Отправлено: 05.05.09 17:27. Заголовок: Эрюш Вежай. Ёвтнемат, валморот.

 Отправлено: 19.04.14 09:27. Заголовок: Утю-балю… (Утякстнем..

Утю-балю… (Утякстнема морыне)
Чизэ валги,
Тештьке налки,
Утю-балю, эйдинем…
Утю-балю,
Утю-балю,
Седей нилькскем, эйкакшкем…

Оймась варма,
Опамсть шалтнэ,
Утю-балю, валдынем…
Утю-балю,
Утю-балю,
Седей нилькскем, эйкакшкем…

Чийнить-касыть,
А весть пракшныть,
Оймсек-удок, тиринем…
Утю-балю,
Утю-балю,
Седей нилькскем, эйкакшкем…

Ават вакссот,
Налкшкеть прялкссот,
Утю-балю, покольнем…
Утю-балю,
Утю-балю,
Седей нилькскем, эйкакшкем…

Онот валдот,
Кеняркст кандост,
Утю-балю, чинь пелькскем…
Утю-балю,
Утю-балю,
Седей нилькскем, эйкакшкем…

Эрюш Вежай

 Отправлено: 16.05.14 10:48. Заголовок: Иля симне ялгай, аво..

Иля симне ялгай, аволь ванькс лисьмасто

Иля симне, ялгай, а ванькс лисьмапрясто,
Иля корштне ведьте варакань лопасто,
Иля корштне ведьте варакань лопасто.

Лопа ведесь сэпей, седей сэви, кери,
Пицезь ойминесэм кисэть мелявкс эри,
Пицезь ойминесэм кисэть мелявкс эри.

Вай, цёра, цёрыне,
Од цёра, парыне…
Кодан тензэ коцтке, панар сустан, викшнян,
Кодан тензэ коцтке, панар сустан, викшнян.
Тензэ, киде содан, кинь оймесэм кирдян
Тензэ, киде содан, кинь оймесэм кирдян…

Эрюш Вежай
2014 ие, панжиков, 15 чи

 Отправлено: 16.05.14 13:40. Заголовок: http://youtu.be/EEoV..

 Отправлено: 19.05.14 18:54. Заголовок: Эпос «Масторава» - н..

Эпос «Масторава» - национальное достояние Эрзя народа.
(К 20-й годовщине издания «Масторавы» - героического эпоса Эрзя народа.)
Двадцать лет назад, в 1994 году, произошло огромное событие в истории Эрзя народа, был издан его героический эпос – «Масторава».
«Мастораву» - эпос Эрзя народа обойти молчанием уже невозможно. Великая книга Эрзя народа, впервые изданная на песенно-звучном эрзянском языке в 1994 году, разошлась по рукам эрзян, всех, кого интересует язык, культура, история, мифология нашего народа. Её сейчас читают на эрзянском (1994 год, автор - А. М. Шаронов), мокшанском (2001год, в переводе М. С. Моисеева), русском (2003 год, в авторском переводе А. М. Шаронова), венгерском языках (2010 год, в переводе Dugntsy Maria). Придет время и этот уникальный эпос будет переведен и на другие финно-угорские и основные мировые языки.
«Масторава» - это гуманитарное открытие рубежа 20-21 веков. «Масторава» - свидетельство огромного интеллектуального потенциала эрзянского народа, способного выдвигать рунопевцев мирового значения, каким проявил себя наш современник Александр Маркович Шаронов, гордость эрзянского народа.
«Масторава» представляет собой огромную ценность для каждого, кто помнит, ценит имя, историю, культуру и язык своих предков.
«Масторава», её содержание, её замечательный, высоко художественный, чистый эрзянский литературный, песенный и поэтический язык дали огромный толчок росту национального самосознания и самоуважения эрзянского народа. Национальный эпос является непреодолимым препятствием для полной «мордвинизации» и русификации Эрзя народа.
Эпос «Масторава» - это «пургине кев», гром камень, гранит (с эрз.) в фундаменте эрзянской культуры и никакие силы уже не способны разрушить его. Они только высекают искры из этой эрзянской национальной сокровищницы, искры красоты, света и знаний об истории, религии, философии, культуры и мировоззрения народа Эрзя.
Александр Маркович Шаронов (Шарононь Сандра) совершил великий национальный гражданский и творческий подвиг, создав «Мастораву» во времена, когда во весь рост встала опасность полного исчезновения Эрзя народа и эрзянского языка. За это ему эрзянская честь и слава.
Весом и велик вклад в создание «Масторавы» поэтических редакторов, известного эрзянского писателя И. А. Калинкина и изумительной эрзянской поэтэссы Р. С. Кемайкиной (Маризь Кемаль).
В редакционную коллегию входили известные писатели и специалисты И. А. Калинкин (председатель), В. П. Видманова, И. М. Девин, М. В. Дорожкин (научный редактор), Д. Т. Надькин, К. Т. Самородов (научный редактор), Л. В. Седова, Е. Я. Терешкина. Свой весомый вклад в подготовку первого варианта композиции, в подборке материалов, внесли В. В. Горбунов, Г. Я. Меркушкин, А. Д. Шуляев, научный редактор В. Я. Евсеев. Низкий поклон им от благодарных читателей.
В условиях политики проводимой государством «мордвинизации» эрзянского и мокшанского народов, эпос создавался как общий эпос двух народов, Эрзи и Мокши. Иначе бы он просто не вышел в свет.
По утверждению А. М. Шаронова, соотношение эрзянских и мокшанских материалов в тексте эпоса составляет 95% и 5%, соответственно. Наличие мокшанского компонента делает эпос «Масторава», несомненно ценным и для Мокша народа.
«Масторава» - это предмет гордости человека, чья национальность - эрзя. Эпос Эрзя народа «Масторава», как и Эрзя народ, будут жить вечно.
Эрюш Вежай
19.05.2014

 Отправлено: 09.06.14 23:03. Заголовок: СЁКСЕНЬ СЫРНЕ. ЭРЮШ ..

СЁКСЕНЬ СЫРНЕ. ЭРЮШ ВЕЖАЙ.

Вирьсэнть – кашторкст, сёксесь сась.
Тумо прясто сэря прась.
Шанжав коцтсонть цитнить байгеть,
Сэнь менельсэнть – каргонь вайгельть.
Вана ожолды килей,
Палы толсо од чевгель…
Тумось правты стака сэрят,
- Шумбрат, ялгам! Кода эрят? –
Каршо марявсь: - Ат-ат-та!! –
Кары ундо шекшата.
Лопа алдо пангт ваныть,
Вакскаст стяко мекс ютыть?
Саить кептерь? Пештьсэ пештик,
Тантей торланть кельсэть лепштик.
Сёксень чинеть… Сёксень танстть…
Седе паро чить - арасть!
Лембе, маней, валдо чись…
Модась – якшамот учи…
Вирьсэнть – кашторкст, сёксесь сась,
Сырнень палясо оршазь.

 Отправлено: 20.08.14 13:02. Заголовок: ОЛЯКСЧИ Ансяк эсь ке..

ОЛЯКСЧИ

Ансяк эсь кельсэ кортамось невти раськеть,
Ансяк эсь мельсэ эрямось вансты ойметь.

Оляксчи,
Ванстык Эрзянь Мастором.
Видексчи,
Тонеть палы штатолом.
Эрямо,
Эрзятненень лавсекс ульть.
Чипайнем,
Мастор велькска Пазокс уйть.

Кадык вельксканок пувсекшныть кежей вармат,
Ансяк сынст каршо молемстэ виеть онкстат.

Оляксчи,
Ванстык Эрзянь Мастором.
Видексчи,
Тонеть палы штатолом.
Эрямо,
Эрзятненень лавсекс ульть.
Чипайнем,
Мастор велькска Пазокс уйть.

Таго виеми, одс вельми эрзянь раськем,
Таго карми марявомо эрзянь келем.

Оляксчи,
Ванстык Эрзянь Мастором!
Видексчи,
Тонеть палы штатолом!
Эрямо,
Эрзятненень лавсекс ульть!
Чипайнем,
Мастор велькска Пазокс уйть!

Эрюш Вежай
20.08.14

 Отправлено: 24.08.14 15:31. Заголовок: Кизэ куншкань авань ..

Кизэ куншкань авань моро:

https://www.youtube.com/watch?v=P6HNOvMlIJM

 Отправлено: 11.09.14 16:57. Заголовок: Велявт…. Сёксь, экше..

Велявт….

Сёксь, экше,
Таго симан чайде,
Коз, сэредькс,
Пиземев пельть ды мельть.
Байгетне чамазом прыть,
Омем, седеем начтыть..
Петь-петь, петь-петь,
Пиземеть поцерьдить.
Петь-петь..,петь-петь…
Начко менелесь кольги,
Петь-петь..,петь-петь…
Эрямось, сон нармунень ки…
Велявт… Велявт…
Таго тикшес эйсэм правт,
Велявт… Велявт…
Таго, кизэ, велявт….
Петь-петь, петь-петь…
Поцердить начко пельть.
Петь- петь… Петь-петь…
Оймесэм сёксень мельть…
Велявт… Велявт…
Таго тикшес эйсэм правт,
Велявт… Велявт…
Кизэ, вешан, велявт….

Эрюш Вежай.
Таштамков, 11 чи. 2014 ие.

 Отправлено: 14.09.14 13:03. Заголовок: Из мордовской жизни…..

Из мордовской жизни… Мордовский шлагбаум.
(Юмористическая пьеса из будущего.)
Для цензуры: Все описанное является художественным вымыслом. Вы видите текст на языке ЕМЯ(?)(единый мордовский язык), который в 2015 году был разработан для уничтожения Эрзя и Мокша языков)


Мордовский занавес открывается.
(Действие первое. Мордовское.)

Стоит большой мордовский дом. На нём вывеска: «2044 год. 66 – й съезд мордовского народа». Перед домом мордовский шлагбаум. Полосатый, как палочка гаишника. Только очень длинный… Длинный-предлинный…. Непреодолимый.
Шлагбаумом управляет мордвин М. Парков, руководитель Мордовского Движения. Он важный, добрый и представительный. С мордовским, но умным выражением лица.
Помогают ему мордовцы и мокшэрзи. Невзрачные. Но упитанные, жизнью и этой политической деятельностью весьма довольные.
В мордовский дом идут люди. М. Парков проверяет мордовские мандаты.
Пропускают только мордвов и мокшерзей.
- Ты кто?
- Мордовец я….
- Проходи!
- Ты кто?
- Мордвин, сказали…
- Проходи…
- Ты кто?
- Эрзя…
- Стоп! Кто?!!! Забыл, как тебя на переписи записали?!
- Ой, простите, я не эрзя, я мокшэрзя… или мордвин…
- То-то…, проходи. Но не забывай про приставку «мокш»!, Ты мордвин, или хотя бы мокшэрзя! Запомни! Ещё раз ошибёшься – не пропустим…
И люди с радостно просветлённым мордовским выражением лица проходят за полосатый шлагбаум. Их ждёт мордовский президиум мордовского съезда… мордовский шлагбаум. Их ждёт мордовский президиум мордовского съезда!!! А как же, ведь они на съезде будут голосовать! За 1500-летие единения мордовцев с народами Приморья, Чукотки, Крыма, Приднестровья, Новороссии. За великий и могучий ЕМЯсский язык, за то, чтобы на ближайшей переписи был торжественно зарегистрирован полуторамиллонный мордовец, а тираж единой и главной мордовской газеты "Мордовскяй правда" достиг мирового рекорда - 150 экземпляров, а передача единого мордовского радио длилась бы целых 15 минут в месяц и была слышна аж в километре от радиостанции... А в кинотеатрах мордовской столицы чтобы каждый день шёл фильм с великим мордовским актёром Депардье, нигде в мире(!) ему нельзя было уклониться от налогов, кроме как в стране Мордвов!

(Действие второе. Мордовское. Но с участием Эрзи.)

Подходит к мордовскому шлагбауму Эрзя. Под эрзянским флагом. Его спрашивают:
- Ты кто?!.
Эрзя гордо отвечает:
- Я – Эрзя!
М. Парков ласково улыбается, советуется с помощниками. Помощники:
- Нет, не знаем такого… Этот не наш… – Не наш! Нет такого народа!
М. Парков Эрзе:
- Нет такого народа! Ступай вон!!!
Эрзя отвечает:
- Есть такой народ! Вот я стою перед вами – Эрзя! Прошу пропустить меня на ваш съезд. Пусть ваша мордва увидит и услышит хоть одного Эрзю и эрзянский язык!

М. Парков советуется о чём-то с помощниками.
- Эрзя?!! Чего тебе здесь надо? Ступай вон! Съезд у нас – мордовский!!! И проходит он на ЕМЯсском языке…
М.Парков тут видит приближающуюся радостно возбуждённую толпу с лозунгом «Мы – русская мордва с сформированной русской идентичностью!!!!». Нахмурившиеся было брови М. Паркова разъезжаются, он радостно приветствует приближающуюся толпу людей с этой идентичностью.

С хитроватым выражением М. Парков вновь поворачивается к Эрзе:
- Или, постой-ка … Откажись от имени Эрзя и эрзянского языка, назовись «мордвой» или «мокшэрзей» и попросись во-он в их делегацию, тогда и пропустим…

Эрзя:
- Нет! Я не хочу называться «мордвой» или «мокшэрзей». Я - Эрзя! Так звали моих предков, так зовут меня, моих детей, моих внуков. У меня есть мой эрзянский язык, культура. Я хочу быть равноправным представителем Эрзя народа среди равноправных представителей других народов!

М. Парков, посоветовавшись с помощниками:
- И чего ты, как всегда, некстати притащился?...Мы считаем, что тебя, Эрзя, нет. И твоего Эрзя народа нет! Это – мордовское научное мнение и решение нашего мордовского движения и того, кто им руководит. Ступай вон!

Действие третье.

Полосатый мордовский шлагбаум опускается перед носом Эрзи.
Эрзя стоит задумавшись…
И ещё выше поднимает эрзянский флаг!
На лице у мордовца М.Паркова новое мордовское выражение, которое нельзя назвать добрым….

Занавес закрывается.
Зрители в зале (не мордовцы) встают с мест и радостно аплодируют. Раздаются возгласы:
- Эрзя! – Эрзя!!! Эрзя!!! Эрязо Эрзя раськесь! Эрязо Эрзянь Масторось! Ванстсынек Эрзя раськенть!
В зале много маленьких эрзянских флажков… Красиво и радостно! Эрзя народ жив и будет жить!


Эрюшонь Бажат .
13.09.2044

 Отправлено: 29.09.14 14:50. Заголовок: Лецтясынек эрзянь ке..

