
Тарказо чаво… Эзинь кенере…

Те Тоначистэ покштям тень онстом сакшнось.
Оймесэм – чавонь ёжо….

Эрюш Вежай, 2015 ие.

 Отправлено: 22.08.15 00:17. Заголовок: ЧУВТО Чувтось сэ..

ЧУВТО
Чувтось сэреель, иевель, виевель. Рацяняль. Тензэ топодсть ветьгемень иеть. Кассь кода ульнесь мелезэ. Венстясь тарадонзо чипаентень. Эрьва тарадкесэнзэ, эрьва лопинесэнзэ кундсесь чипаень лембенть. Кизэнь перть кенерстясь сэрянзо, конатнень сёкстня певердиль начко лопасо ацазь моданть лангс.
Истямось сон ульнесь ськамозо лия ошонь чувтнэнь ютксо. Сон – тумо! Маласольть ансяк пекшинеть, укшторот, килейнеть. Пиретнесэ – мастумарть, умаринат, куракшт…
Чувтонтень шождасто лецтневи, зярдо ды кода сонзэ озавтызь кавто од ломанть. Цёрась ансяк велявтсь чипеле аштиця масторсто, косо ульнесь верь валыця торпинге. Алтась сон шабрацек эриця тейтерненень: велявты – урьваксты лангозонзо. Велявтсь, ды тейсь кода алтась. Ковонь ютазь чиявтызе тейтеренть. Ютасть чиявтома колмо читне. Одтнэ састь мельс: уцяскаст тешкстамс мазый чувтонь озавтомасо.
Кодамо чувто озавтомс? Нама, истямо, кодамо карми сынст икеле аштиця эрямось: кувакасто эриця, кеместэ модас пезныця, ламо видьмень раштыця. Кодамо чувто истя эри? Нама, те тумо! Мольсть ошкенть маласонь вирев. Муйсть од тумине. Састыне таргизь. Ускизь. Ды озавтызь кудост икелев. Валность эйсэнзэ. Ванстсть эйсэнзэ. Чувтось нолдась паро-кеме ундокст ды кармась касомо…
Чувтось неинзе сынст весе эрямост. Тарадонзо венстявсть кудост вельксэс, теке кедьсэ идесть неть паро ломантнень вармадо-бурядо, даволдо-цярахмандо….Весе парост, весе кажост ломантнень ютасть чувтонть тарадтнэнь ало. Алост чачсть-кассть эйкакштнэ. Алост ютасть кенярксчитне. Ютасть зыянчитне. Кенярксчисэяк, зыянчисэяк ломантне нежедсть чувтонтень теке кеме нежес.
Зярдо срадсть эйкакштнэ, кавто сыре ломанть тумонть ало учнесть покш ошсто инжекс сакшномаст. Зярдо тусь Тоначив авась, атясь ковгак лияв эрямо эзь туе. Мерсь: - "Монгак Тоначив туема чим учоса теске…" Сеедьстэ озадоль тумонть ало теезь эземсэнть. Ваныль ушов, ютыця ломантнень лангс, ардыця машинатнень лангс…
Чувтонь тарадтнэ пек рацяняльть. Пси читнестэ сынь максыльть ютыцятненень экшэ, пиземене алост кекшильть ломантне. Эйкакштнэ кизна понгавтнильть тарадозонзо нурямот ды нурсильть зяро ульнесть мелест.
Тумось паро мельсэ ваныль, кода ваксканзо, мейле алганзо, ветьгемень иень перть чийнильть эйкаштнэ школав ды мекев.
Тедиде тумось вансь, кода ташто школанть калавтызь ды тарказонзо стявтсть церькува. Алонзо озадо атянть превга ютась нусманя мель: - «Минек од шкасто кирдимасторсонок эрявсть содыця ломанть, секскак ошкенть куншкас сестэ стявтсть школа. Неень шкатнестэ кармасть эрявомо ансяк кемиця ломанть. Секскак школанть таркас стявтыть церькува… Кода пек полавтовсть эрямонь ды кирдимасторонь вешематне….»
Церькувань панжомсто сакшность покш прявтт. Ютасть тумонть алга. Котасост мерькизь празь лопатнень, та-кинь сэрей кочкаря котатне вадневсть летьке модынесе. Ава прявтось ёртсь лездыцянстэнзэ: - «Надо сделать тротуар к храму!»
Кавто таргонь ютазь састь бульдозерт. Ушодовсь ялгокинь теемкась. Тумось ульнесь кист лангсо. Алонзо эзементь яжизь. Чувтонть керизь. Бульдозерсэ таргизь кавто сэлень эчкесэ мукорензэ. Ялгокинть теизь. Кода сёрмадсь ошкень газетынесь: - «теезель пазонь тев»….
Теде мейле вакссонзо чувтонь кудынестэ атясь вестькак эзь лисне. Кияк эзизе некшне… Кие соды мекс….
Эрюш Вежай, 2015 ие.

