Мелькужо Эрзянь Мастор - Форум Страна Эрзян, Форум Эрзя народа

Саезь "Эрзянь правда" кулялопастонть. Нама, ёжозо, те кулялопанть аволь эрзянь, ялатеке мезе а мезе лезэв содамочис маштови.

Федор Алексеевич ВИДЯЕВ

Федор Алексеевич Видяев чачсь 1912 иень ноябрянь 7-це чистэ Самара енксонь Кошкина буень Степная Шентала велесэнть. Национальностень коряс эрзяль. 1930 иестэнть прядызе Мурманск ошонь средней школанть. Кавто иеть важодсь матросокс калонь кундамонь сейнерсэ. 1932 иестэнть Мурманонь обкомонь ВЛКСМ-нь путевканть кувалт кучозель тонавтнеме М.В.Фрунзе лемсэ военно-морской училищав. Тонавтнема тарканть прядызе «отлично» отметка марто 1937 иестэнть. Теде мейле сыргась служамо Северной флотонтень. Истя «Д-2» ведь потмова укшныця венчентень сась рулевой группань од командирэсь – ВИДЯЕВ.
1938 иень февральстэнть Федор Алексеевич ульнесь содавикстэяк содавикс эень походсонть, зярдо сынь ваиця эенть лангсто валкстызь ниле советской полярниктнень.
Теке иень сексестэнть Видяевень кучизь тонавтнеме Ведь потмова укшныцянь командань составонь высшей специальной класстнэс. 1940 иестэнть Видяев – «Щ-421» ведь потмова укшныця венчень командирнэнь лездыця, косо командирэкс ульнесь Н.А.Лунин капитан-лейтенантось. Те таркасонть Видяев аволь ансяк тонавтсь ведь потмова укшныцятнень, истя жо тонавтнесь сонськак. Прянь а покшкавтниця, тевень содыця ды а пелиця Видяев пек куроксто теевсь экипажонть туртов сехте вечкевиця ялгакс. Войнань васенце чистэнть «Щ-421» ведь потмова укшныця венчесь тусь походов.
1942 иестэнть «Щ-421» командирэкс кармась улеме Ф.А.Видяев капитан-лейтенантось. Кавто недлянь ютазь Федор Алексеевичень ялганзо ильтизь командирэнь васень походозонзо. Те ведь потмова укшныця Видяевень прявтсо венчесь тейсь кото походт, конатнестэ вететне ульнесть экипажонтень изницянь, меельцестэнть сон ваявтозель. Экипажонь командирэнтень максозель Якстере Знамянь орденэсь.
Теде мейле Видяев капитан-лейтенантось аравтозель «Щ-422» венчень командирэкс. 1942 иень сентябрястонть венчесь кармась тюреме ятонь кавто ванстыця кораблятнень марто ды вейкенть, эйстэст кавто торпедань вачкодевксэнть вельде, ваявтызе ведь потс. Базав велявтомадо мейле Видяевнень максозель Якстере Знамянь омбоце орденэсь.
1943 иень июлень васенце чистэнть Федор Алексеевичень прявтсо экипажось сыргась 19 меельце походонтень, конадонть мейле кияк эйстэст живстэ эзь са. Те шкантень Федор Алексеевич Видяевнень максозельть уш Якстере Знамянь колмо ордент. Теке иень ноябрянь 6-це чистэнть а васоло се тарканть эйстэ, косто ильтясть Видяевень меельце походонтень, а пелиця ведь потмова укшныцянтень североморецэнь пурназь ярмактнень лангс стявтозель памятник. 1945 иестэнть Великобританиянь Правительствась казизе Видяевень англань орденсэ, конань максызь куломадонзо мейле козейканстэнь Марина Ивановна Видяеванень. Федор Алексеевичень лемензэ кандтни Мурманск областень вейке поселкась ды Северной флотонь ведь потмова укшныця венчень флотонь базась, косто, кода содатано, тусь укшномо 2000 иестэнть ды мекев эзь велявто «Курск» ведь потмова укшныця венчесь. Зярдо-бути укшнось Северэнь иневедтнева «Федор Видяев» корабляськак. Федор Алексеевич Видяевень эрзянь ине церанть лемезэ совавтозь Ине Отечественной войнань героень лопатнес.