Лецтясынек эрзянь кезэрень валтнэнь….
Кузьма Абрамов, ине эрзянь сёрмадеесь, «Пургаз» эрямпингень ёвтамосонзо (эрямпингень ёвтамо=роман) невтсь ламо эрзянь ломанть, конат эрясть сестэ, зярдо Эрзянь Масторось эрясь кидеяк а аштиця Масторокс, сестэ Эрзянь Масторось ульнесь эсь мельсэ эриця Эрзя раськень Масторокс. Сестэ эрзятне эрясть эсь койсэ, кемсть эрзянь Инешкипазонтень, эрзятнень ульнесь эсь Инязорост, эрзятнень ульнесть эсест, эрзянь, лемест: Пургаз, Обран, Вежава, Изяр, Ушмай, Промза, Помраз, Кочемас, Веденей, Кошай, Мазава, Паркай, Тремас, Ордат, Чукал…. Кортастькак, содама, аволь шабра раськень кельсэ.
Сась рузонь шкась Эрзянь Масторс. Вийсэ, маньчемасо, рамамосо кармасть полавтовомо эрзянь инязортнэ, пазнэнь кемемась, эрзянь койтне, эрзянь келесь, эрзянь лемтне… Сась Эрзя раськень рузыявтома стака шкась…
Ней чуродо чуросто марясак эрзянь велетнесэ эрзянь кельсэ эрзянь эйкакштнэнь чоледемаст. Ансяк рузокс… Од ломантне а кортыть эрзякс…. Сыре ломантне лоткасть тонавтомо эсь эйкакшост, нуцькаст эрзянь кельс… Раськенек айгсь ды шашты-нолашты ёмамонь калмос….
Ялатеке нейгак вастневить чуросто од эрзянь ломанть, конат бажить ванстомонзо минек Эрзя раськенек. Сынь вешнить, арсить, кода идемс Эрзя раськенть.
Тенень лезды аламодо Интернетэсь. Ули тосо истямо вастнема-кортнема куро: Эрзяне(Erzian)объединяемся! Эрзят,вейсэ виевтяно!
Тосо вейке эрзянь тейтерь кевкстьсь: - «Спрашивают, что означает имя Пумрас? Я не знаю. Может кто-нибудь знающий подскажет?
Кортамось поладовсь истя:

- Кузьма Абрамовонь "Пургаз" романсонзо ули лем ПОМРАЗ.= ПУМРАС? Аволь весе эрзянь лемтнень ванстовсь те шкас васень смустест-зэмест. Секскак, койсэм, стака чарькодемс, мезе ашти Помраз=Пумрас цёра лементь ало.

- Муия! H. Paasonen t.III s.1844: pumra+az= (звездообразная круглая вышивка на груди рубашки руци)+аз(окончание существительных одушевлённых). Пумра=pobrä=повпря=пов+пря.

- Ого! Круто! Огромное Вам спасибо! Интересно, Паасонен есть в открытом доступе в интернете?

- Те ульнесь а стака, ялгинекай! Койсэм, арась... Мон а содан теде, Эзинь марсе. Улема, кияк соды...
Пароль содамс, кодамо ульнесь те чаркс (круглый), тештень кондямо викшневксэсь? Кодамо сонзэ ВАСЕНЬ смустезэ-зэмезэ? ЧИПАЗОНЬ ТЕШКС? Инязоронь тешкс? Валдо ломанень тешкс? Содавикс ломанень тешкс? Прявтонь тешкс?

-Мекс тонь сась мелеть содамс те ПУМРАС=ПОМРАЗ валдонть? Мейсь те содамось тонеть эрявсь?


Вана истямо аволь кувака кортамось лиссь… Ды прядовсь….Нурькине. Прядовсь курок….
Ансяк мон ловныять сонзэ таго ды таго ды прынь мельс: - Паро кортамось лиссь! Зярс улить эрзянь од ломанть, конат бажить содамо эсь тиринь ЭРЗЯНЬ КЕЛЕНТЬ, конат бажить содамост кезэрень эрзянь валтнэнь смустест-зэмест…
Лисни, эрзянь келесь карми эрямо.

Эрюш Вежай,
2014 ие, таштамков, 29 чи.

 Отправлено: 29.09.14 14:52. Заголовок: Эрзянь келенть виезэ..

Эрзянь келенть виезэ...
Эрзянь келесь пек сюпав ды виев. Кода мазыйстэ , гайтевстэ гайгить валонзо: - ЦЁКОВ, ЛЁМЗЁР, ТЕЙТЕРЬ, МЕНЕЛЬ, ТУНДО, ТЕЛЕ, ТЕШТЕ….. Ёвтынкая неть эрзянь валтнэнь марямга! Ды мейле тынсь кунсолодо, кода мазыйстэ, налказь, сынь куватень куватсь гайгить пилесэнк…. Теке эрзянь ГОРНИПОВНЭТЬ… БАЯГИНЕТЬ….
Мордватне терявтыть сонзэ лемдямонзо аволь ЭРЗЯНЬ КЕЛЕКС. Эрзянь келенть таркас арсить тееме тенек ЕМЯ(единый мордовский язык). Кодат ансяк «мордовской учёной» валт тензэ а путнить, ЭРЗЯНЬ КЕЛЕКС а лемдямонзо кис…. Сон, келя, ансяк «диалект мордовского языка», «мордовское наречие», «мордовский язык», «суржик» ды седе тов…. А ванстыть сонзэ, тапить эрьва кодамо лия валсо, алкиньгавтыть сонзэ ине сэрензэ ды питнензэ Эрзя раськенть туртов… Совавтыть эзэнзэ ламо рузонь валт, конатнень марто алкукс лиси «мордовской языксэ» кортамо: -«Вопросось, конечно, очень интересной…»
Ды ялатеке минек келесь тенст кодаяк а изняви. Тень невти вадрясто се, кода эрзянь келесь теи эрзянсекс лия кельстэ совавтозь валтнэнь.
Невтемакс. Койсэм, кавто-колмо пингеть ютасть, зярдо, лия раськень кемемас совавтомсто (РПЦ), совась Иван цёра лемесь. Неть пингетнень ютамсто ИВАН валось ламонь кирда полавтовсь эрзянь валонь парцунсо. Вана неть сонзэ эрзянь парцунонзо, конат гайгить эрзянь мерема-кортамо койсэ:
- Ивай, Ивуж, Ива, Ивака, Ванё, Ванчо, Вантяй, Ванькур, Ванюк…
Ды рузонь церькувань лемтненень эрзянь гайгема койс полавтомасткак невти, кодамо виев эрзянь келенек: Кирько, Олда, Федай, Андю, Огра, Варка, Насько, Тюма, Дрига, Элен, Паол, Олёш, Борё, Серьгу…
Сюпав ды виев ЭРЗЯНЬ КЕЛЕНЕК! Пингеде пингес эрязо ды гайгезэ….
Эрюш Вежай.
2014 ие, таштамков, 29 чи.

 Отправлено: 09.10.14 12:14. Заголовок: Телесь сы! Васень л..

Телесь сы!

Васень ловнэсь пандо прятнень
Ашо почтсо почоды,
Пани пельтнень кельме вармась,
Штапо виресь чополды…
Якшаматясь сляникаванть
Эень мазый коцт коды,
Курок телесь карми азоркс.
Течи эзь са?! Сы ванды!

Эрюш Вежай
10.10.14

 Отправлено: 03.11.14 13:20. Заголовок: Урнэ. Урнэ, урнэ, шу..

Урнэ.
Урнэ, урнэ, чулят пурны,
Чувто прясо пешть чулгси.
Морот морси, кишти, налкси,
Телес пизэ аноксты.
Вирень ялга! Ульть тень ялгакс,
Карман мартот налксеме,
Нармушкинекс мельга-мельцек
Чувто прява пансеме.

Эрюш Вежай.
03.11.14.

 Отправлено: 25.11.14 23:44. Заголовок: ..

ЭРЗЯНЬ КАШТОМО

Мон а чарькодян сеть ломантнень, конат лемдить сонзэ «русская печка». Ванкшнынь кинигасто, вешнынь Интернетстэ… Те каштомось ульнесь ансяк сеть таркатнева, косо эрясть рузыявтомадо икеле ансяк эрзят. Секскак лован сонзэ ансяк эрзянь каштомокс. Сонензэ истя ванькс эрзякс меремка – каштомо, каштом, лиякс – уштома. Рузыязь эрзянь велесэ тензэ мерильть «пецька».
Сондензэ лецтни Кията эрзянь цёрынесь….
Каштомось – эрзянь кудо юртонть, эрзянь кудонть – куншказо. Каштомовтомо эрзянь кудось аволь кудояк, ансяк утом, утомо, «удомс» валстонть.
А стяко эрзятне кемильть Каштомавас. А стяко эрзятне тешкстнильть Од толонь Чинтькак. Каштомось – Толонь кудо. Ули эрзянь кудосонть Тол – карми эрзятненень лембеяк, тол валдояк, шумбра кшияк, шумбрачияк. Толось эриль Каштомсо. Секскак те шкас эрзятне кортыть: -« Толонть пувик…. - Толонть мадстик… Толонть совавтык…. Толонть ливтик….» Каштом толсто кирвазтнильть чевкст, зярдо арасель уськевиень тол. Каштом толсто кирвазтнильть штатолт….
Каштомонь ванстыцясь эрзянь кудотнесэ ульнесь эрзянь авась, кодо азоравась. Сон вансь каштомсо толонть мельга. Ванстсь сонзэ. Вень перть а весть стякшныль варчамонзо, улить-арасть кулов потсо ченгиця тонолнэть, иляст маде пиже валскес, зярдо сыре авась стиль каштомонь уштомо.
Эрзянь кудотнесэ сон, каштомось, аштиль азоравакс. Сонзэ путнильть удалць кудосо, совамо кенкшстэнть, кодак соват, керш ёно. Ваныль икелев, ушов ваныця вальматнес. Те а стяко. Вальматнестэ прыль валдось, секскак парсте неявильть томба лангоськак, вишкеземеськак.
Теезель калязь якстере кирьпецьстэ ды ашо сёвонь ведьсэ ашолгавтозь. Вить ёнксканзо аравтозь келей чалгамо, кона лездыль куземе каштом лангов. Чалгамонть велькска – 3-4 каштом варинеть-печуркат, косо костильть варьгат. Кодак соват, каясыть начко варьгатнень, ды сеск сынст чошк! тонгсыть лембе каштомварятнес. Сынь тосо курокке коськить!
Каштом лангось! Те эрзянь кудосонть пародо паро, лембеде лембе, ёндо ён тарка! Седе пек тельня. Кельмат, начкат, тарькс стардтанзат… Соват кудос, каясыть оршамкат, варьгатнень тонгсыть каштом варинетнес, ды сеск, ёрокс, кузят каштом лангс… Кодамо лембе тосо! Ацазь кодамояк тёшак, кенде, эли ревень кедь, весе вельтязь ванькс вельтявкссо. Тонгсыть кельме кедь лапушкат подонть видьс – ды сек лембесь юты верь сангат ды эждясынзе кедеть-пильгеть, весе рунгот…
Турбанть томбальде, каштом кургостонть тантейстэ качады капста эли сараз ямсо, шумбра кшисэ… Тосто маряви сыряванть котьмамонзо гайтькеть: - Клянцьк-клянцьк… Тыж… Жоль…. Плеськ… Кальцьк…
Ёвкс! Аволь эрямояк! Ансяк ламо иень ютазь чарькодьсак се ине паронть, конань эсь а неявикс тевсэст казильть тенек сыряванок-покштянок, конань алкуксонь лемезэ – эрзянь ломанень уцяска….
Сундергадомас Киятанень эряви керямс пенгть каштомонь уштомас. Кото-сисем иестэ саезь те тевесь ульнесь эрзянь цёрынень. Пенге тарадтнэ ульнесть удалць ортатнень томбале, вельтязельть-валязельть ловсо, ульнесть ловшушмо потсо. Пенге оровтонть икелель эчке мукорь. Эряви керямс оровт пенгть, костёрсто саемс ором лазнозь пенгеде ды кандомс сынст кудос, каштом икелев. Начко пенгтнень Федай сырявазо путылинзе чокшнэ каштомос, вень перть сынь лембе каштомосонть седе парсте коськильть, валске, уштомсто, сынь седе парсте сыремить.
Чокшнэ ланга каштом лангсо пурнавилть сырькаенть карязонзо удало весе нуцькатне. Пельсчоподасонть сырявась ёвтниль эрзянь ёвкст: ёжов ривезькадо, пеляза нумолкайде, тюрьган атякшто, инязоронь тейтерьде ды цёрадо… А редяткак, кода удомась сайттянзат-вельтятанзат ды конявтсынзе сизезь сельме кереть… Каштом лангсонть кодамояк пелема а сайттянзат. Пек паро кекшема таркась. Сырькаесь мерекшныль, келя, сонсь идемевсесь-шайтяноськак паро эйкакшонь каштом лангсто а мусы….
Секскак, зярдо телень чокшнэтнестэ покштнэ ковгак тукшныльть, ды кудось чамокшныль, ды мик марявсть, кода та-косо вишка чувто лазксо цирьнильть кудо цирькунтнэ, Кията пачк кузиль каштом лангс, ды ансяк шкань-шкань варштныль чопода вальматнес, конатнесэ липниль керасинэнь лампа толнэсь…. Та-кие Киятанень мериксэль, келя, те сляникасонть аволь толнэтькак мик липнить, те келя, сонсь идемевсенть якстере сельмензэ вень чоподанть пачк неявить. Ды ялатеке, идемевсесь каштом лангс а совави, сонсь Каштомавась кашомонть идемевсте ваны. Секскак Кията каштомонть лангсто эзь валгонеяк мики покштнэнь кудос совамозост…
Валске каштом икеле пивтьсь-эвтьсь Федай сырявсь. Ансяк мезезэ сонзэ каштом икеле арасель… Кичкере, чентязь, коцькерьганось, конань эйстэ та-мек пелильть каткаськак, Киятаяк… Капочувт-ухватт, песчувт, чугунт, вакант, левштапот… Каштомонь кедьёнкстнэ кирдевильть каштомонть ало каськасо, косо эрясь каткаськак… Улема, лембе тензэ тосо ульнесь.
Чопода томба лангсонть, каштомонь кургосонть, учость эсь шкаст каштомс путомадо икеле ямт, кашат, саразтнэнень – вишка модамарьть. Курок ва каштомось яви уштомадо мейле, ды те карми весе пидевеме-паневеме…
Нама, сехте паро читне улнесть сеть, зярдо сырявась паниль кшеть ды пачалксеть. Кода тантейстэ качадыть ансяк панезь пачалксетне! Сырявась васня ваднилизе пачалгонть потмо ойсэ, мейле толгасо вадяштылизе скал ойсэ ды мейле покш пенчсэ каиль пачалгонтень пачалксе вецана чапаксонть…. Пачалксетнень пансь кавто пачалго лангсо. Вейкенть аноксты, омбоцесь – каштомсо. Истя кавксть седе курок пачалксетне паневить. Ды сеск сынст стуворонть лангс, косо вакансо – велькс ды симемвакансо – паро ловсо…Навасак пси пачалксенть ламбамо вельксэс, ды сеск кргозот! Тансть! Расть! Келетькак ва нильсак!....
Вана истямо покшто покш питнезэ эрзянь каштомонть ульнесь эрьва эрзянь кудосонть. Сюконямот теть, эрзянь каштомо!
Эрюш Вежай
25.11.2014. Полярной ош.

 Отправлено: 26.11.14 22:31. Заголовок: http://f5.s.qip.ru/Z..

Эрзянь цёрань пряспутомка.