 Отправлено: 13.10.15 00:44. Заголовок: ..

Цидярдт, эрзя!....
(Ёвтнема. Алтави тонавтыцянстэнь ды эрзянь ялганстэнь)

Комсеце пингень омбоце пельксэсь… Зярдо эрзянь цёрынетне велесэ прядыть кавксо класст, икелест стякшны пек пси кевкстема: - Ков седе тов? - Рузонь велев, косо ули куншкакс школа? - ПТУ-тонавтолмав(училищав)? - Эли сеск важодеме комбайнас-тракторс? Кочкамось аволь пек келей-сюпав….
Кията те кевкстеманть эстензэ валдомтызе-чарькодьстизе сисемце классонь прядомсто. Варштась эсь тешкспутомксос (дневник)… Тосо ульнесть ниле «нилеть», лиятне весе «вететь». Сась мельс – седе кеместэ нежедемс тонавтнемантень кавксоце классонть. Лиякс кодаяк. Лездыцясь эрямос ютамонтень - ансяк сонсь. Тетязо арась. Авазо чинь чоп важоди а васолонь ЖБИ-заводсо, покштязо-сырькаезэ – сыредсть, лавшот. Кемемась – ансяк эсь превс-вийс. Сась мельс – кавксо классонь прядомадо мейле туи кирдеме содамочинь варчамот (экзамент) Суворов лемсэ ушмовиень тонавтолмав (Суворовское военное училище).
Ёвтызе теде мелензэ аванстэнзэ. Тона кунсолызе. Стакасто укстась. Мерьсь: - «Прядт васня, цёрынем, кавксо класст парсте. Мейле шкась невтьсы, кода-мезе лиси…»
Весть, тундо ёнов, Кията марясь, кода покштязо кортась аванзо марто каштом лангсто удалць кудосо: - «Насько, кунсоломака… Тон пек иля кармавто тонавтнеме вишкиненть… Покштнэ срадсть… Мирдеть арась, мон теть а лездыця, сырединь… Курок сы шкась тень Тоначивгак туеме… Кадоват ськамот, мирдевтеме. Тонеть эряви лездыця. Вант, Кията, кассь-кепететьсь. Кадык сонзэ мартот эрямо. Школанть прядсы, кадык моли трактористэнь курсас. Карми важодеме теске. Урьвакстсак, карми теть сыречисэть кеме-паро нежекс…»
Кията зярыя чинь ютазь, муйсь ютко шка, ды неть мельтнень прясо кирдезь, таго ёвтызе аванстэнзэ мелензэ школань прядомадо мейле тонавтнемадо. Кеме вайгельсэ мерьсь: - «Авай, а нолдасамизь седе тов тонавтнеме, оргодян… Колхойсэ важодемась эйстэм ковгак а туи. А сайсамизь ва ушмовиень тонавтолмав, сестэ монсь велявтан ды молян трактористэнь курсас… Тонавтован ва ушмодеекскак, ялатеке сестэяк вачодо а кадтан!»
Авась ансяк пштистэ варштась Киятань сельмс-чамас, лыкавтызе тей тов прянзо… Паця песэнзэ нардынзе начкомозь сельме кочкарянзо. Чарькодсь, цёрыненть мелезэ кеме, мелявтозь мерсь: -«Левкскем, ды тонеть ансяк кеветее иеть топодстькак, ков истя капшат кудостонть-пизэстэнть ливтямо?» Кията букинекс комавтызе конянзо… Тень неезь, авазо кувакасто таргизе оймензэ ды стаксто мерьсь: - «Паро эно, левкскем, терявтт…»
Курок удало кадовсь школасто нолдамонь содамочинь варчамотне. Весе лиссь вадрясто! Тонавтнемадо прядома лопасонть ульнесь ансяк «вететь». А стяко Кията истя нежедсь тонавтнемантень. Мик «биологиянь» тонавтыцясь путсь тензэ прядома тешксэкс – «вете», куш та-мекс а вечкилизеяк Киятань….
Кията анокстынзэ-витинзе эрявикс тевконёвтнэнь, ютась медкомиссия – ды шкастонзо сыргась покш ошов, тонавтолмав. Ансяк тосо чарькодизе Кията парсте тонавтнеманть питнензэ. Сон ютась конкурсстомо-пелькстамовтомо. Варштызь школань прядомадо лопанзо, тосо – ансяк «вететь»! Истят цёрынетнеде ульнесть ансяк сисем. Нетнень марто ютавтсть кортнемат сынсь кафедрань прявттнэ. Рузонь келень кафедрань прявтось ульнесь сехте чевте седей. Сон тердинзе неть сисем цёрынетнень кафедрань нупалев. Эйсэнзэ мольсть урядамот-витнемат. Невтизе тенст покш шукш маронть, косо койметне, тенстне, канднелькатне-канднемлазтнэ: - «Вана те шукш маронь ливтинк ушов, ды тенк весененень – зачёт!»