--------------------------------------------------------------------------------

Максим Алексеевич ПУРКАЕВ

Максим Алексеевич Пуркаев чачсь 1894 иень августонь 14-це чистэ Мордовиянь Дубенкань райононь Налитова велесэ. Ней веленть лемезэ Пуркаева.
Кажонь службасо М.А.Пуркаев 1915 иестэнть саезь. Прядсь прапорщикень школа. Якстере Армиясо 1918 иестэнть саезь. Гражданской войнань шкане ульнесь ротань, батальононь, полконь прявтокс. Коммунистэнь партияс совась 1919 иестэнть. 1923 иестэнть «Выстрел» курстнэнь прядомадо мейле ульнесь полконь командирэкс ды комиссарокс, дивизиянь штабонь начальникень лездыцякс ды штабонь прявтокс, военной округонь штабонь отделэнь прявтокс, штабонь начальникень полавтыцякс ды штабонь начальникекс.
1936 иестэнть М.А.Пуркаев прядызе Фрунзе лемсэ военной академиянть ды ладязель васня дивизиянь командирэкс, мейле – военной округтнень штабонь начальникекс.
1939 иестэнть ульнесь Якстере Армиянь полконь походсонть. 1940 иень июльстэ саезь Киевень башка кажонь округонь штабонь начальник. Войнань шкастонть Пуркаев ульнесь: 1941 иень июньстэ-июльстэ – Киевень башка кажонь округонь штабонь прявтокс, мейле 1941 иень декабрясто саезь – 3 ударной армиянь командующеекс, 1942 иестэнть саезь 1943 иес – Калининской фронтонь прявтокс. 1943 иень апрельстэнть Дальневосточной, мейле 2-це Дальневосточной фронтонь прявтокс.
М.А.Пуркаевень прявтсо анокстазь ды ютавтозь Ржевско-Сычевской, Великолукской, Ржевско-Вяземской (1943 иень) операциятне.
Ине Отечественной войнанть прядовомадо мейле М.А.Пуркаев ульнесь СССР-нь Вооруженной Виень Дальней Востоконь военной округонь командующеекс.

--------------------------------------------------------------------------------

Сергей Вениаминович ВЕЧКИЛЁВ

Россиянь Президентэнь Реформань кис аштиця комитетэнь прявтось эрзянь церась Сергей Вениаминович Вечкилёв чачсь 1966 иень октябрянь 5-це чистэнть Оренбургонь областень Северной енксонь Стародомосейкино велесэнть.
Школав сыргась 1973 иестэнть Татариянь Лениногорской енксонь Ивановка велесэнть. Кото иень ютазь семияст тусь эрямо Украинань Донецкой областень Красногоровка ошов, косо 1983 иестэнть Сергей прядызе школанзо. Теке жо иестэнть сон кармась тонавтнеме Набережной Челнынь Камань политехнической институтсонть автомеханической факультетсэнть. Тесэ тонавтнемстэ Вечкилёв кармась важодеме студентэнь научной центрасо. 1984-1986 иетнестэ служась армиясо, косо ульнесь комсомолонь организациянь секретарекс. Военной округсонть самбонь коряс пелькстамотнесэ Вечкилёв саизе васенце тарканть. Те шкастонть сонензэ максозель дзюдонь коряс мастерэнь кандидатонь лемесь. Армиядонть мейле 1986 иестэнть тонавтнеманзо поладызе Камань политехнической институтсонть. 1988 иестэнть Сергей Вечкилёв теизе «Вектор» од ломанень центранть, конась кемекстась ды тевс нолдась научно-технической продукция ВПК-нь ды автомобилень заводтнэнь туртов. 1990 иестэнть Вечкилёв идизе «Капиллярные теплообменники, принцип функционирования и их применение в авиации» дипломонь роботанзо ды прядызе институтонзо.
1991-1992 иетнестэ Сергей Вениаминович – «Менеджер сервис» СП-нь Камань филиалонь торговлянь представитель. Теке марто ютась «Антикризисное управление на предприятиях», «Консалтинг бизнеса и управления» тонавтнемань курст, важодсь Таджикистанонь, Узбекистанонь министерстватнесэ, «Дальневосточное судоходство», «Якуталмаззолото», «Таджиккабель», «Таджикзолото» предприятиятнесэ, КАМАЗ, ВАЗ заводтнэсэ.
1992-1997 иетнестэ – «Севена» фирмань президент. Фирмась лездась кризисэнь каршо бороцямонь тевентень, ютавтсь внешней экономикань ветямонь тев, совавтсь эрямос экономикань эрьва кодат проектт.
2000-2002 иетнестэ тонавтни В.И.Ленин лемсэ Казанень университетсэнть. Теде мейле максови тензэ Менеджмент организациянь дипломось. Седе тов важоди «Интермаркет» ООО-нь прявтокс. 2004 иестэнть саезь 2006 иентень Сергей Вениаминович важоди Россиянь Президентэнь Реформань кис аштиця комитетэнь Весероссиянь общественной организациянь прявтонь васенце полавтыцякс, 2006 иестэнть саезь течинь чис сон – теке комитетэнь прявт.
Тешкстасынек, Вечкилёвонь покштояк покш опытэзэ агитациянь-организаторонь роботань ветямосо, аволь вишкине путовксозо РФ-нь Президентэнь кочкамонь ветямо шкастонть. Аволь аламо тейсь «Путинэнь кис» гражданской движениянть теемасо ды кемекстамосо. Течинь чине комитетэнть икеле путозь ламодояк ламо а шожда задачат. Вейкесь эйстэст – пачтямс Президентэнь реформатнень эрьва эрицянть мельс-превс. Ды те, койсэнек, комитетэнтень теемс удалакшны.

