Отправлено: 24.04.07 12:57. Заголовок: Эрзянь келень Чись Пелевеъёнкссо / День Эрзянского языка в Полярном

Эрзянь келень Чинть Полярной ошонь эрзятне ды эрзянь раськентень малавикс раськень ломантне тешкстызь чадыковонь 22 чистэнть. Те тундонь маней чистэнть музень промкснупальсэнть пуромсть эрзят, мокшот, удмуртт, веткеть, рузт.

Те промксонтень анокстазель эрзянь ды лия финнэнь-угрань раськень книгань, журналонь ды кулялопань невтима. Эйсэнзэ ульнесь минек «Масторава» морокерьксэсь, карелэнь ды суоминь «Калевалась», эрзянь-рузонь валкст, «Сятко» ды «Чилисема» журналтнэ, «Эрзянь Мастор» кулялопась.

Пуромозьтне паро мельсэ ванызь «Эрзянь Раськень Озкс» ды «Эрзянь викшневкст» ваномафильматнень, кунсолызь «Торама» ды «Морденс» седямкуротнень морост-седямост. Мейле мольсь куватень кортамось – кода ванстомс эрзянь келенть Эрзянь Мастордонок васоло эрямстонок. Тешкстазель, келенек ванстомонзо лездыть эрзянь книгатне, журналтнэ, кулялопатне. Неень шкатнестэ виев лезкс карми максомо Интернетэсь, козонь превей од эрзятне аравтнить ламо вадря сёрмадовкст эрзянь раськеденть, эрзянь кельденть, эрзянь литературадонть, культурадонть.

Ванна кода неть Интернет вальматнень муемс:
«Эрзянь Мастор» - http://www.erzia.saransk.ru/ ;
Эрзянь Эрий Журнал - http://erzianj-jurnal.livejournal.com/ ;
Эрзянь Мелькужо - http://erzianj.borda.ru/ ;
Эрзянь раськень вальма - http://www.erzian.com/

Промкссонть лецтязельть ине эрзятнень лемест: Тюштясто саезь Йовлань Олонь видьс. Паро мельсэ весе вастызь Пургаз Инязоронтень лецтнема стявтовксонь теемадо. Те тевентень ломантне каясть ярмакткак, вейсэнь ярмакпаргос каязь ярмактнэде лиссь 1200 целковойть. Полярной ошонь эрзятне шныть те ине тевенть ды кемить: эрьва эрзясь путсы эсь каявксонзо Пургазнэнь кевстявтовксонть теемантень.

Весе эрзятне ды эрзянь раськенть ялгатне тердезельть Раськень Озксов, кона карми ютавтовомо тедиде медьковонь кемнилееце чистэнть Чукал веленть маласо.

«Масторава»-сто саезь Тюштянь валонзо:

-«Бути чачиде Инешкинь эйдекс,
Инешкинь эйдекс яла уледе!
Свал ансяк эсенк кельсэ кортадо,
Свал ансяк эсенк превсэ эрядо,
Свал ансяк эсенк мельсэ арседе,
Свал эсенк коенк-иланк ванстодо,
Свал эсенк ломанть прявтокс путнеде.
Сестэ а ёми Эрзянь Масторось!», -ней кувать гайгить пилесэнек ды оймесэнек.

Промксось прядовсь эрзянь чапамо ловсосо ды прякасо каванямосо. Каванясь Грунина Зина, кона пек вадрясто содасынзэ эрзянь пидема-панема тевенть.

Монгак тосо ульнинь, чапамо ловсодо симинь, прякадо ярсынь. Пек тантейть!

Сермадыцясь: Эрюш Вежай

фотокувт Покшчистенть тесе