Кувать вешнынь, кодат ульнесть эрзянь цёратнень пряспутомкатне? Косояк сынь тень эзть вастовкшно. Эрзянь аваньсетнеде минь парсте содатано. Сынь парсте ванстовсть. Неень шкатнестэяк аватне эйсэст тейнить ды кандтнить.
А вана кодамо ульнесь эрзянь цёрансесь, эрзянь цёрань пряспутомкась Теде а сёрмадовкст, а лецтнемат, а ванмот-фотот… Теке арасельтькак сынь. Теке марто, сынь ульнесть. Кода сынстемест минек аволь пек лембе Эрзянь Масторсонок? Нама, сынь ульнесть!
Ансяк кодат сынь ульнесть? Кодамо неявксост-парцуност сынст ульнесь? Койсэм, сынь ульнесть телень, ульнесть сёксень-тундонь (экше шкань), ульнесть кизэнь. Теленсетне, нама, ульнесть понав кедень, лембеть. К.Абрамов «Пургаз» кезэрень пингеде ёвтамосонзо сёрмадсь кендень чапкадо. Теке марто, кодат сынь ульнесть, седе кияк зярс эзь сёрмале.
Койсэм, сынь ульнесть кодаткак лият лия раськенсетнень коряс, ульнесть аволь истят, кодат ульнесть шабра раськетнень, аволь истят, кодат ульнесть печказтнэнь, ветькетнень, мокшотнень, рузтнэнь. Мекс истя арсян? Вана мекс: эрзянь весе оршамотне пек явить неть раськетнень оршамотнестэ. Секскак, койсэм, явсть эйстэст эрзянь цёрань пряспутомкатнеяк.
Нама, телень пряспутокасонть эрявить пилеть. Кодат сынь ульнесть? Кувакат? Нурькинеть? Теинеть? Келейть? Кие соды… Ульнесь-арась коняксост (козырёк)? Ульнесть-аврасть пиле ведьмест? Эли путовильть повнэс, сюлгамос?
Кодат ульнесть кендень пряспутомкатне? Вейке кенде панкссто теезельть? Эли зярыясто? Ульнесть сынь конякс марто, эли конякстомо? Ульнесть лапштанят, эли сэрейть? Кие соды?
Мезе путнесть прязост эрзятне кизна, пси шкане, сестэ, зярдо эзь са тенст фабрикасо сустазь картузось?
Ульнесть-арасть умонь шкане кедьсэ кодазь пряспутомкат, истят, кодат ней кандтнить од ломантне? Койсэм, эрзянь аватне пек кедьсуров кодыцят ульнесть. Сестэ мезе, вейкеяк эрзянь сырявинень пряс эзь сакшно мелесь кодамс мирденстэнзэ, цёранстэнзэ, эйденстэнзэ кодазь пряспутомка? Койсэм, истяткак ульнесть.
Пшкадян неень шкань эрзянь аватненень: - Ават, кияк кодадо тень кодазь пряспутомка эрзянь тешкс марто! Питнензэяк пандса, кандтнемензэяк паро мельсэ карман. Ней, витькстан, кандтнян истямо пряспутомка омбомасторонь тешкске марто. Кодам опок мельсэ кандлевлинь пряспутомка эрзянь тешкс марто! Кие кунды тень кодамо эрзянь пряспутомка эрзянь тешкс марто, ёвтан, покшолмазо улевель 55-це.
Вай, ков мелем оргодсть…
Таго поладса кортамонть эрзянь цёрань пряспутомкадо. Окойники Алёшин Паол И-вальмастонзо неинь ташто ванмо (фото). 20-це пингень ушодксто. Тосо невтезель цёра эрзянь пряспутокасо. Нама, аволь пек кезэрень, ялатеке, тосо парсте неяви парцунозо (форма). Неяви, сон эли кендень, эли эчке коцтонь. Сустазь. Пилензэ аволь кувакат, кавтос апак явто. Неяви, сон – телень. Ялатеке, неяви, сонзэ экше шкастояк кандтнильть. Ломантне – тарваз марто. Лисни, те нуема шка. Шкась аволь якшамонь, нама. Ялатеке, лисни, уцильтькак паксясо те шкастонть, секскак суманест-чапкаст мартост паксяв сайнильть.
Паро улевель, кияк кундаволь одс тейнеме-сустамо эрзянь цёрань пряспутомкатнень. Кеман, ламот рамавольть. Каднемакскак, лецтнемакскак…
Эрюш Вежай
26.11.2014

 Отправлено: 14.12.14 20:00. Заголовок: ПАЛАМО Кизэнь ку..

ПАЛАМО

Кизэнь куншка. Медьковонь пе. Кодамо паро мелеть, зярдо те шкастонть, кизэнь куншкане, сат васолдо тиринь ошкезэть, тиринь кудозот, кувака тонавтома иеденть мейле… Ушосонть лембе-паро, эрьва мезесь кецни эрямонтень…
Удало кадовсть лекциятне, семинартнэ, практикась, нарядтнэ… Удало кадовсь колмоце тонавтома иесь! Удало кадовсь ковонь пель марто иневедьга укшномась, конаньсэ прядовсь колмоце иень тонавтнемась. Иневедьга укшномань содамчись-навигациясь ней теть теевсь содавиксэкс… Кода эно, Европа модамастор пертька укшномась а стяко ютась. Штурманонь вахтатне ульнесть чинь трокст… Те вахтасонть саят пеленгть-невтьналт тешттнень лангс, маяктнэнь лангс, валгиця-кепетиця ковонть ды чинть лангс… Ней парсте содат, мезе те истямось: крюйс-пеленг, обсервация, обсервциянь тарка…. Лексят иневедень шожда-ванькс коштсонть, ванкшнат певтеме кевериця, лымбиця сэнь-пиже иневеденть лангс… Вахтадо мейле празь прат кубриксэ-венчнупальсэ эсь коникеть лангс ды сеск матедеват, ваязь ваят домка, од ломанень онс… Ушмовенчень баягатнень дирьнемась, маряви, сеск пувтаттдызь, теке эзить удояк… Неть шкатнестэ потмо мелеть вейкине – зярдо те весе прядови ды, окойники, нолдатадызь омсемковс, кудов… кудов…
Неть мельтнень превсэнзэ тапарязь, Кията, кевейксэе иесэ цёра, весе мештьсэнзэ лекстизе вагононь панжадо кенкшстэнть лембе, кизэнь, тиринь ёнксонь коштонть, сюконясь вагононь ветиентень, ды седеень киторкс марто чалгась тиринь ошкенть моданть лангс. Сон кудосо! Икелепеле ней – оймсема ков…
Вайгельпешка ютась чугункань кинть кувалма, пурдась витев, эсь куринканть ёнов, ды вана кардазонь ортынетне, чикор-лакор сынь тейсть ды сон кустимпесэ, кудыкельсэ (синьдерьксэсь секе!), кудосо: авазо ансяк «- Вайк!» тейсь ды кутмордызе Киятань кирьганзо… Киятанень марявсь, авазо вишкиньгадсть та-кода, кедьсэнзэ кутмордызе аванть рунгинезэ, кона лавшинестэ сорнось ниреждемадо… Учовсь тензэ цёразо!
Ютасть колмо чить. Авась каванясь цёранзо мейсэ маштсь, кудонь ярсамкатнесэ. Тензэ пачк марявсь, цёразо сакшны тонавтнемасто берякадозь… Аватне пачк истя эсь цёраст неить куватень а неемадост.
Кията кундась кудоютконь тевс. Пире пирявксось витнемка, мацт курго лангось веши кедть, кудо прянь латось артомка…. Кодамо мазычи неят, зярдо кудо прясто, артомсто, ванат перть пельга! Умарь пиреть, кальть, умаринат, латот ды кудопрят… Теке менельга ливтят нармунекс, тонськак пельтнень ютксоят…
Таргось ютась, сельмсэнзэяк цёрась эзь кенере кончтамо. Ялганзо содавтомосткак шказо эзь сатно. Тошнакадсь кудо ютконь тевтнень кисэ. Сындест таштавсть иень перть сатышка. Ялгатнеяк те киззэстэнть весе срадозельть кие кува. Кона практикасо, конань сессиязо те шкас эзь прядово.
Окойники Киятань кудосо улемадонть оймезэ та-кода витевсь, седей кенярксось оймась, кона-кона тевтне топавтовсть. Шлямочистэ пурнась молеме кинов, РДК-в. Арсесь тосо вастовомс кияк марто, кинь марто вейсэ тонавлесь школасо. Иневедьломанень форманзо эзизе орша. Сон кизэнь, ашо голландка (венчломанень ланга панар) марто, пек ва карми сельмс кайсевеме буе ошкень ульцятнесэ-куринкатнесэ. Нама, мелезэ ульнесь эсь прянзо формасояк невтемс, теке марто эзь орша истя. Мусь мелянь панарнэ, чопода понкст.
Кинос совамодо икеле малавикс ялгатнеде киньгак эзинзе нее. Ансяк васол ялгат. Сынь ёвтасть, келя, Числав ялгазо – шабра велесэ педпрактикасо, Ёвга – кудовачкамонь практикасо лия ошкесэ. Келя, курок сыть. Паро эно.
Кинодонть мейле, коната мелезэнзэ эзь туе, Кията лиссь ванома нупальстэнть меельцетнень ютксо. Капшамс тензэ а ков. Колмо тейтерень вакска ютамсто тензэ марявсь: - Кията! Тон? – Кията аламодо абунгадозь варштась вайгеленть ёнов. Суньдерьсэнть пачк неизе Виянань, шабра куринкасо эриця тейтерненть. Киятань сельмезэнзэ каявсь: - Вай, кода тейтернесь кайсь!-, секскак эзь содавояк тензэ сеск.
Тейтересь таго: - Мекс а шумбракстнят мартонок?
Кията лоткась тейтертнень каршо, конат муст-муст пеедькшнезь эсь ютковаст, мизолдозь ванкшность цёранть лангс. Неть тейтерень варштавкстнэде аламодо визделгадозь, Кията, виздеманзо кекшезь, мерсь: - Нама, мон! Кие эно? Шумбрачи, тенк, тейтерть! Эзить содаво тень, Вияна. Нолдык чумом…
Тейтересь каршо: - Маринь, тон таргошка, кода сыть кудов. Мекс прят косояк а невтнят? Мекс ськамот? Оно зяро тейтерть ськамост якить…, - ды невтьсь ялганзо лангс.
Паро ульнесть чопода сундерькст, Киятань чамванзо ютасть якстертьгадомат, улема тейтертне а несыть сынст… Прянь виздемадо апак невтне, Кията теке тёхмадсь валтнэнь кирьга парьстэнзэ:
- Кудоютконь тевть топавтынь, аютко тень ульнесь, ды ялгамгак зярс кияк арась, секскак ськамон… Тейтертне таго пейдезевсть. Мезе лия меремс, Кията эзь сода. Мекс истямо виздема саизе? Вай… А ён та-кода…
Сон содась, Вияна Числав ялганзо - седей ялга. Маны, Числав васня теде сёрмадсь сёрмасо, мейле, телень каникулатнестэ, содавтызе вечкень тейтерензэ марто. Виянанень сестэ ульнесь ансяк кеветее, ды Киятанень сон неявсь тунь вишка тейтернекс. –«Кода вадрялгадсь-мазылгадсь тейтересь!»...кивчкась Киятань пряванзо ды сон сеск терявтсь ёртомонзо те виськсэв меленть… - «Ней тензэ кемсисьмее….»
Тень пингстэ Вияна простясь лия тейтертнень марто, конат кедьте-кедьс, та-мезде карадо каршо пеедькшнезь, ношкстасть ве ёнов, сынь эрясть ошкенть лия ёно.
- Тон ков? - Кудов?-, кевкстизе Вияна Киятань.
Вай, вайгелезэяк тейтерень та-кода, марявсь Киятанень, полавтовсь. Сон чевте, домка, токи седейс… Кията тунь талакадсь… Кода истя? А ён кортнемс кувать ялгань тейтерень марто… Ков тееват, эряви каршо мезеяк меремс: - Кудов…
- Адя вейсэ. Мон аламодо пелян ськамом чоподаванть молеме, - поладсь тейтересь.
Ков тееват истят тевтнесэ? Ковгак… Понгить цёра….
- Адя…, - соркстазь вайгельсэ мерезевсь Кията.
Вайгельпень турошка кись ютавсь, марявсь, та-мекс пек курок. Мезде а мезде кортнемат, кевкснемат:
- Косо Числав? – Практикасо.
– Курок сы? – Курок…
- Кода тонавтнемась? – Вадрясто.
– Косо истя киськеть пись чинть ало? – Модакуншкань иневедь куншкасо…
- Оно косо! – Мезть тосо тейниде? – Штурманонь практика ульнесь…..
Вана Киятань кудокуринкаськак. Сон пачкодсь. Лоткасть. Виянанень молемка седе тов, шабра куринкав. Кията теке пупордясь. Оймень кундазь: - Ильтямат кудот видьс?-, тейтереськак та-кода а чарькодевикс талномань пачк, састо: - Ильтямак….Нама…
Кинь киртямга ютасть шабра пирень трокст. Пачкодсть Виянань кудо кардазонь ортанть видьс. Мастумарень тарадтнэнь-лопатнень пачк неявсь кудосонть палыця вальма. Комськавтово част шказо. Авазо учи Виянань, а уды.
Нурькине чатьмонема. Киятань теке сонсь опаня менелесь лепштызе модантень. Туи тейтересь… Арасель мелезэ явомс мартонзо истя куроксто… Тейтересь, теке маринзе мелензэ: - Аштека, молян кевстьса авань, улема, мери тень аламнешка аштеме вальмало…
Кальцькадсь кеншесь… А куш а каш… Лиси, а лиси?...
Минута, кавто, вете… Кирвайсь кудосонть омбоце вальмась… Эзганзо тей-тов ювкадсь сулей. Толось мадсь…. А лиси, таргизе оймезэ Кията…. Аламнешка аштесь, сыргакшнось ва туеме, кода таго кальцкадсь кудыкельксэнь синдерьксэсь… Марявить тейтеренть шожда эскельксэнзэ… Киятань седеезэ теке гувк тейсь.. Вияна таго икелензэ. Лавтовонзо вельтязь лембе пацясо. Ушосонть экшендясь…
- Озатано?- невтсь тейтересь пирявксонть ёжосо ашти оймсема эзементь лангс. Тештне теке вадомгадсть чопода менельсэнть…
- Монень пельчасошка авам мерсь…, - поладсь тейтересь.
Озасть вейкень-вейкень эйстэ аволь маласо. Таго мезде а мезде кортнемат, кевкстнемат, ёвтнемат. Ушосонть а куш а каш. Зэхель. Лембе. Тешттне каштордыть менельсэнть, липнить, ципельдить, теке тошксить та-мезде эсь ютковаст… Парсте неявить тештекуротне, Кечетне, Озязтнэ, Каргонь кись…. Кодамо тантей чинесэ качадыть Виянань черензэ, шожда-тантей никсем веднень тансть маряви эйстэст, кона чаракавты Киятань превензэ… Вияна витни лавтовсонзо пацянть, шкань-шкань ванкшны Киятань чамас. Ёвли музыкас тонавлемадонзо, Пенза ошов тонавлеме туеме арсемадонзо….
Каршо палманьсэнть палы лампа ды эсь валдосонзо валдомты Виянань ашинька черензэ, ванькс чаманзо, валдо-сэнь сельмензэ. Кутмордамс? Киятань теде покш мелезэ, ансяк пели, тандавтсы ва тейтеренть. Ды кода кутмордамозо? Сон аволь сонзэ тейтерь-ялгазо….
- Вияна! Кудов! -, марявсь вальмаванть аванзо вайгелезэ. Кията теке пувтась эсь ойме потсонь, салавань мельстэнзэ, конатне, нама, тензэ кирдемат ды кардамат!
Тейтересь стясь эземстэнть. Шождасто лекстясь…
- Мезе? Туян…. Шказо талай… Ды авам учи… Моньтемень а мади…
Венстизе кедензэ. Кедьлапушказо лембине, чевте… Кията а нолдавлизе те лембе кеденть валскескак… Ды сави нолдамс… Ансяк аламодо кирдизе кедьсэнзэ ды каршо марявсь, кода чова, чевте тейтерень сурнэтне састыне, теке а марявиксстэяк, лепштизь сонзэ суртнэнь. Кедтне менсть, явсть, теке, марявсь, мелест каршо…
- Сак ванды...Мон карман кудосо, ковгак а молян…, - тошкстась тейтересь састыне, велявтсь ды сеск ёмась ортыненть экшс.
- Сан.., - ансяк кенерьсь корсякадозь вайгельсэ мереме Кията.
Омбоце чись ульнесь кувакадо кувака, таргавсь ды таргавсь… Зярдо сон прядови? Зярдо сы учонь чокшнэсь? Кията прядызе кудо латонть артоманзо. Тосто, верде, яла ванкшнось, косо чизэ, учось, кода сон карми новолеме чивалгомав. А весть варштнесь тоёнов, косо ульнесь Виянань кудось… Чокшнэнь сундерькстнэ тензэ эзть учово. Оршась ванькс панарнэ, аванстэнзэ мерьсь, келя, ялганзо эйсэнзэ учить, ды капшазевсь тоёнов, ков тердсь эйсэнзэ седей кенярксось. Чизэ ульнесь зярс вере. Киятанень марявсь, сонзэ весе несызь, весе содыть, ков ней сон моли ды мейсь, ялатеке пильгензэ сынсь ветизь се эзементень, косо сынь ульнесть исяк чокшнэ Виянань марто. Кудо вальматне пельс панжадот. Тосто марявсть пианинасо налксемань гайтть… - «Кудосо…!», - кивчкадсь кецявты мелесь Киятань превганзо. Аштейсь-тейсь аламнешка, кунсолось мазый гайттнень. Варштась перькаванзо, кепедсь апокшке кев покольне, метясь-норовась, ды састыне ёртсь эйсэнзэ валмантень… Понгсь!… Марявсь, кода кевнесь кеверезевсь кияксканть…
Вальма ёнкстнэ панжовсть седе келейстэ, ёлганя тейтернесь варштась ушов, чиремтизе рунгинензэ вальмалксонть трокст, неизе таймаскадозь аштиця Киятань, теке казизе валдо кецнемань мизолкссонзо. –«Сыть, Кията?!»- …. Тона аволдась, талакадозь, прясонзо. –«Мон нейке!»-, тейтересь ёмась вальмастонть.
Лиссь шожда валдо платиинесэ, кона парсте невтсь ёлганя, теке човазь, рунгинензэ. Черензэ пурназь пулынес, кона лыйк тейсь ортыневанть ютамсто. – «Тесэ чить а ён тенек аштемс», - невтсь сон эзементь лангс, - «Весе несамизь… Адя тов», -аволдась сон сынст кудонть маласо од кудонь срубонть ёнов.
Срубось пельсчапозь, кенкштэме, вальмавтомо, прявтомо. Ашти тикше потсо, ашо ды сэньшт цецине потс ваясь…
- Мон а куватьс, - венстизе Вияна Киятанень кедензэ, срубонь поровтонть трокст чалгамсто. – Улить апак прядо кудоютконь тевть… Паро?-
- Нама, паро!-, Киятанень эрьва минутась Виянань неемстэнзэ марявсь ней питней кенярксокс. Вияна нежедсь стенань лаксезь чувтнэнень, кепедизе чаманзо… Сельмензэ – домка валдо эрькеть, иневедень тюсонь эрьгть… Кода тантейстэ качадыть кизэнь лембеденть инзэдезь чочктнэ. Вирень танстьсэ, пичеойсэ, лопасо ды цецянь арвосо… Эли истя качадыть Виянань прячерензэ, мазый кирьгань ванькс-ашо киськезэ?
Сонсь эзь чарькодеяк, Кията, кода сон эзь кирдевть, венстявсь Виянанень ды палызе та козонь вить пилензэ алов, ашо кирьгазонзо, косо неявсь сеньшт чова верь саннэ. Вияна эзь айге эйстэнзэ. Аштесь, теке таймаскадсь, ансяк сельмензэ седеяк пек сэньшт мерсть чивалгомань валдосонть. – Мейсь? -, тошказевсть валдо якстере турванзо састо-састо… - А содан…, - тошкстась каршо Кията ды толсо палы турвасонзо чевтьстэ-састо палынзе Виянань чевтине-тантей турванзо… Теке тол ютась Киятань верь санганзо ды сон кеместэ кутмордызе тейтеренть виев кедьсэнзэ. Тейтерень рунгинесь сэрьга нежедсь Киятанень, Вияна кекшизе чаманзо Киятань лавтовс… Аштесть, кунсолость пилесэ бийниця седеень токномаст, марясть вейке-вейкень рунго лембест… Теке пельсть, ва илязо прядово зярдояк те рунго лембень марямось, илязо прядово те танстенть кецявт шказо…
Чочктнэнь экшстэ марявсьть та кодамо эйкакшонь цихельдемкат, кашторкст ды мейле дуборсо ве ёнов чиемка. Кията явсь тейтерьстэнть, кирнявтсь кенкш варянтень, колмо вейксэшка-кеменьшка иесэ тейтернеть ды цёрынеть чийсть срубонть эйстэ ве ёнов… Пижнесть: - Цилинь, цилинь, тапавкс! Алужт ичить чапакс!… Сынь, улема, чочко ютконь лазкскетнева ванкшность, вода Кията палсесь-кутморясь Вияна марто…. Вай… Весеменень ней теде ёвтнить….
Вияна визделгадсь, витинзе прячерензэ, а неявикс сормавкскетнень платиянь подолсонть… - Мон кудов, курок авам сы, минек течи инжеть, эряви анокстамс.- Кията укставсь… Арасель мелезэ истя куроксто явомс тейтеренть марто. Турвасонзо нейгак палозь палсь паламонь псись-танстесь. Ды мезть теят, эряви нолдамс тейтеренть.
- Ванды вастовдано минек лисьманть вакссо?-, кевкстизе тейтеренть соркст теи вайгельсэ.
- Вастовдано, паро. Тосо седее ён..,- казизе цёранть сэнь валдосо селмсэнзэ Вияна. Вадяштызе лембе кедь лапушасонзо Киятань чаманзо-сельмензэ, прянзо ды сонсь кутмордызе ды тантейстэ палызе Киятань турвас…
Кията пильгензэяк эзь маря кудов молемстэ. Кецнема ёжось чадозь чадыль оймесэнзэ. Ванды сон таго вастови Виянань марто? Мезень кис Инешкипазось казизе сонзэ истямо кеняркссо?!
Авазо вастызе кудосо: - Ков чийнить?,- улема, сонзэ пштистэ мариця седеезэяк чарькодсь, мень орма стардызе цёранзо, ды косто сон сась истямо якстердиця чамасо…
Сы чистэнть Кията сундерькс шкастонь вастовома таркасоль. Куватьс учось. Вияна эзь са. Кията чарькодсь, мекс. Чить, марясь сон, велявтсь Числав. Кията ялганзо уцяскань трокст а чалги, юткозост а эци…. –«Те апаро, а ён, виськс… Истя а тейнить…»-, сялдсь эсь прянзо Кията.
Кадовозь оймсема читнень Кията ютавтынзе кудо ютконь ды кардазонь тевсэ. Кизэсь курок юты, аванстэнзэ эряви анокстамс телес, седе шождат улест тензэ тельня кудоютконь тевтне. Анокстась палыкев-уголия, канднесь сонзэ ведрасо кардо удалов. Лазнось пенгть, колмо покш костёрс сынст вачкинзе. Эрямось тусь эсензэ киява… Весе юты те менельксэнть ало… Сеяк, мезе ульнесь-теевсь Киятань-Виянань марто.
Ламо иень ютазь, та-кода весть, одпингеде лецтнемас ваякшнозь, Киятанень сёрмадовсь:
Мон аволь тонь…
Тон аволь монь…
Эрямо кинек вейс а недить,
Сельме варштавксот васолонь
Менель тештинекс тень пеедить.