Тунь лиякс тевтне ульнесть математикань коряс кортнематне. Те ульнесь алкуксонь содамочинь варчнема. Фёдоров полковникесь терднилизе сёрмалазонть икелев эрьванть. Эрьвантень максыль задания, конань эряволь сеск, марямга ёвтнезь, арсемс-решамс. Тень пингстэ ансяк колмо цёрынетне топавтызь те тевенть апак пупорькшне ды пес. Сынст ютксо –эрзянь цёрынесь Киятаяк. Кодамо паро мельсэ-валсо Кията лецтизе тень кис эсь алгебрань тонавтыцянзо – Василь Иванычень!
Ушмовиень тонавтолмасо тонавтнемась ливтязь ливтясь. Кавто иетне ютасть, ансяк кивчк! мерсть. Течи ютась меельце дилиньдемась. Те чись Суворов лемсэ тонавтолмань тонавтыцятненень – пек учовикс. Те чинть ютавтоманть улить эсензэ «апак мере» коензэ. Конатнень прявтнэ кардасть, ансяк сынь та-кода а пек тенст кардаво.
Васенце коесь – те конёвсто коштвенчкеть-самолётикень тейнемкась-нолднемкась. Эрьвась тейнесь ташто сёрмадставкссто (тетрадь) кемень-комсь коштвенчкеть, кекшилинзе сынст тёшак алов. Дилиндемань чистэнть, пиже валске, цёрынетне салава кузнильть тонавтолма кудонть пряс ды тосто нолднильть коштвенчкентень ошонь куншка чаво таркантень. Сындест истя ламоль, мик чавотаркась ашолгадыль… Нама, мейле тонавтыцятне сынсь тосто коштвенчкетнень пурнылизьгак, прявтнэнь меремаст коряс.
Обмоце коесь – те ротань-ротань каршо, а те – кавто сядт ломанть! пильгеоскасо налксемась. Те налксеманть лангс ваномо мик весе тонавтыцятнеяк сакшныльть ваномо. Оскась – вейке, мельганзо кавто сядт цёрынеть чийнить! Ды кодат цёрынеть, меремс уш алят, кемсисьмее весеменень топодсь… Истямо оскасо налксемась – те алкуксонь невтелма! Пек мель саи, пек мельс кунды!
Колмоце коесь ульнесь, кода меремс, седе салавань, седе кардамонь. Ды ялатеке топавтовиль. Сон ютыль седе а неявиця таркасо, суньдерьгадома ёнов. Те – мокшна варьгасо туремка, бокс. Каявиль кон: картузто таргильть конёвнэть. Кинень понги конёв панкскесь, косо сёрмадозь «Турьть!», се тури. Тень пингстэ кияк эзь вано, якить-арась тон мокшнаварьгасо турема секцияв.
Ды мезе ней!? Ды се, Киятанень понгсь самай конёв панкскесь. Кедензэяк ливезькадсть Киятань, зярдо калавтызе-сравтызе тензэ понгозь конёв панкскенть… Кията вечкиль гимнастиканть, сокссо чийнеманть, туремань секцияс мелезэ якамо арасель, эзть вечкеве та мекс неть пелькстамотне…
Каршо турицякс тензэ понгсь цёркаесь, кона якасесь мокшнасо турема секцияв. Тонавлесь боксос, ульнесть разрядонзо. Ансяк те коенть ульнесь истямо лувозо: мезескак апак вано турть сень марто, кие теть понги. Кавто турема шка юткот, эрьвась вете минутань кувалмосо.
Кононь каицясь марямга яволявтынзе те иень турицянь лемтнень. Васня се цёрыненть лемензэ. Перька пурнавозьтне увнозевсть! Парсте содылизь те мокшнасо турицянть. Мейле яволявтызь Киятань буелемнзэ… Пурнавозьтне таго шалнозевсть, цяпазевсть… Таго содыльть, кие сон…
Сеск эрьвантень макссть турема варьгат. Весе айгсть чувтонь лазонь сэдявконтень. Турицятне лиссть лангозонзо, каизь кительнест, кадовсть майкасо. Каршо турицясь пель пряс седе сэреель, кедензэ седе кувакальть. Ды те кадык… Мезде пелемка – сон ульнесь тонавтозь мокшнасо туреме. Секундантнэ явтызь турицятнень каршо ужотнева. Кармасть анокстомост, путыльть превс, кода туреме. Весе чарькодсть, кие карми изницякс, ансяк конось омбоцеде а кайсевиль вестькак. Истямоль те кеме коесь.
