Мелькужо Эрзянь Мастор - Форум Страна Эрзян, Форум Эрзя народа

"Эрзянь лисьмапря"
Июлень 23-це чистэ Нижегородской енксонь Лукоянова райононь Од веленть маласо ютавтовсь «Эрзянь лисьмапря» регионъютконь фестивалесь. Сон мольсь «Кельме лисьма леень» лисьмапрянть вакссо.
Эряви меремс, истямо покшчи Нижней енкссо ютавтови уш колмоцеде, ансяк тедеде те тешкставсь седе келейстэ, тердевсть ламо инжеть, сакшность ламо ломанть. Сон яволявтозель регионъютконь фестивалекс. Тиринь культурань невтеме тей сакшность делегацият Татарстансто, Мордовиясто, Самара, Саратов, Пенза, Ульяновск ды лия енкстнэстэ. Кувака килангонть ды псинть лангс апак вано, сынь паро мельсэ лиснесть сцена лангс, евтасть поздоровт, морасть эрзянь морот, седейшкава кортасть эрьванть марто.

Фестиваленть ушодовомсто панжозель Озксонь маарось. Лукояновань эрзянь культурань музеень прявтось Аношонь Тумай кирвазтизе штатолонть, «Торама», «Ламзурь» ансамблятне морызь кезэрень моротнень, Александр Данильчев ловнызе озксонть. Н.П.Родионова лайшизе Тюштянь. Мааронтень каязель модась. Мейле весе вейсэ мааронть перька ютасть кирькссэ, кедьте кедьс кундазь.

Истя жо панжозель «Память предкам» покш скульптурась. Сонзэ авторось – Николай Аношкин чувтосто од керсицясь. Тесэ сонзэ зярыя теевксэнзэ. А кемезеваткак, сынст теинзе те од ломанесь.
Фестиваленть пингстэ ульнесть спортонь пелькстамот, козо тердевсть весе, кинь ульнесь мелезэ варчамс эсь виензэ. Тесэ леднесть налсо, ертнесть узереть ды копьят, бороцясть. Изницятне казевсть казнесэ. Важодсь декоративно-прикладной творчествань выставкась-ярмункась. Теде башка, микшневсть эрзянь книгат, футболкат.

Невтезель покш концерт. Сцена лангс лиснесть эрьва костонь эрзянь ансамблятне. Евтасынь сынст мазый лемест: те – Мордовиянь «Торама», «Ламзурь», «Сюлгамо», Самарань – «Масторава», Татарстанонь Бугульминской райононь – «Валдочи», Нижней енкссто сакшность зярыя районтнэстэ – «Эрзяночка» – Лукоянова енксонь Пичингуши велестэ, «Умарина» Сеченова енксонь Васильевкасто, «Родничок» Первомайской районсто, «Родники» Лукояновань Иваньбиесто, «Ялгат» Гагина енксонь Какино велестэ, «Горнипов» – Шатки енкссто, «Чилисема» Покш Болдинань Пикшнясто ды ламо лият.

Фестивалень ютавтома таркась кочказель парсте, арсезь. Ки вакссо. Тесэ чувтот, экше пеле, лисьмапря вакссо, теезь ламо эземнеть, озамо таркат. Бути сизят – озат аламнес, симат тантейдеяк тантей кельме веденеденть – ежоськак паролгады.
Покш сюкпря, Нижней енксонь эрзят, «Эрзянь лисьмапря» фестиваленть анокстамонть-пурнамонть кисэ!!!