Учинь эйсэть…
Учить эйсэнь…
Ансяк ютксонок ули ломань,
Монень – ялга, тонеть – вечкень,
Колмонек вейсэ а улема.

Тон аволь монь…
Мон аволь тонь…
Вечкеманк трокст мон эзинь чалга,
Эстень меринь: - «Сон аволь монь,
Саик уцясканть эстеть, ялга…»

Мон аволь тонь…
Тон аволь монь…
Эрямо кинек вейс а недить,
Менелень тюсонь сельметь тонь
Иетнень пачк монень пеедить…

Кинень алтазь неть ойме потсто саезь сёрмадома кикскетне, морорисьминетне, чарькодеви, кода валморонь сёрмадейтне тешкстнить – (В-нень)…. Кие соды, кие те истямось,( В-нась)? Теде содыть ансяк кавто ломанть ды Инешкипазось….

Эрюш Вежай, 2014 ие, ацамков.

 Отправлено: 21.12.14 22:58. Заголовок: Мон а вечкан…. Мон ..

Мон а вечкан….

Мон а вечкан, зярдо Эрзясь - «мордва»,
Ды а вечкан, зярдо келенек «язык»,
А вечкеви валось «соплеменник»,
Теке нолго валсо пшкалить тенек мик…
Эрзятне – те виев РАСЬКЕ,
Кезэрень сон, мазый… Тон ванстык,
Превей ломань, Мелензэ… Келензэ…
Нарьгамодо Лемензэ идик.

Эрюш Вежай.

 Отправлено: 21.12.14 23:39. Заголовок: Оймем вельтявсь эчке..

Оймем вельтявсь эчке ловсо…
Телень куншка, телень ве…
Ловонь прамо, Од ие…
Оймем вельтявсь эчке ловсо,
Гайтне опамсть, тейсть зэхель,
Ловонь чевтесь сэнь тодовсо
Матры седей потмонь мель.
Телень экшэсь мадсти толтнэнь,
Конат вальмань пачк невтить,
Кода ломанть эвтить-эрить,
Вандынь валдочить учить.
Лов шушмотнес ломанть теить
Та-ков васов пильге янт,
Янтнэ тов молеме тердить,
А молян… Ирецтэян…
***
Эрюш Вежай

 Отправлено: 24.12.14 00:27. Заголовок: Вармамевть Ашолды сь..

Вармамевть
Ашолды ськамо вармамевтесь
Сэньшт иневедень сувнэсэнть,
Мезть вешни сон васол масторсонть?
Мезть ёртсь ды кадсь тириньсесэнть?

Толкунтнэ эвтить, коволт вешксить,
Торсеенть менчезь чикордстыть,
Се венчесь уцяскат а вешни,
Сон мекев, эйстэст – оргоди!

Алонзо ведесь сэнькев тюсонь,
Вельксканзо чизэ налт таргси,
Талныця оймесь вешни даволт!
Коволсост оймамот марси!

М.Ю. Лермонтов «Парус», эрзянь кельс ютавтызе Эрюш Вежай.

 Отправлено: 07.01.15 17:33. Заголовок: ..

Эрзянь валонть ИНЕ питнедензэ…
Эрзянь валонть питнезэ инеде ине. Ансяк эрзянь валось вансты ЭРЗЯНЬ КЕЛЕНТЬ. Эрзянь валось ашти юрокс эрзянь келентень. Эрзянь келесь ашти юрокс эрзянь мелентень. Эрзя раськень ванстома рисьмесь истямо: эрзянь вал – эрзянь кель – эрзянь мель - эрзянь Раське. Лиякс кодаяк. Ансяк эрзянь Валось, Келесь ды Мелесь аштить Эрзя ломанекс эсь прянь ловома ёжосонть.
Улить эрзят, конат ловить, келя кадык мон кортан-сёрмадан шабра раськень кельсэ, ялатеке мон оймесэм эрзянь ломанян. Те мелесь паро. Ансяк сон, те мелесьЮ, а вансты Эрзя раськенть. Те мельсэнть эрямось лоткавтсы Эрзя раськенть эрямонзо, икелепелечинзэ.
Раськесь кассы-ванстови ансяк сестэ, зярдо эрзятне кортыть-сёрмадыть эрзянь кельсэ, зярдо ёвтыть эрзянь ВАЛОНТЬ, зярдо эрзянь валсо сёрмадыть эсь мельдест, ёжодост, эрмодонть, тевтнеде, неезьденть ды арсезьденть.
Ламот виздить, пелить сёрмадомо, кортамо эрзянь кельсэ-валсо. Те а виде. Эряви чарькодемс: ЭРЬВА ёвтазь эли сёрмадозь ЭРЗЯНЬ ВАЛОСЬ – полады эрзянь келенть эрямонзо, вансты сонзэ. Эрьва валось, кона ёвтазь шабра раськень кельсэ – киремти Эрзянь келенть, лавшомты Эрзя раськенть.
Шабра раськень кельсэ кортыцятне-сёрмадыцятне куроксто теевить «русскоговорящий мордвин»экс, конат, кодат превейть иляст уле, ЗЯРДОЯК а марясызь ЭРЗЯНЬ КЕЛЕНТЬ-ВАЛОНТЬ танстензэ ды питнензэ. Течи - «русскоговорящий мордвин», ванды – руз. Лиякс кодаяк. Сынь кортыть тенек ёжовсто сельминест кончтнезь, келя эрзянь кельсэ а ёвтавить ломанень ёжомарямотне, содамочинь чарькодькстнэ. Те – маньчема. Эрзянь кельсэнек ули ине эрзянь кинигась – «Масторава», косо невтезь весе Эрзя раськеть ютазь эрямопингезэ, коензэ-иланзо. Конат сюпавдо-сюпавт. Эрзянь кельс ютавтозь мик «Библия» кинигась, конасонть ЭРЗЯНЬ кельсэ сёрмадозь лия раськень эрямо ёнкстнэ.
Эрзят, ламот эйстэнек эзть тонавто эрзянь келенть школасо. Теде а эряви виздемс-пелемс эрзякс кортамсто-сёрмадомсто. Ламо эрзянь велесэ улить эрзянь лия кортавкст ды валт. Тедеяк а пелемка ды а виздемка. Кортавкстнэ, ансяк сюпалгавтыть минек эрзянь келенек. Сынст вельде теевить синонимтне. Синонимтне – мазылгавтыть ды сюпалгавтыть эрзянь келенек.
Кадык сеск а лецтяви тенк сёрмадомсто-кортамсто кодамояк эрзянь валось. Тедеяк а пелемка. Ёвтынк сонзэ шабра раськень кельсэ, лия эрзятне витьтядызь ды валось лецтяви, сови кельвалонь паргозонк.
Рамседе эрзянь валкст, кевкстнеде эрзянь кортнема куросо, кода ёвтави эрзякс валось. Тенк лездыть лия эрзятне. Улить валкст Интернетсэ. Улить Интернетсэ эрзянь кельс тонавтома курот.
Эрзят, миненек эряви пек парсте чарькодемс эрзянь Валонть ПИТНЕНЗЭ. Эрзянь Валстонть теевсь минек Эрзя раськенек Раськекс. Ансяк эрзянь Валось ванстсы Эрзя раськенек.
Эрзянь Кель + эрзянь Мель = Эрзянь Ломань. Те иесь яволявтозь Эрзянь келень тонавтомань иекс. Тонавтодо, эрзят, эрзянь келенек. Теньсэ минь вансттано Эрзя раськенек.
Эрьва эйсэнк эрзякс ёвтазь ды сёрмадозь эрзянь валось – вансты минек раськенть! Содадо теде, эрзят. Сёрмадодо, кортадо эрзякс! Теньсэ – эрьва эрзянь ломаненть ками эсенэ покш путовксозо Эрзя раськенть вансома тевезэнек.
Эрязо Эрзя раськенек!
Эрюш Вежай

 Отправлено: 04.02.15 13:53. Заголовок: Кода Идемевсесь Эрзя..