--------------------------------------------------------------------------------

Андрей Федорович ДУНАЕВ

Россиянь МВД-нь икелень прявтось, генерал-лейтенантось Андрей Федорович Дунаев чачсь Ульяновской областень Тереньгулень райононь Алешкино эрзянь велесэнть. 1959 иестэнть Андрей Дунаев прядызе СССР-нь МВД-нь Алма-Атань милициянь спецшколанть. Седе тов сон тонавтнесь СССР-нь МВД-нь милициянь высшей школасо ды СССР-нь МВД-нь академиясо.
1959 иестэнть саезь 1965 иес сон важоди Казахстанонь Кустанаень облисполкомонь УВД-нь старшей оперуполномоченнойкс, седе тов роботы теке областень Джетыгарин ошонь исполкомонь ОВД-нь прявтонь полавтыцякс, Ульяновской областень Тереньгуль енксонь ОВД-нь прявтокс, Чечено-Ингушонь АССР-нь МВД-нь уголовной вешницянь прявтокс. 1974-1980 иетнестэ Дунаев – Дагестанонь АССР-нь внутренней тевень министрань полавтыця. 1980-1985 иетнестэ – Вологдань областень УВД-нь прявт. 1986-1990 иетнестэ Андрей Федорович Дунаев – СССР-нь МВД-нь Калининградонь милициянь школань прявт. 1990-1991 иетнестэ сон РСФСР-нь МВД-нь министрань полавтыця, седе тов министрань тевень топавтыця. Теке жо шкастонть Дунаевень кочкакшнызь РСФСР-нь народной депутатокс, косо сон совсесь «Коммунисты за демократию» фракциянтень.
1991 иень августонь 19-це чистэнть, ГКЧП-нь путчонь шкастонть, сон Ашо кудонть ванстомга зярыя тонавтнема таркатнестэ совавтсь Московс милициянь курсантт. Фороссто Горбачевонь идема шкастонть ульнесь МВД-нь кажонь группань прявтокс. Дунаевнень максозь МВД-нь заслуженной роботникень лемесь, теде башка, казезь правительствань зярыя казнесэ. Пенсияв туемадонзо мейле Дунаев кундась предпринимателень тевентень. 1994 иестэнть сон кармась важодеме Московонь «Новый русский банк» АКБ-нь директоронь советэнь председателекс, 1996 иестэнть теевсь «Глобэкс» банконь директоронь советэнь председателекс. Неень шкастонть Андрей Федорович важоди «Ульяновсккурорт» ОАО-нь директоронь советэнь председателекс. Дунаев ламо тейсь ды, койсэнек, эште теи эсензэ чачома енксонть виевгавтоманзо туртов. Ульяновскойсэ сон педе-пев вельмевтинзе допрок розорязь санаторно-курортной учреждениятнень, зярыя фабрикатнень ды заводтнэнь. Тиринь Алешкино велесэнзэ эсензэ ярмак лангс стявтсь Николай Чудотворец лемсэ церькова. Ламодояк ламо лезды нужас ваязь, уроз ды пайстомо ломантненень.
Теде башка, Андрей Федорович пародояк паро тетя, сон кастась кавто церат.

