Отправлено: 31.01.11 15:45. Заголовок: Виталий Картышкин

 Отправлено: 06.10.11 11:22. Заголовок: Виталий Картышкин К..

Виталий Картышкин

Костязь калонь вечкиця

мизолкс

Кизэнь каникулатнестэ Гришка весе валскетнень ютавтсь эрьке чиресэ, конатась, мезе вадря, ульнесь авасоло. Эрявкшнось ансяк лисемс кудосто, ютамс калень кужиненть пачка, ды сельметненень сеске панжовкшнось сэнь, ванькс эрькесь. Калонь кундсемасонть Гришка пек эзь «сэреде», седе сеедьстэ якась эрькентень а мезень тейнемадо. Пиже валскеланга тетязо стякшнось важодеме, ды сонзэ стака чалгавксонзо свал пувтакшность Гришкань. Седе тов удомась мекев эзь педякшно, ды нупальсэнть тодовонть марто стяко тюреме цёранть мелезэ тунь арасель. Вана истя теевськак Гришка калонь кундсицякс. Ды а берянекс. Эрьва чи кандтнесь кудов зярыя карасть ды окунть. Авазо пидиль тантей штюрьба, кадовикс калтнэнь Гришка сонсь салтсь ды костясь мацтлангсо.
Ансяк весть, зярдо Гришка совась мацтонтень ды снартнесь понгавтомс уськентень од кундавксонть, сон редизе: таго-мекс калтнэ пек аламолгадсть. Гришка кевкстизе тетянзо, ярсась-эзь тонатась калтнэде, ды чарькодсь: калонзо кие-бути салси. Ды те берянь тевентькак тейни превтеме – вейке чис ульнесть габзордязь мик пелест костязь калтнэ. «Мезеяк, чокшне учоса салыцянть, невтян тензэ тарабан!», – кедень ёзазь арсесь Гришка. Ды кармась чокшнень вастовомантень анокстамо. Таргизе кудыкельде ташто ружиянть, конатастонть маныть сёксня сынь тетянзо марто леднесть паксясо, ваднизе-ваньскавтызе ды сыргась лавкав сал мельга. Тосо вастовсь Алёшка шабранзо марто, конань марто вейсэ тонавтнесть.
– Мезекс зяро сал рамить? – кевкстизе ялганзо Алёшка.
– Ды калс вана сеедьстэ якан, – покшкавтнезь мерсь Гришка. – Ведрань-ведрань кудов эйсэст кандтнян. Мик аздан ков теемс пуло марто сюпавчинть. Авам штюрьба эйстэст пиди, пачалгосо ресты, псаканть анды, ды ялатеке кадовкшныть. Салтан вана аламонь-аламонь ды костян.
– Те вадря! Паряк, каванясамак течи? – мизолдозевсь Алёшка. – Мон костязь калт пек вечкан.
– Сак течи, – паро мельсэ мерсь Гришка. – Каванятан, монень те аволь стака.
Цёрынетне вейсэ пачкодсть кудост видьс ды явсть. Алёшка таго-мекс эзь са штюрьбадо-калдо ярсамо, кадык Гришкань авазо пидеськак чокшне пешксе чугун. «Сонсензэ мелесь. Эзь са, кадык, – арсесь эсь пачканзо Гришка. – Течи аволь сонзэ пек учан».
Видеяк, течи сон учось лията инже. Зярдо ушосонть чопотетсь, Гришка салава саизе салсо зарядязь ружиянзо ды лиссь кудостонть. Кекшсь мацт вакссо касыця куракшонть потс, кармась учомо.
Зярыя шкань ютазь марявсть пелиця эскелькст ды мацтонтень лиссь… Алёшка шабрась. «Оно кие калом салси?! – абунгадсь Гришка. – Вана тон кода, Алёшка, сыть монень ярсамо! Мезеяк, истяяк каванятан, иля пеле». Салыцясь панжизе кенкшенть, совась мацтонтень ды курок лиссь тосто костязь калонь керькс марто.
«Кирдть, шабра! Поцек!» – ювкстась Гришкань прява, ды сон цярадсь ружиясонть Алёшкань кутьмерензэ алов. «Ба-бах!» – каятотсь ушонь келес. «Ая-яй! А-а-а-а!» – пижакадсь Алёшка, ёртынзе калтнэнь, кундызе ледезь тарканзо ды прянь-полдань синдезь напустясь кудов. Гришка истя жо сыргась эсь кудонзо ёнов. Мелезэ ульнесь витезь.
Валскемарто, зярдо Гришка весементь ёвтнизе тетянстэнь, тонатась васня пекензэяк кундакшнызе ракамодонть, мейле вадринестэ путнесь цёранстэнь ружиянть апак кевксте сайнеманзо кисэ, аламо шкань ютазь ялатеке ушодсь мекев ракамо. Мейле сась Алёшкань тетязо, мик эциксэль тюреме. Цёранзо, келя, а мезень кисэ салсо варсодизь. Зярдо кармась содамо, мезень кисэ, апак пейде ёвтась Гришканень сюкпря, каизе кшнаньгарьксонзо ды тусь кудов. Молян, келя, вадяштаса те балбесэнть салтозь таркинензэ…
Теде мейле Алёшка таргошка удось ансяк пекекиське лангсо. Ютасть кавто таргот, ды Гришка саизе Алёшкань калонь кундсеме. Истят велень койтне – кадык шабрась салатанзатак, ялатеке сон кадови шабракс.

"Чилисема", 2011, 2№-сь.

 Отправлено: 06.10.11 22:46. Заголовок: Сюконямот, тейтерь, ..

Сюконямот, тейтерь, од эрзянь таланонь невтеманть кис!