Кода Идемевсесь Эрзясто «мордва» тейсь.
(неень шкань эрзянь ёвкс)
Колмо тёжат теде икеле, Рав ине леенть чиресэ Инешкипазось тейсь Ломань ды лемдизе сонзэ Эрзя – эриця, эряза, эрий. Теизе Инешкипазось сонзэ эсензэ коряс. Лиссь Эрзясь превей, валдо чама, мазый рунго, валдо сельме, сэтьме кор, важдыця ды мазынь вечкиця. Пувась Инешкипазось Эрзянть мештезэнзэ, пси седеензэ алов, Пазонь шожда лекстямо коштке – Эрзянь Ойме. Теде мейле кармась Ломанесь марямо эсь прянзо кода Эрзя, эрзянь ломань, виде-паро сон кармась эряза, эрий, эриця – Эрямонь вечкиця. Эрзянь раськень раштамонь ды вечкемань кис тейсь Инешкипазось Эрзянтень эрзянь Ава – эрзянь раськень раштыця ды триця. Казсь Инешкипазось неть ломантненень эрзянь кель ды нолдынзе теезь Эрзятнень Эрзянь Масторонть лангс Эрзя раськень раштамо ды мерьсь тенст: - «Уледе Эрзянь Масторсо азорокс. Эрядо Эрзянь ломанекс, эрзянь койсэ, кортадо Эрзянь кельсэ, ознодо Инешкипазнэнь, раштадо ды кастодо Эрзянь эйкакшт. Сестэ Эрзя раськенк а ёми»!- Кармась Эрзя раськесь касомо-кепетеме. Ламоксчизэ пачкодсь мик 1500000 ломаньс!
Неинзе Инешкипазонь неть паро тевензэ Идемевсесь. Ды сась мельс коламс Инешкипазонть иневанькс паро-валдо тевензэ. Кавто пель марто тёжат сон арсесь, кода Инешкипазонь теевксэнть коламс.
Ды тейсь истя.
Васняяк кучсь Идемевсесь Эрзянь Масторов лия раськень ломанть, конат саизь Эрзянь Масторонть ды лемдизь сонзэ лия раськень лемсэ. Истя ёмась Мода Масторонть лангсто Эрзянь Мастор лемесь.
Мейле кучсь Идемевсесь Эрзянь Масторов лия раськень пазнэнь озныця озатят. Ды сынь вийсэ ды маньчемасо лемдизь Эрзянть аволь эрзянь лемсэ ды кардызь Эрзянть Инешкипазнэнь эрзянь кельсэ озномадо. Истя ёмасть Эрзянь раськень лемтне ды кармась ёмамо Эрзянь келесь, кармасть эрзятне лия раськень кельсэ кортамо-арсеме, эрзянь келенть – стувтомо. Эрзянь келесь лоткась марявомо эрзянь велева-сядова.
Мейле таргизе ды салызе Идемевсесь Эрзянь Ломаненть Оймензэ ды Эрзянть ёмась эсь прянзо Эрзянь ломанекс ловомонзо-марямонзо. Кармась те ломанесь теевеме мельтеме урекс. Кармась стувтомо Эрзя лемензэ.
Теде мейле Идемевсесь лемдизе те оймевтеме кадовозь ломаненть «мордва»кс. Алтась Идемевсесь те ломанентень тееме Инешкипазонь Эрзянь келенть таркас Идемевсень пельде «ЕМЯ – «мордвань» кель. Ды Эрзя раськесь те од «лементь» марто кармась резэме-киремеме, лавшомомо-аламолгадомо.
Идемевсень амазы тевесь кармась изнямо…. Вана мекс ней ламот ломанть, кинь ундоксост касыть Эрзя раськестэнть, кармасть шождасто миеме Эрзя лементь ды Эрзянь келенть. Вана мекс истя лавшомгадсь меельце иетнестэ Эрзя раськесь. Меельце сисемкемень вете иетнень перть Эрзя раськесь неть амазый Идемевсень тевтнеде вишкиньгадсь кавксть, 150000-сто саезь – 750000 видьс. Карминдеряй идемевсесь изнямо седе товгак, ютыть 40-50 иеть ды тунь ёми Инешкипазонь Эрзя раськесь.
Теке марто аволь весе Эрзятне теевсть урекс, аволь весе Эрзятне максызь Оймест Идемевсентень. Ванстовсть Эрзят, конат чарькодизь Идемевсень апаро тевензэ ды стясть каршонзо, Эрзя лемест кис, Эрзянь Оймест кис, Эрзянь келест кис. Те максы кемема – Эрзя раськесь а изняви Идемевсентень. Эрзя раськенек вельми! Эрязо Эрзя раськесь!
***
(Эрюшонь Пичайнень ды Бажатнэнь те ёвксонть ёвтнизе Эрюш Вежай покштяст. 2015 ие)

 Отправлено: 05.02.15 18:31. Заголовок: http://f6.s.qip.ru/I..

Кстыйс якамсто…

Эрзянь цёрат-тейтерть, пурнасть молемс кстыйс,
Вирь валдо чирева пурнамс-кочкамс сынст
Мазый паро тейтерь, сон вирьга якась,
Вирьга якамстонзо пилгезэ томбавсь,
Лазовсь пильгинезэ, пургасть верь байгеть,
Тейтерь сэредькстнэде кундась цёрань кедьс.
Цёрась ды тейтересь, истя кедьстэ кедьс,
Одсто сыре иес пурнасть виест вейс.
Истя авам морсесь, ней авам арась
Моравлия моронть, вайгелем ёмась.
Кадовсть лецтнемасом нусманине гайтть,
Сынст эрямост мельзэть эрьва чистэ сайть.

Эрюш Вежай. 2015 ие.

 Отправлено: 07.02.15 07:21. Заголовок: Превей ломань уцяска..

Превей ломанесь уцяскав а эрси…
Превей ломанесь уцяскав а эрси,
Ламо чарькоди сон, ламос мелензэ явты,
Неи, чарькоди сень, мезенть эйстэнек кекшнить,
Паронтень валдо кить пачк чоподасонть вешни.
Превеенть а вечкить, сон арсеме кармавты,
Эйсэнзэ чумондыть, мейсь асатыкстэнь штавты,
Несы авидечинть, витнемензэ терявты,
Талновты мельть, ойметь, ды теньсэ кежть сон савты…
Превей ломанесь уцяскав а эрси,
Несы авидечинть, пачк арсеме кармавты,
Уцяскавокс улемс тензэ эряви ламо -
Изняволь Видечись, авидечись – ёмаволь…

Уцясказо арась? А кеман. Ули, ули…
Ламос чарькодемась терди, тензэ аволи…

Эрюш Вежай, 2015 ие.

 Отправлено: 09.02.15 17:23. Заголовок: ОЙМЕСЬ ДЫ ВИСЬКСЭСЬ ..

ОЙМЕСЬ ДЫ ВИСЬКСЭСЬ
(неень шкань эрзянь ёвкс)
Ламонь ламо тёжат ютасть, кода Инешкипазось теизе Эрзя ломаненть. Теизе сон Эрзянь ине Рав леенть чиресэ, мазый, цецяв кужосо. Теизе мазыекс, теизе превеекс, теизе эсензэ валдо киське рунгонзо коряс, валдо сельме сельмензэ коряс.
Рунгонзо теизе ванькс ашо сёвоньстэ, верензэ туртов сайсь ванькс лисьмапрянь ведь, санонзо саинзе кеме селейстэ, тулгонзо – пойстэ, ловажанзо – тумосто, рунго киськензэ – ашо килей чувтосто, прячерензэ – луга наронь тикшестэ. Мазый, кеме лиссь Ломанесь. Арсезевсь Инешкипазось, кода лемдямс те мазый Ломаненть? Ды сась мельс – лемдясы сон Ломаненть – Эрзя. Эриця, эряза, эрий сон улезэ. Истя тейськак – лемдизе Ломаненть – Эрзя.
Истя теевсь Эрзя ломанесь. Аравтызе Инешкипазось Ломаненть чинзэ каршо коськеме. Сонсь сутямсь аламнешкас покш тевдензэ сиземстэ.
А васоло, лутксто-латксто ваннось мельганзо Идемевсесь. Сельмензэ пек сявадсть Инешкипазонть теевксэнзэ лангс. Ды зярс Инешкипазось сутямсь-нуваземсь, чийсь Анамазось Ломаненть ваксс ды ваднинзе-рудаскавтынзе эрьва мейсэ Ломаненть рунгонзо-чаманзо. Сонсь кекшсь.
Пувтась Инешкипазось. Ванны – Ломаненть рунгозо-чамазо вельтявсть апаро ды амазый колавкссо. Мезть тейнемс? Чизэ валгомо новоли. Одс Ломаненть теемензэ Инешкипазонть шказо а сатыль…
Арсесь-тейсь Инешкипазось, ты ингельдизе Ломаненть рунгонзо. Кекшевсть весе асатыкстнэ Ломаненть потмозонзо. Ланга а неявить. Рунгозо-чамазо одс теевсть мазыекс-ваньксэкс. Ансяк мезть ней тейнемс сеть асатыкстнэнь-колавкстнэнь марто, конат кекшевсть Ломаненть потмозонзо? Вить сынь кармить мейле раштамо тосо эрьва кодат апаро ормат-тармот, апаро мельть-ёжот….
Пувась сестэ Инешкипазось Ломаненть мештес эсь лекстямо ялткензэ ды лемдинзе сынст Ойме ды Виськс. Оймесь - валдомтозо Эрзя ломаненть Эрямонзо, Виськсэсь – кардаволь Ломаненть апаро мелензэ ды амазый тевензэ.
Ды кармась Эрзясь эрямо Ойме ды Виськс марто. Раштыть-вельмить ва Эрзянть потсонзо апаро ёжот, сестэ Оймесь невти тензэ виде-валдо эрямо ки. Раштыть-вельмить ва Эрзянть мелензэ апаро-амазый тевть теемс, сеск Виськсэсь кунды кардамо эйстэдест Эрзянть, а нолды правтомонзо апарос, виськсэв тевс.
Секскак Эрзя ломанесь эри седе ламо паро тевень тейнезь-топавтнезь, вечки Видечи, седеезэ чевте, мелезэ паро, вечки паро тевть ды мазычи. Ансяк шкань-шкань, пек чуросто, изнякшныть Эрзянть Анамазонть-Идемевсенть колавкстнэ-асатыкстнэ, ды пракшны сон апаро-амазы тевс. Сестэ сон лецтясы Инешкипазонть, Виськсэнзэ… Ды Виськсэсь лезды Эрзянтень витемест апаро-амазы тевензэ.
Истя нейгак, течияк эрить Эрзя ломаньсэнть, седеензэ ало, Инешкипазонть кавто лекстема инванькс ялткензэ – Оймесь ды Виськсэсь, ды сынь лездыть эрьва Эрзя Ломанентень парсте, мазыйстэ ютамс эсензэ Эрямо Кинзэ.
Эрьва Эрзя Ломанентень эряви пек парсте чарькодемс Ойменть ды Виськсэнть ине питнест ды ванстомс сынст ваньксчист весе эрямопингень перть.
***
(Те ёвксонть ёвтнизе Пичай ды Бажат нуцьканстэнзэ туртов Эрюш Вежай покштяст. 2015 ие.)

 Отправлено: 12.02.15 23:30. Заголовок: ..

ЭРЗЯНЬ МАСТОРОСЬ – ЭРЗЯ раськенть лавсезэ.
(неень шкань эрзянь ёвкс)
Эрьва раськенть ули эсензэ Эрямо Масторозо. Ули эрзятненьгак эсь эрямо масторост. Эрзятненень, Эрзя раськенть туртов, Инешкипазось явтсь Эрямо Масторокс Модамасторонь пелькс, конань лемезэ – Эрзянь Мастор. Эрзянь Мастор лемесь невти – кинь те Масторось, кинень сон максозь Эрямо Масторокс. Те Масторось – эрзянь, Эрзя раськень.
Эрзянь Масторось келей ды мазый. Косо Инешкипазось теизе Эрзянть, тоско явтсь тензэ модаткак, Рав, Ока, Ёв, Сура, Ратор ды Сянголей лейтнень юткова ды перькава. Улить Эрзянь Масторсо ине лейть, тусто вирьть, келей паксят ды лугат. Лейтнесэ – калт, вирьтнесэ – вирьракшат ды эрва кодат пачат, паксятнева – сюро паксят, лугатнева – сэрей тикшеть.
Тельня Эрзянь Масторсонть – алкуксонь теле, кизна – лембе кизэ, ютксост – цецяв тундо ды умарев-эмежев сёксь. Эрязо-касозо Эрзя раськесь эрьмесэ ды мазысэ, улезэ эйсэнзэ превей-паро азорокс. Теевсь Эрзянь Масторось Эрзя раськенть туртов – виде-паро эрямо лавсекс.
Колмо тёжадо ламо иеть эри Эрзя раськесь Эрзянь Масторсо. Эрямонзо перть сон стявтсь-аравтсь ламо эрзянь велеть-сядот ды ошт: Обран ош, Эрзянь ош, Эрзямас ош, Орданьбуе, Терюш веле, Алатырь ош, Пенза ош, Симбирь ош ды ламо, ламо лият….
Шабра раськетнень а весть сявадокшность сельмест мазый-эрьмев Эрзянь Масторонть лангс. А весть каявкшность сынь лангозонзо Чивалгома ёндо, Чилисема ёндо, Чипельде. Покштянок кувать цидярдсть неть кежей каявоматнень каршо, ламо эрзянь цёрат-алят путызь эсь пряст-эрямост Эрзянь Масторонть ды Эрзя раськенть кис.
Сынст ютксто сехте содавиксэкс ульнесть Пургаз эрзянь Инязорось, конань кедь ало эрзянь ушмось кувать цидярдсь кода Чивалгома ёндонь, истя Чипельдень яттнэнь каявксост каршо. Ансяк эрзянь вийтне эзть сато ванстомс Эрзянь Масторонть оляксчинзэ. Эрзянь Масторонть вийсэ саизе, нельгизе эстензэ лия раське.
Теде мейле Эрзянь Масторонть лоткасть тешкстнемензэ карта лангсо кода Эрзянь Мастор. Лемдизь сонзэ шабра раськень лемсэ. Эрзятненьгак кармасть лемдямост шабра раськень а мазый валсо.
Ялатеке эрзятне эзизь стувтне Эрзянь Раськенть лемензэ. Эрзянь Масторось ванстовсь эрзянь моросо, ёвкссо, ёвтнемасо ды ёвтамосо. Пек парсте Эрзянь Масторонть эрямозо, коензэ-иланзо невтезь «Масторава» морокерькссэнть.
Секскак неень шканьгак эрзятне содыть, косо сон ульнесь, минек Эрзянь Масторось, ды косо сон ней. Эрзятне ванстыть сонзэ лемензэ – Эрзянь Мастор. Эрзятне ванстыть Эрзя раськенть лемензэ. Зярс карми эрямо Эрзя ломанесь – знярс карми ванстовомо Эрзянь Мастороськак. Эрзятне ванстыть Эрзянь Масторонть тосо, косо эри эрьва Эрзя ломаньсэнть эрзянь Оймесь – седей пенч ало…
Косо ней Эрзянь Масторось? Кода пек превейстэ сёрмадсь вейке превей эрзянь цёра, Таганонь Митё, сон вана косо: - «Эрзянь Масторось тосо, косо течи тонь эрзянь седееть чави!»
Сыть од шкат, ды вельми Эрзя раськесь. Вельми Эрзя раськесь – вельми Эрзянь Мастороськак. Теде содамка эрьва Эрзя ломанентень. Теньс кемемка эрьва эрзянтень.
(Пичай ды Бажат нуцьканстэнзэ те ёвксонть ёвлизе Эрюш Вежай покштяст. 2015 ие)

 Отправлено: 14.02.15 13:30. Заголовок: ТОВДО ды ЛУКШТО (Эр..