--------------------------------------------------------------------------------

Надежда Никитична КАДЫШЕВА

Эрзянь тейтерь-авась, Россиянь народной артисткась, «Золотое кольцо» ансамблянь солисткась Надежда Никитична Кадышева чачсь 1959 иень июнень 1-це чистэ Самарань областень Клявлина енксонь Горки велесэнть. Ансяк сонзэ эйкакш пингезэ кеместэ сюлмавсь теке енксонь Сыре Маклауш веленть марто, конась ашти Самарань, Оренбургонь областтнень ды Татарстанонть вейкест-вейкест эйстэ маласо аштиця таркасонть.
Эйкакш пингестэ саезь Надянь ульнесь покштояк покш мелезэ тонавтнемс музыкань тевентень. Текень кувалма сыргась Московов Ипполитов-Иванов лемсэ училищантень. Тонавтыцязоль содавикс педагогось Николай Михайлович Тарасенко. Тейтересь прясто пильгс совась тонавтнемань тевентень. Кинь еновгак а молиця вайгелезэ, музыкас пек чарькодемазо, куватьс важодемань лувозо шкань ютазь кармасть явомо сонзэ лиятнень эйстэ. Зярдо Кадышева тонавтнесь колмоце курссо, тердизь важодеме «Москонцерт» вейсэндявксонь «Россияночка» квартетэнтень. Квартетэнь репертуарсонть ульнесть пек ламо народной морот. Самай сестэ кунсолыцятне редизь кинь еновгак а молиця морыцянть Надежда Кадышевань. Весе неть моротне, кода кортыть, нолдазельть морыцянть оймензэ пачк. Надянень ульнесь мезе евтамс кунсолыцянтень.
Общежитиясо эрямсто тейтересь теевсь содавиксэкс Гнессинтнэнь лемсэ институтонь студентэнть Александр Костюконь марто. Од ломантне кармасть вечкеме ды 1983 иестэнть урьвакстсть. Теке жо шкастонть Кадышева поладызе тонавтнеманзо Гнессинтнэнь лемсэ институтсонть профессоронть Нина Константиновна Мешконь сольной морамонь классонть. Зярыя шкань ютазь пурназель масторонь келес содавикс «Золотое кольцо» ансамблясь, косо Кадышева педе-пев панжизе алкуксонь морамонь талантонзо.
Течинь чине Россиясо арась истямо ломань, конась бу аволизе сода Надежда Кадышевань лемензэ. Сонзэ моронзо гайгить эрьва кодамо кецямонь покшчисэ, кафесэ, ресторансо, телевизорсо, радиосо ды лия эрьва кодамо таркатнесэ. Миненек, эрзянь ломантненень, те покштояк покш мельспаро ды каштанчи. Эдь Надежда лиссь эрзянь раськенть пельде. Сави меремс, тиринь келензэ Надежда Никитична эзизе стувто течинь чис. Сон аволь ансяк вадрясто корты эрзянь кельсэ, натой морыяк. Кадышева ламоксть сакшнось Мордовияв, косо сонзэ свал вастасть пек лембестэ ды паро мельсэ. Кемтяно, маласо шкастонть тиринь артисткась таго сы Мордовияв ды кази тесэнь эрицятненень вадрядояк вадря, седейшкавань, мельстуиця морот.

