Мария Биушкинань лемензэ ледстнемга Июнень 19-це чистэ топодсь ие, кода тусь эрямосто Мария Романовна Биушкина. Эрзянь ломантненень те авась содавикс. Мария Романовна – эйкакшонь туртов сермадыця, кельсодый, филологиянь наукань кандидат (1978). Сонзэ валдо лемензэ ледстнемга Дубенка енксов якасть эрзянь поэтэсь, «Чилисема» журналонь редакторось Н.И.Ишуткин, «Сятко» журналонь важодицясь А.Д.Ганчин, «Эрзянь мастор» газетань редакторось Е.В.Четвергов.
М.Р.Биушкинань покш мелензэ коряс, сон калмазель тиринь енкссо, Мордовиянь Дубенка енксонь Карьлейка велесэ, ней – Якстере Луга поселка (сонсь жо эрясь Московсо). Чачсь Мария Романовна 1925-це иестэ покш семиясо, косо трявсть кавксо эйкакшт. Школав сыргась вете иесэ, ансяк тов сонзэ эзизь прима, вишкаль. Зярдо кассь, якась Дубенкав, эрьва чи ялго кавксо вайгельбеть! Тов ды мекев. Мария тонавтнесь 7-це классо, кода ушодовсь Ине Отечественной войнась. Эрьва кодамо тевсэ савсь стакасто важодемс. Войнасо чавость Мария Романовнань кавто лелянзо – Борис ды Витя. 1938-це иестэ ледезель Иван лелязо. Сондензэ семиясь кувать мезеяк эзь сода. Те шкас апак муе, косо калмазь. Чумондызь, кода се шкасто ламотнень, «национализмань тевень ветямосо»… Лелятнеде Мария Романовна ламоксть ледстнесь ризксэв стихотворениясонзо.
Школанзо парсте прядоманзо мейле тонавтнесь Саранскоень Полежаев лемсэ институтсо. Лиссь мирдененень эсест велень церантень офицерэнтень Михаил Биушкиннэнь. Эрямонь ламо таркат савкшнось полавтомс важодеманзо коряс. М.Р.Биушкина важодсь эрзянь ды рузонь келень тонавтыцятнень ерокчист кастомань институтсо методистэкс. Сермадсь эйкакштнень туртов евтнемат, стихть, пьесат. Сермадовксонзо лиснесть «Сурань толт», «Пионерэнь вайгель» журналтнэсэ. Истя жо нолдазельть колмо книганзо. 1962-70-це иетнестэ Биушкина важодсь Мордовиянь телевидениясо эйкакшонь передачань редакторокс. Седе тов семиянзо марто тусть эрямо Башкортостанонь Стерлитамак енксов. Мирдезэ тосонь педиститутсо важодсь омбо масторонь келень кафедрань прявтокс. Мария Романовна истя жо тонавтсь те институтсонть. Тесэ сон арсесь сермадомс диссертация Федоровской районсо эриця эрзятнень кортавкстнэде. Диссертациянть идизе Эстониянь Тарту ошсо. Теде мейле семиянек эрясть ды важодсть Украинань Славянск ошсо.
Мария Романовна васенцетнень ютксоль, кить совасть «Масторава» Московонь вейсэндявксов. Малав колмо иень перть топавтсь «Эрзянь ойме» вейсэндявксонь прявтонь тевтнень. Кеме сюлмавкст кирдсь Московонь Некрасов лемсэ библиотеканть марто. Тосо ютавтнесь эрьва кодат чокшнеть, вастовомат.
Те авась кадовсь весень мельс кода панжадо ойме ломань. Сон свал капшиль весенень лездамс: косо валсо, косо – паро тевсэ. Лемень кундамсто, роднянзо ды малавиксэнзэ пек лембестэ ледстнесть Мария Романовнадо. Эрьва ие сон бажась понгомс тиринь енксов. А евтавикс кеняркс кирдсь, зярдо пачкодиль эсензэ Карьлейкав. Велева ютамсто сон лоткиль эрьва ломаненть ваксс, шумбракстниль ды кувать кортыль. А уш кода учильть эйсэнзэ роднянзо! Ялаксонзо ды сазоронзо эйкакштнень кармавтынзе тонавтнемс вузсо.
Кода ледстнесь Е.В.Четвергов, Мария Романовна ульнесь тонавтыцязо. Нейгак мельсэнзэ ашти, кода те тонавтыцясь совась классозост. Сеске мусь кель-вал эйкакштнень марто. Уроконзо мельстуицяльть. Зярыя иеть сон тонавтсь Орданьбуе велесэ. Ламо иень ютазь сынь а весть вастневсть ве таркасо, Биушкина ламо лездась эрзянь тевтнень ветямосо.
Эсь авадост ледстнесть Мария Романовнань эйкакшонзо Леонид ды Людмила. Сынь пурнызьгак те вастовоманть. Валост коряс, Мария Романовна анокстась покш важодема Москов енкссо эриця эрзятнеде. Сынь аштить рукописьсэ. Пек вадря улевель, бути сынст кияк нолдавлинзе. Россиянь Литфондонь Мордовиянь отделениянь прявтось Н.И.Ишуткин алтась лездамс те тевсэнть.
Н.Ишуткин, Биушкинань церазо Леонид, Нуянь Видяз лелясь
- участник сейчас на форуме
- участник вне форума