ТОВДО ды ЛУКШТО
(Эрзянь ды аволь эрзянь кавто валтнэде неень шкань ёвкске.)

Эрьва валонть - эсензэ питнезэ.
Варштасынек ЭРЗЯ валонть. Эрзя раськенть туртов те валось ашти юрокс. Кода кудось, кудо юртось, ашти васенце венеценть, васенце кирпеценть лангсо, истя весе Эрзя раськесь ашти Эрзя валонть лангс нежедезь. Карми эрямо Эрзя валось, сестэ карми улеме ды эрямо Эрзянь раськесь, эрзянь келесь, эрзянь культурась. Полавтык Эрзя валонть лия валсо, ды сеск емить Эрзя раськесь, эрзянь келесь, эрзянь культурась.
Ней чарькодтядо, эрзят, мекс те эрзянь ине валонть истя кекшить кирдивийтне?
Секскак, лисни, ЭРЗЯ валось - те сырнень ТОВ, конанть питнензэ чарькодемка Эрьва эрзянь ломанентень.
ЭРЗЯ валонть питнензэ парсте чарькоди кирдивиеськак. Самай секс сон кекши-нарды сонзэ эрямостонок ды терявты те валдо сырнень товнэнть полавтомонзо чопода ЛУКШСО, "мордва" аволь эрзянь валсонть. Те лукшсонть полавтыть минек товонть - ЭРЗЯ валонть.
Секскак, мелем истямо: - Эрзятненень теке сельме аванть ванстомка эрзянь ЭРЗЯ валонть, ды теке а эрявикс лукшокс ёртнемка "мордва" аволь эрзянь валонть. Мезе ды кода теде тынь арсетядо, эрзят? Инеськеть, ёвтынк эсенк меленк-арсеманк. Ильведевиньдеряй мейсэяк те ёвкскесэм, сестэ витемизь, превс путомизь....

Эрюш Вежай

 Отправлено: 15.02.15 12:04. Заголовок: Кода Инешкипазось Ло..

Кода Инешкипазось Ломанентень лем кочкась.
(неень шкань эрзянь ёвкс)

Теизе Инешкипазось Ломаненть, ды арсезевсь, кодамо лем тензэ путомс, кодамо валсо сонзэ лемдямс?
Чи арсесь Инешкипазось, лемесь тензэ эзь арсеве. Сюпав-виев эрзянь келесь. Ламо паро, превей, мазый валт эйсэнзэ.
Омбо чи арсесь Инешкипазось, паро лемесь тензэ эзь саеве.
Колмоце чистэнть сась истямо домка мельс Инешкипазось: - Улезэ Ломанесь кеме-шумбра эриекс, улезэ сон кувать ды видечисэ эрицякс, улезэ сон тевтнесэ эряза.
Тусть Инешкипазонть мельс неть весе мазый эрзянь валтнэ. Ансяк колмо валсо ломаненть лемезэ пек кувать евтави... Эряви-сави сонзэ нурькалгавтомс.
Арсесь-тейсь Инешкипазось валдо превсэнзэ ды панжтась сонзэ шержев прясонзо истямо превей мель-арсема: - Теемс неть колмо мазый эрзянь валтнэстэ вейке од мазый эрзянь вал, коната евтаволь шождасто, гайгевель гайтевстэ, невтевель Ломаненть тевсэ эрязакс, Мастор лангсо эрицякс, мазый эрямонь эриекс. Ды муевсь-теевсь Инешкипазонтень те мазый-превей од валось, ды теевсь те гайтев-смустев лемдямось. Те ульнесь Эрзя лем валось, ва теевсь Эрзя прявт валось.
Ютавтсь Инешкись лем максомань кой. Овтонь кедь лангсо церанть стявтызе. Кавто торотнень пря вельксс нединзе. Штатол Чинть пельде Инешкись кирвазтсь. Колмоксть перьканзо ломаненть ютавтсь.
Ды евтась тензэ пазонь мерема: - Путан, ломань, теть мазый Эрзя лем. Те лементь марто, ломань тон эряк, те лемсэнть раськеть раштак ды кастак. Раськеть касозо ды виемезэ ды Эрзя лементь парсте ванстозо. Карми стака теть, леметь а полавт, карми шожда теть, сонзэ ванст ды кандт. Сестэ а еми тонь раськеть-леметь, кармить содамот тонь лия раськеть. Пингеде пингес эрязо ней Эрзя раськесь.

(Пичай ды Бажат нуцьканстэнэ евтнизе Эрюш Вежай покштяст.)

 Отправлено: 17.02.15 14:28. Заголовок: Эряк эрзянь койсэ… ..

Эряк эрзянь койсэ…

Эрзят, лецтинк раськенк!
Лецтинк веренк, превенк,
Лецтинк эсенк келенк,
Мазый кезэрь леменк....
Лецтинк эрзянь аванк,
Лецтинк эрзянь тетянк!
Конат паро мельсэ,
Кортасть эрзянь кельсэ!
Эрясть эрзянь койсэ,
Ульнесть виевть вейсэ!

Рузонь превсэ эрят?
Рузонь кельсэ кортат?
Ёвтан тонеть,ялгай!
Аволь парсте эрят.
Эряк эрзянь койсэ,
Эсь улезень превсэ.
Чире кив а туят,
Покш уцяска муят!

Арсизь вейсэ Виктор Кудряшов ды Эрюш Вежай
2012 ие, сундерьков, 12 чи

 Отправлено: 22.02.15 13:14. Заголовок: Вейке эрзянь атянть ..

Вейке эрзянь атянть ульнесть колмо цёранзо...
(неень шкань эрзянь ёвкс)

Те ульнесь сеть стакадо-стака шкатнестэ, зярдо мазый-виев Эрзянь Масторось ды превей, кезэрень Эрзя раськесь понгсть лияраськень кирдивий алов. Эрзя раськень прявтнэнь сестэ - конатнень маштызь, конатнень рамизь… Лавшомсь Эрзя раськесь, талакадсь. Ломантне лоткасть чарькодеме эрзянь койтнень виест, эрзянь келенть питнензэ, Эрзя лементь смустензэ…. Покштнэ лоткасть эсь эйкакшост эрзянь ломанекс трямо-кастомо, эрзянь кельсэ Инешкипазнэнь озномо… Ды Эрзя раськесь кармась киремеме-маштомо...
Вейке мазый-покш эрзянь велесэ эрясь вейке эрзянь атя. Вансь-тейсь сон Эрзя раськенть стакачитнень лангс ды сась мельс: - А карман мон ней эсь цёрам тонавтомо а эрзянь кельс, а эрзянь койс, а эрзянь раськень вечкемас. Улема, истя монень седе парсте ванстовить колмо цёрам. Истя тейськак. Кайсть цёратне.
Покшось, мазый, виев цёрась, тусь тонавтнеме лия раськень ошов. Лоткась курок сон тосо кортамо эрзянь кельсэ ды курок стувтызе сонзэ. Кармась эсь прянзояк ловомояк, лемдямояк аволь эрзянь ломанекс. Оймезэ теевсь а эрзянь, кармась эрямо аволь эрзянь койсэ, симеме-таргамо, авалемсэ кроямо, ломанень мелень а ваномо, лия пазнэнь озномо, нузялдомо-саламо, ансяк кирдивиенть мелензэ топавтомо. Теньсэ полавт ойме цёрась пек вечкевсь лия раськень кирдивиентень. Тень кис кирдивиесь кучизе те цёранть шабра раськень марто тюреме, шабра раськень Масторов, торпингев, "кирдивиень мирэнть" кис тюреме- аштеме, шабра раськень ломанень чавномо-маштомо. Ды курок сонськак тосо чавовсь те цёрась, аволь эсь раськензэ кис, лия раськень юткова сыремезь торпингень паксясо. Эзь кадово цёранть мельганзо а эрзянь кудораське, а эрзянь эйкакшт, а эрзянь тевть-топавкст. Вана кодамо пес пачти ломаненть аволь эсь раськень мельсэ эрямось, эсь прянь а эрзякс ветямось. Коськсь те эрзянь раськень тарадкесь….
Куншкансесь, цёрась, теке койсэ прянзо ветясь, тусь тонавтнеме лия раськень ошов. Лоткась цёрась курок кортамо эрзянь кельсэ. Сонзэ кирдивиесь манизе, келя, тонь раськесь аволь раське, ансяк пельс раське, эрзянь келесь – аволь кель, ансяк та-кодамо кортавкс-диалект, ды раськетькак, келя аволь Эрзя лемезэ, келя, сонзэ лемезэ ней «мордва»… Эзть сато цёранть превензэ-виензэ неть маньчематнень каршо цидярдомс, мезеяк тензэ эзь ёвтне тиринь тетязо Эрзя раськеденть… Цёрась талакадсь, маньчемас кемезевсь.Кармась кемеме кирдивиенть маньчематнес, Эрзя раськелемензэ кадызе, ёртызе ды кармась эсь прянзо «мордовецэкс» ловомо, ды сеть ломантнень, конат эсь пряст ловсть эрзякс, кармась кежевсэ сюдомо-сялдомо, эрьва косо матрамо. Истяня весе эсь раскест миицятне тейнить, теньсэ миезь оймест терявтыть идеме, ды мезеяк сынст а лисни. Миезь оймесь яла пици-сэреди ды ломаненть лия апаро тевс-пежетьс совавты. Я, теньсэ вечкевсь те эрзянь оймевтеме цёрась кирдивиентень. Кирдивиесь понгавтсь эрзянь оймевтеме церанть мештезэнзэ цитниця кальдерька ды аравтызе вере аштиця урендямо таркас, косто сон кармасьлия эрзятнень «мордвакс» велявтомост… Нинзэяк, эйкакшонзояк велявтынзе «мордвакс», эрзянь келень а содыцякс, теевсть сынь весе "русскоговорящей мордвинэкс", эрзянь келенть а содыцякс, танстенэ а марицякс, а чарькодицякс... Ды алтась тенст кирдивиесь зярдояк-кодаяк теемс од кель – ЕМЯ, «единый мордовский язык». Ансяк превензэ цёранть эзть сато чарькодемс – истямо «языкесь» киненьгак, зяродяк а тееви….Истя пужсь-косксь омбоце Эрзя раськень тарадкесь…
Колмоцесь, сехте вишкине цёрась, седее пек вечксь покштянзо пильгало чарамо-велямо ды сонзэ ёвтнеманзо кунсоломо, эрзянь кельсэ кортамо, эрзянь морот морамо, эрзянь койтнень содамо. Кадык тетязо цёрынентень мезеяк Эрзя раськеденть эзь ёвле. Ды цёрынесь пек пштистэ кунсолось покштянть превей ёвксонзо. Покштясь тензэ кортнес истяня: - Я, цёрам. Минь, левкскем, – эрзятано. Тон, цёрынем, – эрзяят. Минек келенек – эрзянь, раськенек – эрзянь, коенек – эрзянь, пазонок – эрзянь. Кува тон аволить яка-пака – зярдояк теде иля стувтне… Эрзя леметь, эрзянь келеть иля мие, иля теевть а рузокс, а "мордвакс", а "мокшэрзякс". Эрзянь Масторось пачк тосо, косо тонь эрзянь седееть чави, эрзянь ойметь эри. Кода стака теть илязо уле, ванстык Эрзя леметь, ванстык эрзянь келеть, эйкакшот трить-кастыть превей-кеме эрзянь ломанекс, сестэ Эрзя раськесь а еми, эрзянь келесь а олы, эрзянь оймесь тундонь ловокс а солы. Превей цёрынесь истя тейськак. Тонавлесь лия раськень кельсэ – эрзянь келенть эзь стувтне. Кармавтсть сонзэ лия раськень пазнэнь озномо, цёрась эзьсе кадо эрзянь Инешкипазонть. Кармавтсть Эрзя лементь стувтомонзо-полавтомонзо, цёрась эзизе мие Эрзя раськелемензэ. Эйкашонзояк тринзе-кастынзе эрзянь ломанекс, эрзянь келень-коень содыцякс, эрзянь мельсэ эрицякс, Эрзя раськень ванстыцякс… Секскак зярс эзь изняво кирдивиентень Эрзя лемесь, эзь маштово кирдивиентень Эрзя раськесь. Кадык коськсть кавто эрзянь раськень аволь нардев тарадкетне. Ансяк, вейке нардев тарадкестэяк касокшны виев, кеме чувто. Кода касы вейке кеме-виев чувтосто тусто-пиже виресь, истя кассы, тустоми, виеми Эрзя раськеськак. Ансяк эрзятнень эряви кемемс тенень.

Се раськесь, кона содасы, косто саевсть кезэрень ундоксонзо, зярдояк а изняви апаро кирдивиентень ды карми эрямо пингеде пингес.

(Ёвксонть ёвлизе Пичай ды Бажат нуцьканстэнзэ Эрюш Вежай) покштяст. 2015 ие.)

 Отправлено: 26.02.15 07:36. Заголовок: Мекс эряви содамс ды..