--------------------------------------------------------------------------------

Лидия Андреевна РУСЛАНОВА

Лидия Андреевна Русланова (чачомань коряс Агафья Андреевна Лейкина) чачсь 1900 иень октябрянь 27-це чистэ Саратовань губерниянь Чернавка эрзянь велесэ. Русланова эрзяваль, парсте содылизе эрзянь келенть ды кой-зярдо натой лисиль морамо эрзянь оршамопельсэ. Лидия Руслановань ульнесь мазый, виев, кинь еновгак а молиця вайгелезэ. Теке марто, башка образованиязо арасель, музыкань грамотантень тонавтнесь эйдень кудосо, ков понгсь аванзо куломадонзо мейле. Уроз эйдень кудодонть мейле саизь важодеме мебелень фабрикав.
– Кемзисемге иесэ, – ледстнесь ине морыцясь, – мон теевинь ероков артисткакс, эзинь пеле мездеяк – а сценадонть, а публикадонть. Теке жо фабрикасонть Руслановань маризе морамодо М.М.Медведев, Саратовань консерваториянь профессорось, ды мерсь тензэ самс тей тонавтнеме. Академиянь уроктне эзть кенярдовт од морыцянть ды, паряк,т те ульнесь сехте уцяскав невтевксэкс, зярдо наукань вокалонть эйстэ туемась лездась ванстомс вайгеленть истямокс, кодамокс сон максозель пертьпельксэнть пельде.
Савкшныль ансяк дивсемс сонзэ артистэнь виев потмоежомарямонтень: кода чевтестэ ды видестэ марилизе моронь ежонть, кода видестэ пачтилизе сонзэ певтемечинть ды мазычинть. Кунсолыцятнень, васняяк, дивавтсь сонзэ вайгелень тембрась, конась а човорявиль кодамояк лия вайгель марто.
Руслановань кинь еновгак а молиця морамонь стилесь вельмевтсь рузонь морыцятнень умок уш стувтозь коест-кирдаст. Сон сынст, мерьсынек, прок чачтынзе одов. Течинь чис эрить ломантнень седейсэ ды пек парсте содавикст неень шкань кунсолыцятнененьгак Руслановань истят моронзо, кода «Валенки», «Меж высоких хлебов», «Уж ты, сад», «Окрасился месяц багрянцем», «Липа вековая», «Златые горы», «Очаровательные глазки», «Я на горку шла», «Саратовские припевки» ды ламот, ламот лиятне. Пингеде пингень эрямо макссь артисткась «И кто его знает», «Катюша», «В землянке» моротненень ды колхозонь нурька моротненень.
Отечествань ине кажонь шкастонть Лидия Андреевна ульнесь фронтонь бригадатнень эйсэ, конатне морасть солдаттнэнь икеле. Сон пачколесь Берлинэнь Рейхстагонтень, ды сонзэ крыльцянть лангсо морась солдаттнэнень-изницятненень рузонь народонь морот. 40-це иетнень прядовомсто Русланова судязель ды пекстазель тюрьмас. Аштесь Забайкальясо. Творчествань тевезэнзэ артисткась велявтсь ансяк 1953 иестэнть, зярдо уш кулокшнось Сталин. Масторонь келес содавикс ине морыцясь Л.А.Русланова кулось 1973 иестэнть. Сонзэ куломанть марто тусь культурань цела пинге.