Кията секундантокс сайсь эсензэ ялганзо, Паолонь, кона мартонзо ульнесь вейке раськень, эрзя. Эрзятнестэ сынь весе тонавтолмасонть ансяк кавонест ульнесть. Тонавлесть аволь вейке ротасо, теке марто пачк кирдсть векень-вейкень.
Те коень туремась молиль ансяк васень верьс эли правтомас. Секскак Киятань мельс тонгозевсь вейке тёкшмель: цидярдомс! Цидярдомс весе вийсэ весе кемень минутатнень! Зярс Паол тензэ свистясь-сюлмась варьга карьксетнень, Кията арсесь, кода ветямс туреманть. Сась мельс: кирдемс куншканть, ванстомс васняяк судонть, сонзэ лавшо тарканзо… Кията цёрынесь кемель, чуморксоль, секскак пек эзь пеле рунгос вачкодькстнэде.
- Козонь вачкоемс каршо турицянть? Кедензэ кувакат, чамас а сасави. Пильгензэяк, кады човинеть, ды ялатеке седе кувакат. Машты туреме. Карми эцеме икелев. Кадык. Кадык чары перькан. Кадык вачкои. Карман идеме чамам-судом ды улом. Сави учомс, зярдо сон карми эцеме икелев ды панжомо седей пенчензэ. Карман метямо-норовамо тов, ды улозонзо… Сави учомс, сави цидярдомс…
Судиясь тердинзе турицятнень. Нонат лепштизь кедест. Вешкевкс. Пурнавозтне увнозевсть. Туремась ушодовсь.
Каршось шкань апак сацтне кувака кедьсэнзэ кармась эвтезь эвтеме! Кията кадык тень учоськак, ды ялатеке мик тандадсь теде, эзь кенере некшнеме мик, кона ёндо каршо турицянь мокшнатне вачкоесть кедезэнзэ, лавтовозонзо… Вейке кенерьсь Кията – аравтомс мокшнанзо чаманзо икеле ды кенерь пакарензэ кирдемс эсь седей пенч икеле.
Пурнавозтне увтсо увность, шалтсо шалность, вешксть... Кирдсть тона цёрынентькак, Киятаньгак. Марявсь, Кията вестькак каршо эзь вачкоеяк, ансяк идесь эсь прянзо…. Пильгензэ стакалгадсть, пилесэнзэ бийнесь верень токномась, ливезь байгетне сельме чирькетнестэ петнясть сельмс. Секень вант ва пры вачкодькстнэстэ… Ансяк сон эзь пра! Верьскак сон эзь томбавт. Аштесь, марявсь, теке тумине, сэдявксонть куншкасо. Каршось чарась-велясь перькаванзо ды яла вешнесь, кода понгомс Киятань чамас-судос. Ды те та-кода а пек лисиль сонзэ…Мокшнанзо понгонесть Киятань мокшнас-лавтовс. Ансяк кавксть-весть понгсь Киятанень чама бокава ды пиле ланга…
Таго вешкевкс. Нурькине оймсема ютко. Паол та-косто муезь начко нардамосо нардызе Киятань ливезькадозь, толсо палыця чаманзо. Тошкась пилезэнзэ: - Кирдть, цёра! Цидярдт, эрзя! Иля пра! Кирдть, эрзя!
Таго вешкема. Туремань обмоце пельксэсь. Таго каршо турицясь сеск каявсь ламо вачкодькс марто Киятань лангс. Таго Кията арась сэдявксонть куншкас. Таго каршо турицясь киштезь киштсь ды чарась-велясь Киятань перька ды кувака кедьсэнзэ нерьнесь мокшнасонзо, ансяк Кията вадрясто идесь чаманзо-улонзо ды эзь максо вачкодемс седей пенчес… Кията марясь, кода шалтонть велькска Паол эрзянь ялгазо пижнесь тензэ: - Кирдть, эрзя! – Цидярдт, эрзя!
Каршось кармась састыне сиземе, седе куватьс панжтнесь вачкоемстэ эсь седей пенчензэ. Тень редизе Кията ды зяро кадовсть виензэ вить кедьсэ варцодизе каршо турицянть… Тона мик лотказевсь перька киштемасонзо, кургозо автевсь, кавксть-колмксть кундась кургсонзо коштонть… Ансяк эзь пра… Ды таго киштезевсь Киятань перька… Ансяк вачкодьксэнзэ седе чуролгадсть ды лавшомсть.
Тесэ марявсь туремань прядома вешкемась…
Верть арасельть, празь турицят арасельть. Се туреманть койсэ лиссь : кияк ульнесь апак изня… Теде яволявтсь судиясь.
Зярыя иень ютазь, пачкодсь Киятанень куля: дилиньдемань чистэнь варьгасо туремань «ятозо», К. лейтенантось чавовсь Афгансо…
***
Эрюш Вежай. 2015 ие. Сёксь.