Мекс эряви содамс ды ванстомс эрзянь келенть?
(неень шкань эрзянь ёвкс)
Зярдо Инешкипазось шкитизе-теизе Эрзя ломаненть, сон максызе тензэ ине казнекс эрзянь келенть. Эрзянь кельсэ кортамо, эрзянь кельсэ морамо, эрзянь кельсэ перть пельксэнть чарькодстеме, пертьпельксэнть ды эрямонть улензэ эрзянь кельсэ лемдямо.
Кува содави Эрзя раськесь? Мейсэ маряви Эрзя раськесь?
Васняяк – эрзянь кельсэ, эрзянь валсо, эрзянь моросо, эрзякс пшкадемасо, эрзянь кортамосо.
Ули эрзянь келесь – ули Эрзя раськесь. Ёми эрзянь келесь – ёми Эрзя раськеськак.
Зярс ломанесь корты эрзянь кельсэ – знярс сон Эрзя, эрзянь ломань.
Секскак, эрьва эрзякс ёвтазь эрзянь валось – вансты Эрзя раськенть.
Эрзянь келесь лия раськетненень а эряви. Эрзянь келесь эряви ансяк миненек, эрзятненень. Эрзянь келенть ванстсызь ансяк эрзянь ломантне, лия раськетненень сон тунь а эряви.
Кайсикая ломаненть штапос. Штапо ломаненть кода раськезэ содави? Ансяк кортамо келензэ коряс.
Полавтыкая-човорикая ломаненть оршамонзо. Кода човор оршамосо оршазь ломаненть раськензэ содасак? Ансяк кортамо келензэ марязь.
Косо эрзянь ломанентень седе паро? Седе ён? Косо эрзянь ломаненть ёжозо витеви? Тосо, косо кортыть эрзякс, косо эрзясь мари эрзякс кортамо, эрзякс пшкадема, неть тантей валтнэнь: – Шумбрат, мон эрзя. –Вай! Монгак эрзяян! Тон костонят? Кинь улят? – Мон …. велестэян. Мон …-инь цёраян. Мон ….инь тейтерян.
Ды кортамось поладови, эрзянь седеесь чевтеми, эрзянь ломаненть ёжозо витеви… А ськамозо сонь те масторонть лангсо. Улить вакссонзо эрзят, конат лездыть тензэ а шожда эрямосо, ёвтыть паро мель, максыть паро превспутомат, ледыть стака чистэ… Кода эно лиякс? Ансяк истя. Истямо эрзянь коесь.
Ансяк эрзянь келесь теи Эрзянь раськенть. Ансяк эрзянь келесь вансты сонзэ. Ансяк эрзянь кельсэ арсеви эрзянь мелесь. Эрзянь келесь вансты эрзянь койтнень, кирди эрзянь илатнень, эльневти эрзянь ойметнень, касты эрзянь превтнень, ёвтавты эрзянь эрямо ёжотнень, седеень марямотнень.
Эрзянь келенть мазычидензэ кортамскак а мезть… Кодамо лия кельсэ улить истя мазыйстэ ёвтавиця-гайгиця валт: ава, левкске, леляй, менель, ойме, седей, сельме, вечкема, люляка. Секскак эрзянь кельсэнть истя шождасто ладсевить мазый морот: - «Эрзянь кель! Эрзянь кель! Чольдердиця горнипов, гайсэ морыця цёков!»
Эрзянь келесь – минек Эрзя раськенек кеме нежезэ, нардев юрозо. Зярс эрзятне кармить вечкемензэ эрзянь келенть, зярс эрзятне кармить ванстомонзо сонзэ, знярс минек Эрзя раськесь киненьгак а изняви.
Ванстови Эрзянь келесь – ванстови Эрзя раськесь.
(Ёвксонть ёвлизе Пичай ды Бажат нуцьканстэнзэ Эрюш Вежай покштяст. 2015 ие.)

 Отправлено: 26.02.15 23:32. Заголовок: Face ..

Крандазке.

(неень шкань эрзянь ёвкс)

Эрзятне вечкильть эйкакшт. Седикеле эрзянь аватне чачтнильть 5-10 эйкакшт ды эйстэст седе ламотне касыльть покшокс. Тестэ самай эрзянь буелемте-фамилиятне: Пятаев, Девятов, Девятаев, Девяткин, Десятов….
Седе покш эйкакштнэ ульнесь эрзянь авантень паро лездыцякс, вишкинетнень мельга
якицякс-ваныцякс. Сисем-вейксэ иесэ тейтернетне ульнесть потякатнень мельга сехте
паро ваныцякс. Эйкакшкесь тенст ульнесь някань таркас, мельганзо ваныть, мартонзо налксить, пукшонзо-нолгонзо нардтнить, морыть тенст морынеть, налксить мартост чувтонь ды нулань някасо, утякстнить лавсьсэ ды нурямосо.
Андсы-потявтсы авась потяканть, кона аламнеде машты стякшномо-ойсеме, шлясы-нардасы кургонзо-пукшонзо ды сеск максы седе покшке тейтерненстэнзэ. Тона озавтсы кутьмерезэнзэ, карязонзо лангс пацясо пукшо алга сюлмазь ды кандтни эйкакшкенть тей-тов, налкси мартонзо.
Паро лездамо улипарокс сестэ ульнесь эйкакшонь крандазкесь. Сон ульнесь эрьва кудосонть. Сонстемензэ кодаяк. Крандазкенть тейнилизе кудо азорось, эли велень крандазтейницясь.
Крандазкесь ульнесь чувтонь. Ниле чувтонь ваксошкань покшолмасо чарыне марто, конат озавтозельть ниле чаронь петькельнес. Кшнинь эскть эйсэнзэ арасельть. Кшнись - питнеель Пирявкстэ-кундамкатне весе свистязельть чувтонь эскинесэ-тулынесэ. Ялатеке крандазкесь кемель ды нардевель, ламо иень перть ульнесь тевсэ ды а яжавиль. Пирявксонзо, трокске марто, теезельть пекшестэ, улест седе шождынекс, чарынетне – селейстэ эли тумосто. Седе сюпавтнэнь крандазкест ульнесть човазь чувтосто, аволь сюпавтнэнь – лаксезь лазнэстэ-трокскестэ. Потмаксось ульнесь пекше керень эли чова лазнэнь, ацавиль чевте тёшаккесэ. Эйкакшкесь эйсэнзэ эли стядо аштиль, эли озадо.
Кизна чинь чоп вишка эйкакшкесь артдневиль крандазксэнть кардазга, кудо икельга истямо крандазкесэ. Эйсэнзэ ён. Ваныцянтень – а стака, а эряви копоресэ эйкакшонть чоп кандтнемс, эйдинентеньгак паро. Кевердить-панить крандазкенть, сон калгодо чарынетнень лангсо дырнэзь дырны, ды те пек тукшны шумбра эйкакшонтень.
Покшке эйкакштнэ мик пелькстыть эсь юткова, кие ардтневтьсы потяканть те крандазкесэнть? Весень мельс тукшы крандазкенть ардтневемась. Те – паро, эрявикс тев ды теке марто – налксемка.
Ней истят крандазкеть косояк а неят. Улема, музейсэяк а вастат. Ней сынь полавтовсть заводсо теезь чаронькасо-коляскасо.
Теке марто, эрзятненень содамка: весе седикелень Эрзя раськесь кассь эрзянь лавсьсэ ды чвтонь крандазкесэ.

(Ёвксонть ёвлизе Пичай ды Бажат нуцьканстэнзэ Эрюш Вежай покштяст. 2015 ие.)

 Отправлено: 27.02.15 22:16. Заголовок: Эрзянь шкерьге. (нее..

Эрзянь шкерьге.
(неень шкань эрзянь ёвкс)
Эрзянь Масторсо касы истямо тикше, кона канды Эрзя раськенть лемензэ. Те тикшенть лемезэ – эрзянь шкерьге. Косто саевсь эрзятнень туртов истямо вечкевиця валось? Неень шкань эрзятнестэ теде пек аламот содыть. Аламот содасызь те тикшенть лемензэяк. Аламот сонзэ содасызь лия тикшетнень ютксто. Касы та-кодамо пиже потьмежа тикшесь, кода лемезэ? Мезес маштови? Мекс те шкерьгесь эрзянь? Теде течинь эрзянь ёвкскесь.
Лия тикшетнень ютксо те тикшентень эрзятне пек покш питне путыть. Мекс? Вана мекс. Сон эрзятнень туртов ашти паро-тантей ярсамкакс. Кува касы эрзянь шкерьгесь?
Кальга, каль вирьга, кона касы лей чирева, начко таркава, кува тикшетне касыть-кепетить карксам видьга. Каль вирьсэнть касыть кальть, лепеть, шукшторовкст, цилигат, комолят… Алга – потьмежа тикшеть: эльде начкот, борчат, вирь пурькат ды ламо лия тикшеть, ютксост касы самай минек эрзянь шкерьгеськак.
Эрзянь шкерьгеденть башка ули лия шкерьгеяк. Ансяк те шкерьгесь касы коське, пандо лангонь вирьсэ. Сонзэ чачозояк, танстезэяк эрзянь шкерьгенть коряс тунь лията. Се шкерьгенть лемезэ – чуважонь (ветькень) шкерьге.
Ярсамос кенери эрзянь шкерьгесь кизэнь васенце тарготнестэ, зярдо кизэнь лембесь ансяк-ансяк эждясынзе калень начко модатнень ды тикшетне виевстэ-тустосто кепетить верев. Те шкастонть эрзянь шкерьгень нетькстнэ эчкть, потьмежат ды тантейть. Теледенть мейле эрзянь шкерьгесь кенери васенцекс лия ярсамо тикшетнень ютксто. Ды эйстэнзэ пек ламо, ансяк сезнек, иля нузялдо.
Мельганзо якить васняяк эйкакштнэ. Сезнить шкерьгеденть кавто кедень оромшка, зяро кинень кандови. Кандсызь кудов, ойсить вальмало ды ярснить. Теледенть мейле эрзянь шкерьгесь – те васенце витамин ульнесь эйкакштнэнь туртов. Шкерьге нетьксэнть ватксесак ды сусксак-порьсак… Сон потьмежа, ламбсть-ризаня… Тантей!!!
Пек лезэв эрзянь шкерьгесь пейсывельтнень туртов. Алкуксонь казне эрзятненень Инешкипазонть ды Виряванть пельде…
(Ёвксонть ёвлизе Пичай ды Бажат нуцьканстэнзэ Эрюш Вежай покштяст. 2015 ие.)

 Отправлено: 01.03.15 20:22. Заголовок: ПИДЕНЬ ЛОВ ..

ПИДЕНЬ ЛОВ
(неень шкань эрзянь ёвкс)
Лов! Мазый эрзянь валось. Нурькине. Те невти сонзэ кезэрьксчинзэ. Кезэрень пингстэ саезь эрзятне ловонтень мерить лов. Те валсонть маряви телень ванксчись, экше коштось, ашо пертьпельксэсь, шождасто лексемась. Ловонть потсо пертьпельксэсь уды тундонть самс, ташты мазычинть ды кенярксонть…
А вана пидень лов….Арсетядо а эрси истямо? Эрси. Эрси эрзянь кельсэ, эрси Эрзянь Масторсо.
Эрси-арась лия раськень кельсэ? Улема, эрси. Кортыть, келя, пелевеёнксонь раськетнень кельсэст улить ламо валт, конат видестэ-парсте невтить эрьва кодамо ловонть улеманзо.
Эрзянь кельсэяк ловось эрси истямо : начко лов, летьке лов, коське лов, лоподезь лов, кавшаня лов, пухляня лов, канды лов, пры лов, якшамо ваце, лекше, ловняське, лов кандерькс. Улема, лия валткак улить, конат сеск эзть лецтявт, конат невтить ловонть уликс эрьва кодамо ёнксонзо….
Ансяк течи ёвкскесь пидень ловдонть. Мекс сондензэ? Васняяк, те валонть а стувтомга. Эрьва эрзянь валось – теке сырнень човалине, сон невти минек эрзянь келенть мазычинзэ, питнензэ, эрявиксчинзэ.
Те ловось эрси Эрзянь масторонь теленть омбоце пельксстэнзэ, даволковсто, зярдо читне кувалгадыть, манейгадыть, зярдо Чизэ седе кувакасто эльневти-кольневти модамасторонть эсь эрямонь максыця-казиця валдосонзо. Эли мик тундонь ушодкс ковстонть, эйзюрковстояк эрси..
Неть читнестэ ушось чить седе лембе. Чипаень налтнэ, валдось чинь перть аламнешка кавшакавтсысь ловонть верьце лангонзо. Сы сэнь чокшнэсь. Валги телень весь. Маней ветнестэ ушось якшавты ды вень перть вере ацавт ловонть калгодкстомтсы, меремс, «пидесы», теи ловонь куво, конатань самай лемезэяк «пидень лов». Кода каштомсо пидеви-паневи кши кочомось, кода кочомсонть каштомонь псись теи калгодыне куво, истяня телень якшамось веть «пиди» ловонть ды теи лангаванзо ловонь куво, «пидень лов».
Пидень ловось седе кеме паксятнева, пандо прява, пандо чамава, тува, кува чить ловось кавшакавты чинть ало ды веть, якшамось свистясы кеме кувос. Секскак сон мик ломанень пильге алояк а лондавкшны. Молят лангаванзо вирев, пенгс, ды мик а вайсяткак ловс. А вана сокстнэ, сетне сынсь нолаштыть пидень ловга, ансяк кирдть! Мик а лоткаваткак!
Телень вармась пувси пидень ловганть лов кельтнень, пани ловонь чуваронть латкс-лушмос. Пидень ловсо вельтязь паксятне валанят. Велькскаст азорокс пувсить якшамонь варматне. Маней телень чистэ паксятне мик цитнить чи валдонть ало. Пачкаванзо стака ривезентень пакся чеертнень кундсемс….
Веть, ков валдосонть пидень ловсо вельтязь лов шушмотне таго цитнить сэньшт мериця цитневкссэ, цивтёрдыть ламо тюсонь сяткинесэ… Алкуксонь, виде-паронь ёвкс Эрзянь Масторсонть. Вана истямо пидень лов эрси Эрзянь Масторсо тельня.
Эряк эрзянь ломань ды ванст эсеть кезэрень ёвксонь Масторот, эрзянь ёвксонь мазычинь келеть, конаньсэ улить кезэрень эрзянь мазый валт… Ютксост – пидень лов валтнэяк. Кадык неть валтнэнь весе неень шкань эрзятнеяк содыть.
(Ёвксонть ёвлизе Пичай ды Бажат нуцьканстэнзэ Эрюш Вежай покштяст. 2015 ие.)

 Отправлено: 03.03.15 07:25. Заголовок: Мезес пачти кирдивие..

Мезес пачти кирдивиень инфопропагандась.
Неень шкань эрямосто вишка тешкскеть-редявкст. Ютан эйкакшонь налксема таркиненть вакска. Колмо цёрынеть чийнить ружиине марто, прянь стувтозь налксить торпингень туремасо.
Шабра раськень цёрынетне «леднить», пижнить:
– Зэрьк! – Бах! – Мон ледия «укропонть»!
- Ледерь! Мон маштыя «хохолонть»! Сон фашист!... Бендера!
Ды истямо «мазый» валсо седе тов….
Ютынь вакскаст. Арсезевинь: - Кинь касты шабра покш раськесь? Мезес аноксты неть цёрынетнень? Украинась минек ошкестэнть – пек васоло… Цёрынетненень 8-9 иеть…

Эрюш Вежай. 2015 ие.

 Отправлено: 06.03.15 02:10. Заголовок: Цёрань тев (неень ш..