--------------------------------------------------------------------------------

Валерий БОРЧИН ды Ольга КАНИСЬКИНА

Сынь – геройть, конат теизь содавиксэкс Мордовиянть весе масторлангонть келес. Оля Каниськина ды Валерий Борчин – Пекинсэ Олимпиадань ды Берлинсэ шожда атлетикань коряс чемпионатонь сырнень призерт. Неть кавто од ломантне невтсть пример, кить истятнэ алкуксонь спортсментнэ.
Валера БОРЧИН – эрзянь цера. Чачсь Дубенка енксонь Поваделесэ. Эште школасо тонавтнемстэ теинзе спортсонть васенце эскелькстнэнь. Уш вишка пингстэ церынесь бажась ютавтомс ютко шканзо лезэвстэ, арсесь касомс виевекс ды шумбракс. Васняяк кармась явомо покш мель сокссо кирякстнемантень. Весть тренировкасо Валериень томбавсь кумажазо ды ардтнеманть савсь кадомс. Сон варчинзе виензэ спортонь якамосо. Вечкевсь. Иень ютазь саизь Олимпийской анокстамонь центрав, косо ушодовсть эрьва чинь тренировкатне.
– Минек эрямосо васенцесь – те тренировкат, – тешксты Валера. – Ансяк весе виень путозь спортсменэсь пачкоди изнямонь текштнес.
Алкукскак, неть валтнэ Валерань туртов теевсть девизэкс. Валскестэ чокшнес сон ЦОП-со. Тедеде прядызе М.Е.Евсевьев лемсэ МГПИ-нь физической воспитаниянь факультетэнть.
Валера а лови сырнень медалензэ ансяк эсензэ изнявксокс. Валонзо коряс, теньсэ путовксост ламо ломантнень. Пек лездыть од спортсментнэнень Мордовия Республикань прявттнэ.
Валера сась спортонь якамонтень пек позда – 17 иесэ, зярдо лия спортсментнэ ушодыть тренировкатнень 5-6 иесэ. Ансяк тень лангс апак вано, сон уш кавксть масторлангонь чемпион. Весеменень тувталось – эсь тевенть вечкемась.
Алкукс, В.Борчиннэнь топодсть ансяк 23 иеть ды весемесь эйсэнзэ учи икеле. Улезэ шумбрачись ды уцяскась, сестэ кармить лия изнявксткак.
Оля КАНИСЬКИНА – омбоце, кие саизе мирэнь чемпионатсо спортонь якамосо Россиянть туртов сырнень медаленть. Те сонзэ уш колмоце покш изнявксозо. Теде икеле 2007 иестэ Оля сайсь васенце тарка мирэнь чемпионатсо ды 2008-це иестэ Олимпиадань налксематнесэ. Ней сон ловови сехте титулованной спортсменкакс 20 вайгельбес тейтерь-авань якамосонть.
Вишка пингстэ Оля эзь арсеяк теевемс спортсменкакс. Натой, зярдо ялгазо тердизе шожда атлетикань секцияс, сонзэ туртов те ульнесь ансяк ютко шкань ютавтомакс. Покш мель тенень овсе эзь яво. Шкань ютазь тренировкатне кармасть вечкевеме. Кой-кона ялгатненень налкставсь тов якамось, Оля жо кадовсь. Ды тень коряс овсе а янкси. Спортось сонзэ туртов теевсь эрямонь смустекс.
Тешкстама, икеле евтазь изнявкстнэ Олянь туртов аволь васенцеть. 2005-це иестэ од ломантнень чемпионатсо ды 2008-це иестэ Европань Кубоксо саезь омбоце таркатне Олянень марявить сехте покшокс. Эдь самай сынст эйстэ ушодовсь спортонь карьеразо. Стакаль тейтерентень вешкане тонавтнемс ды якамс тренировкав. Университетэв яксесь пек чуросто, секс вете иетнень таркас савсь тонавтнемс сисем. Оля свал евты сюкпря тонавтыцятненень. Сынь чарькодсть, кода а шожда вейсэндямс спортонть тонавтнеманть марто. Окойники, икелень студенткась Каниськина тедеде идизе дипломонзо. Прядызе МГУ-нь математической факультетэнть.
Ольга кеми, мирэнь чемпионатонь сырнень медалесь аволь меельце. Сон свал карми бажамо сайнемс васенце таркатнень. Эрьва изнявксось сонензэ маряви покш эскельксэкс, конанть лангс а эряви лотксемс. Ды кода мерсь Россиянь Президентэнть Д.А.Медведевень марто вастовомсто, седе товгак карми идеме тиринь масторонть честензэ.

--------------------------------------------------------------------------------

Николай Дмитриевич ЧИНДЯЙКИН

Россиянь заслуженной артистэсь Николай Дмитриевич Чиндяйкин чачсь Горьковской областьсэ. Зярдо тензэ ульнесть 12 иеть, семиязо тусь эрямо Донбассов Алчевск ошов. Куш касськак рузонь ломантнень ютксо, эсь прянзо сон лови эрзякс. Теде сон аволь весть евтнесь эсензэ интервьютнесэ. «Эдь монь фамилиям – алкуксонь эрзянь фамилия», – тешксты артистэсь.
Николай Дмитриевичень тетязо чачсь Отяжеле енксонь Аловелесэ. Зярдо тензэ ульнесть 18 иеть, сон тусь Севастополев. Иень ютазь саизь армияв, служась Украинасо. Войнань васенце читнестэ тусь фронтов. Мейле понгсь фашистнэнень пленс. Тосто лисемадо мейле одс пекстызь лагерьс, ансяк советскойс. Истя Дмитрий Николаевич понгсь Горьковской областев. Тосо чачськак содавикс актерось.
Эйкакш порасто ульнесь покш мелезэ теевемс художникекс. Сон зярдояк эзь арсеяк, што неень профессиязо карми эрямонь смустекс. 1968 иестэ Чиндяйкин пряды Ростовонь театральной училища, 1987 – ГИТИС, актеронь-режиссеронь курс. Важодсь Ростовонь ды Омскоень театратнесэ.
Киносо снимамо Николай Дмитриевич кармась 1988 иестэ саезь. Сестэ сон налксесь Джек Лондононь романонзо коряс «Морские волки» фильмасонть. Магридж пидицянть рольденть мейле сонзэ сеедьстэ кармасть тердтнеме снимамо киносо. Неень шкане актеронть пек сюпав фильмографиязо: «Музыка для декабря» (1998), «Мама» (1999), «Каменская» (1999-2000), «Моросейка», 12» (2000), «Марш Турецкого» (2000), «Бандитский Петербург-7» (2005) ды лият. Весемезэ налксесь кавксоньгеменде ламо фильмасо.
Теде башка, Николай Дмитриевич важодсь кода режиссергак. 1987 иестэ «Театрань эрямо» журналось казизе сонзэ сезононь сехте вадря постановканть кисэ – «Не играйте с архангелами» спектаклясь. 1997 иестэ максозель «Золотая маска» национальной театральной премиясь – «Плач Иеремии» спектаклянть кисэ.
Неень шкане актерось роботы А.П.Чехов лемсэ МХАТ-со ды налкси «Час Волкова» киносо, конась моли НТВ каналсонть. Аволь умок Николай Дмитриевич сакшнось Мордовияв. Тесэ вастневсь творчестванзо вечкицятнень марто ды содавтынзе малавиксэнзэ, конат эрить Аловелесэ.