Цёрань тев
(неень шкань эрзянь ёвкс)
КЕНДЕКЕМЕНЬ ПАНДОМА
Эрьва эрзянь цёрынесь арси-мелявты, зярдо тензэ, окойники, мерить кундамс покш цёрань тевс? Неть тевтнеде эрзянь кудотнесэ-кардазтнсэ а лововитькак. Чинь чоп цёратне важодильть. Пильгалост-вакссост эвтить покшке цёрынетне. Сынь а мешицят. Сынь покштнэнень – паро лездыцят. Кото-сисем иетнестэ цёрынетне нолдавить аватнень-сыряватнень кедест-сельмест алдо ды «максовить» цёратнен-покштятнень кедест алов. Ней сынь тонавтыть покш цёрань тевс.
Кода кирдемс узеренть, кода чавомс пеильманть, кода печкемс саразонть, кода вачкамс пенге костёронть, кода кильдемс алашанть ды истя седе тов… Тенень кемколмово-кеветее иес содамка эрьва эрзянь цёрынентень. Ансяк сестэ сон карми паро кудо азорокс, кардаз ютконь тевень ветицякс.
Киятанень топодсть кемкавтово. Сон эри Кият покштянзо марто. Улить колмо сазоронзо, лелязо саезь урендямо ушмовийс. Секскак Кията ней покштянзо туртов виде-паронь лездыця. Школадо икеле кенери таргсеме ды каямо тикшеть яслятнес, урядамс денникенть. Школадо мейле курокке тейсынзе уроконзо ды таго кардазов. Эряви керямс эли лазномс пенгть. Совавтомс сынст каштом икелев.
Покштянзо марто ветни скалтнэнь Олёшкань лисьмав симдемест. Теле. Цят якшамо. Васня эряви чупонемс эенть лисьма кургстонть чупоньсэ. Чупонемс сави чувтонь симдямо очконтькак. Сон эиясь. Ансяк мейле эряви каямс эзэнзэ кельме веденть. Кията лезды покштянстэнзэ ды ваны, кода скалтнэ апак капша, пеень пачк кувать потить-симить ванькс кельме ведтенть. Скалтнэ паневить кудов.
Кият атя ды Кията нуцьказо совасть кудос, тонгизь варьгаст каштом варинес. Тосо варьгатне курок коськить!
Федай сырявась андынзе цёратнень капста ямдо, суронь оев кашадо. Вачомост явавтомадо мейле ды аламодо оймсемадо мейле цёратне кундасть пек эрявикс тевс. Течи Кият атя сась мельс тонавтомонзо Киятань кендекемень пандомо. Цёрынесь умок вешсь теде. Ней те шкась сась.
Атясь таргась мушконь суре киреть. Анокстась калязь кшнинь пеельть, кенде панкст, урот, эчке салмуксст, кавто эчке кедень панкст. Вейкенть потсо – вар. Омбоценть потсо – потмо ой, лем.
Васня теемка дратванть. Мушконь кеме суресь нилексть-ветексть таргави удалць кудонть трокст тулосто тулос, аламнеде пурдтневи. Теде мейле парстине, кувать ёзави-вадневи раужо варсо. Тевесь а шожда. А весть ливеськадат дратванть теемстэ-анокстамсто. Ды, окойники, улезэ нолажа, вадринестэ вадневи-ёзави потмо ойсэнть. Мейле дратвась пурнави кесаккень-кесаккень.
Кудос совавтови чувтонь свистямо станнэсь. Васня тееви кендекемень пильгалксось. Керяви сон кенде панкссто пандовиця кендекементь коряс. Порсо тешкстави ды пильгалксонть коряс керяви пильгалксонь кочкарясь. Ней сынь аравтовить вейс свистямо станс ды кавто салмукссо, карадо каршо пандовить вейс. Уросонь тееви варине пачк, салмукстнэ карадо каршо тонговить эзэнзэ, ускови дратвась ды свистяви кеместэ ставксось. Ды истя седе тов. Неть тевтнень ней паро мельсэ топавты Кията цёрынесь. Кият атя ансяк невтни тензэ.
Пильгалксось анок. Ней пандомка сонсь ташто кендекемесь. Васня аравтови парсте сонсь пильгалксось кементень. Сустави кочкарясь ды пильге прясь, илязо пандово чирьстэ. Ды мейле, потмо куншкастонть саезь пандови пильге лапанть перькава весе пильгалксось. Вейке кендекемесь пандозь, мельганзо – омбоцеськак. Чокшнэс тевесь прядозель. Кият атя шнызе нуцьканзо. Вадрясто цёрынесь пандынзе эсензэ кендекемензэ. Тейсь-топавтсь сонсь алкуксонь, виде-паро покш цёрань тев!
Ней кедтне шлямкат сапоньсэ. Ды вана мезе: дратванть свистямсто сон тапардави кедь лапушкатнень перька ды кеместэ ускови. Тень пингстэ кеденть перькава варов дратвастонть теевить ламо раужо-тюжа кикст. Конат мик сапоньсэяк а шлявить, кода иля ёза эйсэст левштапосояк…
Ды Кията сынст пек а ёзыяк. Аламодо ёжовкшны. Кадык кадовить кедьсэнзэ неть дратвань кикстнэ. Ванды сон моли школав, тосо ялганзо несызь неть кикстнэнь ды весе чарькодить, кодамо покш цёрань тевс ней машты Кията…
Истя лисськак. Мик вечкевикс тонавтыцязо, Василь Георгич, кона тонавтсь математиканть, неинзе цёрыненть дратвань киксэв кедензэ. Кевкстизе: - Кията, мезе, кендекемть пандыть? Кията аволдась прясонзо: - Пандынь… Василь Георгич лембе кедьсэнзэ вадяштызе Киятань прянзо: - Вадря цёракс касат…
Кенярксстонть Киятань седеезэ киторк тейсь.
(Ёвксонть Пичай ды Бажат нуцьканзо туртов ёвлизе Эрюш Вежай покштяст. 2015 ие.)

 Отправлено: 07.03.15 00:29. Заголовок: Уськирей – Эрзянь Ма..

Уськирей – Эрзянь Масторонь нармушка.
(неень шкань эрзянь ёвкс)
Мейсэ Эрзянь Масторонть мазызэ? Мейсэ неявтозо? Мейсэ питнезэ?
Мазызэ – тусто виртнесэ, сюров паксясо, цецяв лугасо… Неявтозо – келей, ванькс лейтнесэ, эрьктнесэ… Питнезэ – эрзянь ломаньсэ, эрзянь велесэ… Ламо мейсэ Эрзянь Масторонть питнезэ-мазызэ, сеск а ёвтавияк зярыя валсо….
Эрзянь Масторонть мазынзэ несак сельмсэть, марясак оймесэть, марясак пилесэть, ёжо понасот…
Те мазычинть-эрьменть ютксо течи лецтясынек Эрзянь Масторонь вейке нармушканть, кона эри Эрзянь Масторсо, теи Эрзянь Масторсо пизэ, ливти Эрзянь Масторсо левксэнзэ, ансяк якшамо шкане тукшны Эрзянь масторсто лембе масторов, иневедень томбалев ды эрьва тунда, васень лембе читне марто пачк велявты секе вирьнетнес, колкатнес, паксятнес, Эрзянь Масторов, косо васенцеде неизе чипаенть валдонзо.
Те вишка нармушканть лемезэ – уськирей.
Косто саизь кезэрень эрзятне те мазый валонть? Кие ней соды… Улема, истя тензэ мерить човинька пильгигнензэ кис, човине нернензэ кис. Сынь теке чова раужо уськинестэ теезь. Эли чова, кувака пулынензэ кис, конасонть сон секе тев сорновтни верде алов чийнемстэ…
Уськиреесь эрямо тарка вешни пачк лей чирева, вечки луга нарга, лей чирень чуварга чийнеме ды вешнеме лангстост эстензэ ярсамка: сукскеть, карвот, унжинеть, нимилявт, салмуксоньсалыть… Вечки эрямо ломанень маласо. Пизэнзэ вечки тейнеме сэдь алга, чувтонь ундынева… Кутьмерень толгинензэ сонзэ сэньшт-чоподат, пекинезэ ашине, пря боканзо – ашинеть, сельминензэ – раужинеть.
Морынезэ нурькине, ды теке марто мазыйне: - Вить-вить, вить-вить, вить, вить.- Морси моронзо ливтнемстэяк, чийнемстэяк. Ве таркасо кувать а аштни. Эли чийни, эли ливтни, ливтнемстэ юв-яв тейни, либорды верев-алов, витев-кершев. Пизэзэ лембине, теезь чевте тикшинестэ ды лембе пухкесэ ацавт. Эйсэнзэ эрсить котошка ашназа-сёрмавнэть алнэть. Алыякшныть ды левксэст ливтнить уськирейтне кизэнть перть кавксть.
Ардыть эрзятне алашасо тикшес, уськиреесь алашанть перька ливтни, промот-нимилявт кундси. Озы ки лангс, теке учи, зярдо улавось малазонзо пачкоди, чии-чии, ливтязеви: - Вить-вить, вить-вить!-
Ков эрзятне – тов сон, уськирейнесь, вечки вакссост ливтнеме. Эрзятнеяк вечксызь те вишка, мазый, эльнеме вечкиця нармушкиненть – Эрзянь Масторсо эрицянть, эрзянь эрямонть мазылгавтыцянть.
Уськирей, уськирей,
Ливтнек алов ды верей,
Кундсек унжат, нимилявт,
Пизэзэть мекев велявт!
***
(Ёвксонь ёвлизе Пичай ды Бажат нуцьканстэнзэ Эрюш Вежай покштяст. 2015 ие.)

 Отправлено: 09.03.15 02:03. Заголовок: ТУНДО (неень шкань а..

ТУНДО
(неень шкань аволь ламонь содыень мельть-арсемат)
Тундо. Ундо. Кандо. Пандо. Сардо. Кардо. Сярдо. Валдо. Пондо. …
Зяро валт эрзянь кельсэ теезь неть валтнэнь лувсо? Лецтявсть вана неть. Сынь весе теезь кавто валпелькстэ. Весе лемвалт. Валпесь эйсэст –О, эли – ДО?
Сайсынек мельс, кадык неть лемвалтнэсэ валпесь карми –О. Сестэ парсте неяви: лемвалтнэ КАНДО, ПАНДО, КАРДО, ВАЛДО теевсть теввалтнэнь эйстэ: КАНДОМС, ПАНДОМС, КАРДАМС, ВАЛДОМОМС.
Сестэ мезе, ульнесть теввалт, конатнень минь, неень шкань эрзятне а содасынек? Меремс истят: ТУНДОМС, УНДОМС, САРДОМС, СЯРДОМС, ПОНДОМС?
Эли те мелесь чаула?
Арсесынек….
ТУНДОМС – ту(емс)-ту(ень). Тундось лембе туи….
УНДОМС -он(неемс). Урось уды ундосо ды онт неи…
САРДОМС - САР(о). Начко тарка. Сардось начко теи.
СЯРДОМС -СЯ(вордомс). Сярдось тумояк сюросонзо сяворды.
ПОНДОМС -пондо(мукоро). Пондомукоронть рунгозонзо «пондозь» чаркс (круглый) мукорось…

Содан, киньгак превей эрзятнень неть арсематнесэ пек ракавтсынь! Теке марто, улема, киньгак превейтнень арсевтьсынь?

Эрюш Вежай

 Отправлено: 14.03.15 11:35. Заголовок: Кавто бизнакайть. ..

Кавто бизнакайть.
(неень шкань эрзянь ёвкс)
Эрить масторлангсо кавто ливтякайть-бизнакайть. Эрить кавонест мазый луга лангсо. Кавонест ливтнить, кавонест бизныть. Кавонест эжнить чивалдонть каршо. Кавонест вечкить лембе чить. Кавонест неить перть пельксэнть мазычинзэ. Кавонест вечксызь эрямонть. Кавонест неить, мезе тенст эряви мазый цецяв кужосонть.
Ансяк вейкесь вешни ды неи мазый цецятнень, пурны эйстэст ламбамо медьарвонть. Соньськак ярсы медьарводо ды теи эйстэнзэ тантей медь.
Омбоцесь цецяв луга лангсто вешни ды неи ансяк скалонь ды лия ракшань ваце куцят.
Васенце бизнакаенть лемезэ – мекш. Омбоценть лемезэ - карво.

Истяня ломанень ютксояк эрси. Вейке ломанесь эри мекшекс, омбоцесь – карвокс. Эрьва ломанесь сонсь кочки – мезе неемс, козонь валгонемс Эрямо кужосонть….
Эрзятненень пек вечкеви Мекшэсь. Ломантне, конататне саить эстест карвонь эрямо коенть, теить седе ламо зыянт. Эрзянь Масторсо сындест ули эрзянь валмеревкс: - Вацес пры карво...
Вишка пингстэ саезь эрзянь эйкакштнэнень эряви теде содамс…
(Ёвксонть ёвлизе Пичай ды Бажат нуцьканстэнзэ Эрюш Вежай покштяст. 2015 ие.)

 Отправлено: 21.03.15 01:22. Заголовок: Чоледемкат - Косо эр..

Чоледемкат
- Косо эрят, мазыйка, косто муемат?
Кода, эрзянь цецине, полакс саемат?
- Эрян эрзянь велесэ. Вешнек, мусамак…
Эрян валдо кудосо, учан, мельгам сак…
- Кода содамс велинеть, вакска а ютамс?
Кона кудонть вальмало вайгелеть марямс?
- Велем эрзянь, кезэрень, несак – содасак,
Вальмам сэрей конякссо, вакска а ютат…
- Мейсэ туемс мелезэть, седеезэть прамс?
Кодат казнеть анокстамс, мезе теть алтамс?
- Туят чевте седейсэть. Казнекс анокстак
Полань мелень ванома, вечкема алтак…
- Косо эрят, мазыйка, косто муемат?
- Эрян эрзянь велесэ. Вешнек, несамак....

Эрюш Вежай, 2015 ие.

 Отправлено: 28.03.15 10:11. Заголовок: Васень вечкемась… Шо..

Васень вечкема…
Шождыне пельне вальмаванть варштась,
Тонавтнемась прядови курок.
Састо чикоркшны, сёрмады перась,
Сёрмадовкстнэстэ лиси моро.
Васень варштамо, васень вечкема,
Солавт ведьтнесэ - эй сэняжа.
Одс а велявтови, одс а велявтови,
Одс а велявтови вечкемась зярдояк.
Одс а велявтови, одс а велявтови,
Одс а велявтови вечкемась зярдояк.
Тундонь пиземнеть, чуди чудикерькст,
Пиже варминеть тошксить валнэть,
Коронь невтемат, стяконь пелькстамот,
Ульнесть ютксонок теке исяк.
Васень вечкема, ювны ловняськеть,
Менельсэ пикстерьдиця тештькеть,
Одс а велявтовить, одс а велявтовить,
Одс а велявтовить тештькетне зярдояк.
Одс а велявтови, одс а велявтови,
Одс а велявтови вечкемась зярдояк.
Васень варштамо, васень вечкема,
Солавт ведьтнесэ - эй сэняжа.
Одс а велявтови, одс а велявтови
Одс а велявтови вечкемась зярдояк.

Эрзянь кельс ютавтызе Эрюш Вежай, 2015 ие.