--------------------------------------------------------------------------------

Василий Федорович УЧАЙКИН

РАМН-нь академикесь, медицинань наукань докторось, Росздравонь ГОУ ВПО РГМУ педиатрань факультетэнь эйкакшонь инфекциянь ормань кафедрань прявтось, Педиатрань инфекционистэнь ассоциациянь президентэсь эрзянь церась Василий Федорович Учайкин чачсь 1938 иень декабрянь 7-це чистэ Хабаров енксонь Лазо лемсэ буень Кедрач велесэнть.
1962 иестэнть прядызе Хабаровонь медицинань институтонть. 1964 иестэнть сась тонавтнеме Н.И.Пирогов лемсэ 2 МОЛГМИ-нь эйдень инфекциянь кафедрань аспирантурав. 1967 иестэнть идизе «Ангина при острых респираторных заболеваниях у детей» кандидатонь диссертациянзо ды уш 1977 иестэнть – «Тяжелые и злокачественные формы вирусного гепатита у детей» докторонь диссертациянзо. 1967 иестэнть саезь Учайкин важоди РГМУ-нь ассистентэкс, 1975 иестэнть – доцентэкс, 1980 иестэнть – профессорокс. 1988 иестэнть саезь течинь чис – эйдень инфекциянь кафедрань прявтокс.
– Монь ундоксон, – евтни академикесь, – Мордовиясто, Покш Березникень Дегилевка велестэнть. Тетям-авам састь Хабаровонь енксонтень ютазь пингень 30 иетнестэ коллективизациянь ютавтома шкастонть.
Василий Федорович Учайкин сермадсь 400 ламо наукань важодевкст, ютксост – «Тяжелые и злокачественные формы вирусных гепатитов у детей» (1988 ие); «Инфекционные болезни у детей» (1987 ие); «Вирусные гепатиты у детей» (1994 ие); «Вакцинопрофилактика: настоящее и будущее» (2000); «Инфекционные токсикозы у детей» (2002 ие); «Вирусные гепатиты от А до ТТV» (2003 ие); «Инфекционные болезни у детей» учебникесь (1990 ие); «Руководство по клинической вакцинологии» (2001 ие); «Инфекционные болезни и вакцинопрофилактика у детей» (2006 ие). Учайкинэнь авторонь 12 свидетельстванзо ды изобретениянь 3 патентэнзэ, конат велявтозь эйкакшонь пшти ды свалшкань вирусонь гепатиттнэнь тонавтнемаст лангс. Теде башка, Учайкин – РФ-нь Президентэнь Медицинань центрань прявт педиатор, РАМН-нь «Инфекционные болезни у детей» педиаторонь наукань кужонь весе россиянь проблемань комиссиянь прявт. Россиянь эйдень инфекциянь коряс прявт инфекционист.
Россиянь Федерациясонть Василий Федорович ловови эйдень инфекциянь патологиянь покштояк покш специалистэкс. Самай сон ловови масторонь педиаторонь-инфекционистэнь школань теицякс